តាមព័ត៌មានថា ក្លឹប Juventus ត្រៀមផ្តល់កីឡាករម្នាក់បូករួមនឹងកញ្ចប់ទឹកប្រាក់ផងដែរ នៅខែមករានេះ ដើម្បីទទួលបានខ្សែបម្រើ ផូល ប៉ុកបា (Paul Pogba) នៅក្លឹបម៉េនឆេស្ទ័រ យូណាយធីត។
ទំនាក់ទំនងរបស់ ប៉ុកបា ជាមួយក្លឹបម៉េនឆេស្ទ័រ យូណាយធីតហាក់ដូចជាស្រអាប់នៅរដូវ កាលនេះ ហើយក្លឹប Juventus ត្រៀមដាក់សំណើផ្ទេរ ដោយផ្តល់កីឡាករ អេឌ្រាន រ៉ាប៊ីយ៉ូត (Adrien Rabiot) បូករួមប្រាក់មួយចំនួនដែលសរុបស្មើនឹង៨៥លានផោន។
រ៉ាប៊ីយ៉ូត មានបញ្ហាលំបាកក្នុងការសម្របខ្លួន ចាប់តាំងពីបានចូលរួមជាមួយក្លឹបនេះ បន្ទាប់ពី ចាកចេញពីក្លឹប PSG ហើយក្លឹប Juventus សង្ឃឹមថា នឹងអាចសម្រេចកិច្ចព្រមព្រៀងផ្ទេរ នាំយក ប៉ុកបា ត្រឡប់មកវិញ។
ប៉ុកបា បានចាកចេញពីយូណាយធីតតាំងពីនៅក្មេងដោយសារតែខ្វះឱកាសក្នុងក្រុមជម្រើស ដំបូង និងបានចាកចេញទៅចូលរួមជាមួយក្លឹប Juventus ដោយឥតតម្លៃខ្លួន។
ក្លឹបអ៊ីតាលីនេះហាក់ដូចជាចាប់អារម្មណ៍កាន់តែខ្លាំងឡើង ចាប់តាំងពី ប៉ុកបា ចាក ចេញ ហើយនៅពេលនេះ ទំនងជាត្រៀមនាំយកកីឡាកររូបនេះត្រឡប់មកអ៊ីតាលីវិញ។
កីឡាករបារាំងរូបនេះបានលើកឡើងនៅរដូវក្តៅនេះថា វាដល់ពេលដែលត្រូវប្រកួតប្រជែងថ្មី ប៉ុន្តែកីឡាកររូបនេះបន្តនៅជាមួយក្លឹបម៉េនឆេស្ទ័រ បន្ទាប់ពីខកខានមិនបានផ្ទេរទៅលេងនៅក្លឹប Real Madrid កាលពីរដូវក្តៅ៕ ប្រែសម្រួល: ពិសិដ្ឋ
