ដោយៈសុផល/ភ្នំពេញៈលោកបណ្ឌិតងួនញ៉ិលអនុប្រធានទី១នៃរដ្ឋសភាបានអនុញ្ញាតឱ្យលោកមហាម៉ាត់ហ្វារុកខាន់(MuhammadFarukKhan)ប្រធានគណៈកម្មាធិការអចិន្ត្រៃយ៍ទទួលបន្ទុកកិច្ចការបរទេសនៃសភាបង់ក្លាដេស។លោកបណ្ឌិតអនុញ្ញាតចូលជួបដើម្បីសម្តែងការគួរសមនិងពិភាក្សាការងារនៅព្រឹកថ្ងៃទី៦ខែមករាឆ្នាំ២០២០នៅវិមានរដ្ឋសភាខណៈដែលលោកដឹកនាំគណៈប្រតិភូបំពេញទស្សនកិច្ចនៅព្រះរាជាណាចក្រកម្ពុជា ចាប់ពីថ្ងៃទី៥ ដល់ថ្ងៃទី៨ ខែមករា ឆ្នាំ២០២០។
ក្នុងជំនួបនោះលោកមហាម៉ាត់ហ្វារុកខាន់បានមានប្រសាសន៍លើកឡើងពីបញ្ហាជនអន្តោប្រវេសន៍រ៉ូហ៊ីនយ៉ា ប្រមាណជាង១លាននាក់ ភៀសខ្លួនចូលទៅកាន់បង់ក្លាដេសដោយលោកបានស្នើសូមឱ្យកម្ពុជា ជួយគាំទ្រដល់ដំណើរការចរចាដោះស្រាយបញ្ហានេះ រវាងប្រទេស បង់ក្លាដេស និងប្រទេសមីយ៉ាន់ម៉ា ឱ្យសម្រេចបានលទ្ធផលល្អផង។
ទាក់ទិននឹងដំណើរការចរចាដោះស្រាយបញ្ហាជនជាតិរ៉ូហ៊ីនយ៉ារវាងប្រទេសបង់ក្លាដេសនិងមីយ៉ាន់ម៉ានេះលោកបណ្ឌិតងួនញ៉ិលបានមានប្រសាសន៍លើកទឹកចិត្តសូមឱ្យមានការចរចាដោយសន្តិវិធីនិងមិត្តភាពជាមួយគ្នា។លោកមហាម៉ាត់ហ្វារុកខាន់បានមានប្រសាសន៍ថ្លែងអំណរគុណចំពោះលោកបណ្ឌិតងួនញ៉ិលដែលបានអនុញាតឱ្យគណៈប្រតិភូរដ្ឋសភាបង់ក្លាដេសជួបពិភាក្សាការងារក្នុងឱកាសកំពុងបំពេញទស្សនកិច្ចនៅលើទឹកដីដ៏ស្រស់ស្អាតនៃព្រះរាជាណាចក្រកម្ពុជានាពេលនេះនិងចំពេលដែលកម្ពុជាកំពុងប្រារព្ធពិធីអបអរសាទរខួបទី៤១ នៃទិវាជ័យជម្នះ៧មករា ហើយគណៈប្រតិភូរដ្ឋសភា បង់ក្លាដេស សូមចូលរួមជាមួយប្រជាជនកម្ពុជា ក្នុងទិវាជាប្រវត្តិសាស្ត្រនេះផងដែរ។
លោកមហាម៉ាត់ហ្វារុកខាន់ក៏បានមានប្រសាសន៍លើកឡើងអំពីទំនាក់ទំនងនិងកិច្ចសហប្រតិបត្តិការល្អរវាងកម្ពុជានិងបង់ក្លាដេសនៅពេលបច្ចុប្បន្នក៏ដូចជាកន្លងមកដែលមានការផ្លាស់ប្តូរដំណើរទស្សនកិច្ចគ្នាទៅវិញទៅមក រវាងថ្នាក់ដឹកនាំរដ្ឋសភា និងរដ្ឋាភិបាលនៃប្រទេសទាំងពីរជាបន្តបន្ទាប់។
លោកប្រធានគណៈប្រតិភូបានមានប្រសាសន៍កត់សម្គាល់ពីការរីកចម្រើនវិស័យសេដ្ឋកិច្ចនៃប្រទេសទាំងពីរកម្ពុជានិងបង់ក្លាដេសគឺស្ថិតនៅក្នុងកំណើនជាង៧ភាគរយដូចគ្នានិងសង្ឃឹមជឿជាក់ថាកំណើននេះនឹងបន្តរីកចម្រើនថែមទៀត។ឆ្លៀតក្នុងឱកាសនេះដែរលោកមហាម៉ាត់ហ្វារុកខាន់ក៏បានអញ្ជើញលោកបណ្ឌិតងួនញ៉ិលអញ្ជើញទៅទស្សនកិច្ចនៅប្រទេសបង់ក្លាដេសក្នុងពេលវេលាសមស្របណាមួយ។
លោកបណ្ឌិតងួនញ៉ិលបានគូសបញ្ជាក់ថាប្រទេសកម្ពុជានិងបង់ក្លាដេសបានបង្កើតទំនាក់ទំនងការទូតជាមួយគ្នានៅថ្ងៃទី១៧ខែកុម្ភៈឆ្នាំ១៩៩៣។ចាប់តាំងពីពេលនោះមកទំនាក់ទំនងនិងកិច្ចសហប្រតិបត្តិការនៃប្រទេសទាំង២កាន់តែមានភាពល្អប្រសើរជាលំដាប់។ដោយឡែកចំពោះវិស័យការទូតសភាគឺរដ្ឋសភាកម្ពុជាបានបង្កើតក្រុមមិត្តភាពរដ្ឋសភាកម្ពុជា-បង់ក្លាដេស។
លោកបណ្ឌិតងួនញ៉ិលបានស្នើឲ្យរដ្ឋាភិបាលនិងរដ្ឋសភាបង់ក្លាដេសជួយជំរុញអ្នកវិនិយោគមកបណ្ដាក់ទុននៅកម្ពុជាឱ្យច្រើនថែមទៀតព្រោះថាកម្ពុជាមានសក្ដានុពលសម្រាប់ការវិនិយោគនិងមានលក្ខខណ្ឌអំណោយផលជាច្រើន។កម្ពុជាមានស្ថិរភាពនយោបាយនិងស្ថិរភាពម៉ាក្រូសេដ្ឋកិច្ចកម្ពុជាមានកម្លាំងពលកម្មវ័យក្មេងសម្បូរបែបក្នុងនោះអ្នកមានអាយុ៣៥ឆ្នាំចុះមាន៧២ភាគរយនៃប្រជាជនសរុប។
លោកបណ្ឌិត ក៏បានស្នើលោកប្រធានគណៈប្រតិភូ ជួយជំរុញអ្នកទេសចរណ៍បង់ក្លាដេស មកទស្សនាប្រទេសកម្ពុជាឱ្យច្រើនថែមទៀតព្រោះថាបច្ចុប្បន្នប្រទេសកម្ពុជាមានសុខសន្តិភាពពេញផ្ទៃប្រទេស និងមានសក្ដានុពលខាងវិស័យទេសចរណ៍។ឆ្លៀតក្នុងឱកាសនេះផងដែរលោកបណ្ឌិត ងួន ញ៉ិល បានអញ្ជើញគណៈប្រតិភូរដ្ឋសភាបង់ក្លាដេស មកចូលរួមក្នុងកិច្ចប្រជុំ ASEP11 ដែលសភាកម្ពុជានឹងត្រូវទទួលធ្វើជាម្ចាស់ផ្ទះរៀបចំនៅចុងឆ្នាំ២០២០ខាងមុខនេះផងដែរ៕S/
