ក្លឹប Chelsea មានសង្ឃឹមខ្លាំងឡើងក្នុងការសម្រេចកិច្ចព្រមព្រៀងផ្ទេរខ្សែបម្រើស្លាប វីលហ្វ្រីដ ហ្សាហា (Wilfried Zaha) បន្ទាប់ពីកីឡាកររូបនេះបានទាក់ទងទៅលោក ពីនី ហ្សាហាវី (Pani Zahavi) ឲ្យជួយសម្របសម្រួលក្នុងការចាកចេញពីពហុកីឡាដ្ឋាន Selhurst Park ។
ភ្នាក់ងារ ពីនី ហ្សាហាវី មានទំនាក់ទំនងល្អជាមួយនឹងមនុស្សជាច្រើននៅក្លឹបឆេលស៊ី ហើយថែមទាំងមានភាពជិតស្និទ្ធនឹងម្ចាស់ក្លឹបលោក រ៉ូម៉ាន អាប្រាម៉ូវីច (Roman Abramovich) ដោយលោកធ្លាប់សម្រេចកិច្ចការធំជាច្រើនកន្លងមក។
ហ្សាហា បានផ្តាច់ទំនាក់ទំនងពីភ្នាក់ងារយូរអង្វែងរបស់ខ្លួនគឺក្រុមហ៊ុន Will Salthouse កាលពី ខែកញ្ញាឆ្នាំមុន ដោយសារតែការខកចិត្តមិនអាចសម្រេចកិច្ចព្រមព្រៀងផ្ទេរ បន្ទាប់ពីក្លឹប Everton និង Arsenal ព្យាយាមដាក់សំណើផ្ទេរ ៥២លានផោន។
ទោះបីជាយ៉ាងណា កីឡាករវ័យ២៦ឆ្នាំរូបនេះនៅជាប់កិច្ចសន្យាជាមួយក្រុមហ៊ុន Salthouse `s Unique Sports Management រហូតដល់រដូវក្តៅ។
ក្រុមហ៊ុន Salthouse នៅមានសិទ្ធិក្នុងការតវ៉ា ហើយបញ្ហានេះនឹងត្រូវដោះស្រាយនៅក្នុង សវនាការក្រុមប្រឹក្សាដោយឡែកមួយ។
ក្លឹបឆេលស៊ីមានសិទ្ធិតាមប្រមាញ់ ហ្សាហា នៅខែនេះ បន្ទាប់ពីរួចផុតពីបម្រាមផ្ទេររបស់ FIFA ប៉ុន្តែពួកគេប្រហែលជាត្រូវរង់ចាំរហូតដល់រដូវក្តៅ ខណៈក្លឹប Palace កំណត់តម្លៃយ៉ាងហោច ណាស់៨០លានផោន៕ ប្រែសម្រួល: ពិសិដ្ឋ
