ដោយបូកគោ/កំពតៈចៅក្រមសាលាដំបូងខេត្តកំពតបានសម្រេចឃុំខ្លួនប្តីប្រពន្ធជាម្ចាស់សំណង់អគារបាក់រលំនៅខេត្តកែបបណ្តោះអាសន្នក្រោមបទបង្ករបួសស្នាមនិងមនុស្សឃាតដោយអចេតនាដើម្បីស៊ើបអង្កេតបន្ត។មន្ត្រីនគរបាលព្រហ្មទណ្ឌនៃស្នងការដ្ឋានខេត្តកែបបានប្រាប់ឱ្យដឹងថាជនត្រូវចោទទាំងពីរនាក់គឺប្តីឈ្មោះឯកសារុន និងប្រពន្ធឈ្មោះឈីវ សុធី មានទីលំនៅក្នុងខេត្តព្រះសីហនុ។
ប្រភពដដែលបានបញ្ជាក់ថាកាលពីល្ងាចថ្ងៃទី៣ខែមករាឆ្នាំ២០២០សមត្ថកិច្ចបានឃាត់ខ្លួនប្តីប្រពន្ធជាម្ចាស់សំណង់អគារបាក់រលំហើយនាំមកសាកសួរនៅស្នងការដ្ឋាននគរបាលខេត្តកែបតាមនីតិវិធី។ បន្ទាប់ពីបំពេញសំណុំរឿងរួចរាល់សមត្ថកិច្ចបានបញ្ជូនជនសង្ស័យទៅកាន់សាលាដំបូងខេត្តកំពតនៅព្រឹកថ្ងៃទី៦ខែមករាឆ្នាំ២០២០រួចចៅក្រមក៏សម្រេចឃុំខ្លួនអ្នកទាំងពីរជាបណ្តោះអាសន្នដើម្បីដំណើរការស៊ើបអង្កេតបន្តក្រោមបទមនុស្សឃាតដោយអចេតនា និងបង្ករបួសស្នាមដោយអចេតនា។
សូមរំលឹកថាកាលពីវេលាម៉ោង៤និង៣០នាទីរសៀលថ្ងៃទី៣ខែមករាឆ្នាំ២០២០មានករណីបាក់រលំសំណង់អគារកម្ពស់ប្រាំពីរជាន់ដែលកំពុងសាងសង់ស្ថិតក្នុងទឹកដីភូមិកែបសង្កាត់កែបក្រុងកែបបណ្តាលឱ្យមនុស្សប្រុសស្រីក្មេងចាស់ចំនួន៣៦នាក់បាត់បង់ជីវិតនិង២៣នាក់ផ្សេងទៀតរងរបួសធ្ងន់ស្រាល។
ជុំវិញករណីនេះលោកវ៉ៅសុខាប្រធានមន្ទីររៀបចំដែនដីនគរូបនីយកម្មសំណង់និងសុរិយោដីខេត្តកែបបានបញ្ជាក់ថាជំនាញធ្លាប់ហាមឃាត់មិនឱ្យដំណើរការសាងសង់ចំនួនពីរលើករួចមកហើយបន្ទាប់ពីរកឃើញថាបេតុងនៃសំណង់នោះមានកម្រិតគុណភាពអន់។
ប៉ុន្តែម្ចាស់ព្យាយាមបន្តជួលកម្មករនិងលួចធ្វើរហូតមានហេតុការណ៍អាក្រក់កើតឡើងតែម្តង។លោកប្រធានមន្ទីរបានបន្តថាជាមួយនឹងករណីនេះមន្ទីរជំនាញបានដាក់បណ្តឹងហើយព្រះរាជអាជ្ញាអមសាលាដំបូងខេត្តកំពតបានចាត់វិធានការដោយតម្រូវឱ្យឃាត់ខ្លួនប្តីប្រពន្ធជាម្ចាស់សំណង់តាំងពីក្រោយកើតហេតុភ្លាមៗ៕S/
