ដោយបូកគោ/កំពត៖ជនរងគ្រោះពីរនាក់ដែលកំពុងសម្រាកព្យាបាលរបួសក្នុងមន្ទីរពេទ្យបង្អែកខេត្តកំពតដោយសារការបាក់រលំអគារសំណង់នៅក្រុងកែបបានទទួលអំណោយរបស់សម្តេចតេជោនិងសម្តេចកិត្តិព្រឹទ្ធបណ្ឌិតដែលជាផ្នែកសំខាន់ក្នុងការសម្រាលក្តីទុក្ខលំបាកសម្រាប់ក្រុមគ្រួសារ។
ក្នុងឱកាសប្រគល់ថវិកាពីរម៉ឺនដុល្លារដល់ជនរងគ្រោះទាំងពីរនាក់ កាលពីព្រឹកថ្ងៃទី៦ ខែមករា ឆ្នាំ២០២០លោកជាវតាយអភិបាលខេត្តកំពតបានមានប្រសាសន៍ថាក្នុងនាមតំណាងឱ្យសម្តេចប្រមុខរាជរដ្ឋាភិបាលថ្ងៃនេះលោកពិតជាមានកិត្តិយសដោយបាននាំយកថវិការបស់សម្តេចតេជោនិងសម្តេចកិត្តិព្រឹទ្ធបណ្ឌិតមកប្រគល់ជូនជនរងគ្រោះឈ្មោះលីប៊ុនណារិទ្ធនិងឈ្មោះឡៃស៊ីនួន។
ថ្វីដ្បិតម្នាក់ក្នុងចំណោមនេះមានទីលំនៅក្នុងខេត្តតាកែវតែសម្តេចនាយករដ្ឋមន្ត្រីបានណែនាំឱ្យប្រញាប់យកថវិកាមកប្រគល់ជូនជនរងគ្រោះដែលកំពុងសម្រាកព្យាបាលក្នុងមន្ទីរពេទ្យបង្អែកខេត្តកំពតដើម្បីឆាប់បានប្រើប្រាស់តាមតម្រូវការ។
លោកអភិបាលខេត្តបានបន្តថាទីណាមានទុក្ខលំបាក សម្តេចទាំងពីរតែងតែយកចិត្តទុកដាក់ ហើយនៅជាមួយប្រជាពលរដ្ឋ និងជួយដល់បងប្អូនជានិច្ច។ ជាក់ស្តែងក្នុងហេតុការណ៍បាក់រលំសំណង់អគារនៅខេត្តកែបនេះសម្តេចតេជោមានវត្តមានតាំងពីថ្ងៃដំបូងរហូតដល់បញ្ចប់ប្រតិបត្តិការនៃការស្វែងរកជនរងគ្រោះមួយរយភាគរយ។
លោកជាវតាយបានបញ្ជាក់ទៀតថាពាក់ព័ន្ធនឹងសោកនាដកម្មនោះសម្តេចប្រមុខរាជរដ្ឋាភិបាលបានសម្រេចផ្តល់ឱ្យជនរងគ្រោះក្នុងម្នាក់មួយម៉ឺនដុល្លារដើម្បីជួយសម្រាលក្តីលំបាក។ចំណែកក្រុមគ្រួសារអ្នកបាត់បង់ជីវិតសម្រាប់សពមួយសម្តេចប្រគល់ជូនដល់សាច់ញាតិប្រាំម៉ឺនដុល្លារនិង១០លានរៀលដើម្បីចាត់ចែងធ្វើបុណ្យតាមប្រពៃណី។ដោយឡែកក្នុងករណីថវិកាដែលទទួលបានពីសប្បុរសជននានានៅមានសល់ សម្តេចនឹងបន្តគិតគូរចំពោះក្រុមគ្រួសារ អនកបាត់បង់ជីវិតបន្តទៀត។
សូមរំលឹកថាកាលពីវេលាម៉ោង៤និង៣០នាទីរសៀលថ្ងៃទី៣ខែមករាឆ្នាំ២០២០មានករណីបាក់រលំសំណង់អគារកម្ពស់ប្រាំពីរជាន់ដែលកំពុងសាងសង់មួយស្ថិតក្នុងទឹកដីភូមិកែប សង្កាត់កែប ក្រុងកែប បណ្តាលឱ្យសង្កត់កម្មកររាប់សិបនាក់។ដោយប្រើរយៈពេលជាង៤០ម៉ោងជនរងគ្រោះត្រូវបានរកឃើញ និងនាំចេញពីគំនរបាក់បែកជាបន្តបន្ទាប់មាន៥៩នាក់ដែលបានមកពី១១ខេត្តផ្សេងៗគ្នា។
ក្រៅពីអ្នកបាត់បង់ជីវិត៣៦នាក់អ្នករងរបួសធ្ងន់ស្រាលចំនួន២៣នាក់បាននិងកំពុងទទួលការព្យាបាលដោយ១៩នាក់ស្ថិតក្នុងមន្ទីរពេទ្យបង្អែកខេត្តកែបពីរនាក់នៅមន្ទីរពេទ្យបង្អែកខេត្តកំពតនិងពីរនាក់ទៀតបានបញញជូនទៅរាជធានីភ្នំពេញ៕S/
