ដោយមូលសម្បត្តិ/ភ្នំពេញ៖ក្បួនប្រណាំងកង់ពិភពលោកថ្ងៃបញ្ចប់នៃព្រឹត្តិការណ៍ប្រណាំងកង់ពិភពលោកនៅតំបន់ឆ្នេរសមុទ្រកម្ពុជាលើកទី១បានធ្វើដំណើរមកដល់មុខសាលាខេត្តកែបហើយបន្ទាប់ពីចេញដំណើរពីខ្លោងទ្វារចូលឧទ្យានជាតិព្រះមុនីវង្ស បូកគោ នាវេលាម៉ោង១២ថ្ងៃត្រង់កន្លងទៅ។
ប៉ុន្ដែទោះបីធ្វើដំណើរមកដល់កន្លែង ត្រូវប្រារព្ធពិធីបិទការប្រកួតក្ដីតែក្បួនប្រណាំងកង់ពិភពលោកនេះ នៅមិនទាន់បញ្ចប់នោះទេដោយត្រូវបន្ដការប្រកួតជុំវិញក្រុងកែបចំនួន៥ជុំទៀតទើបបញ្ចប់និងកំណត់កីឡាករជ័យលាភីក្នុងការប្រកួតដំណាក់កាលទី៣។ការប្រកួតដែលមានចម្ងាយសរុប១៤៣.៥គីឡូម៉ែត្រកាត់រង្វង់មូលសេះសផ្សារក្ដាមឆ្នេរកែបសាលាខេត្តកែបនិងហួសទៅដល់ផ្លូវកែងក្នុងស្រុកដំណាក់ចង្អើ។
គួរបញ្ជាក់ថា ពិធីចេញដំណើរដំណាក់កាលចុងក្រោយនេះ បានធ្វើឡើងក្រោមវត្តមានលោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC, លោកអភិបាលខេត្តកំពត ។ប៉ុន្ដែមុនបាញ់កាំភ្លើងបញ្ជាចេញដំណើរទាំងថ្នាក់ដឹកនាំកីឡាករជាតិ-អន្ដរជាតិសមត្ថកិច្ចនិងប្រជាពលរដ្ឋបានបន្ដធ្វើការស្មឹងស្មាធគោរពវិញ្ញាណក្ខន្ដអ្នកដែលបានជួបឧបទ្ទវហេតុគ្រោះថ្នាក់បាក់រលំអគារ នៅខេត្តកែប រយៈពេល១នាទីផងដែរ។
លោក ថោង ខុន បានលើកឡើងថា ការប្រកួតដំណាក់កាលទី៣ មានលក្ខណៈកាន់តែពិសេស ព្រោះត្រូវឆ្លងកាត់តំបន់ឆ្នេរសមុទ្រខេត្តកែបក្រោយក្បួនប្រណាំងកង់ពិភពលោកបានឆ្លងផុតតំបន់អេកូទេសចរណ៍រយៈពេល២ថ្ងៃកន្លងទៅ។ប៉ុន្ដែការប្រកួត២ដំណាក់កាលដំបូងត្រូវបានណៈកម្មការបច្ចេកទេសUCIធ្វើការកោតសរសើរនិងវាយតម្លៃខ្ពស់ចំពោះស្ថានភាពផ្លូវអមដោយសម្បត្តិធម្មជាតិដ៏ល្អឯកតាំងពីខេត្តកោះកុងរហូតដល់កំពូលភ្នំបូកគោ ដែលអំណោយផលសម្រាប់ការរៀបចំព្រឹត្តិការណ៍នេះ។
បន្ថែមលើនេះ លោកវ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC បានឱ្យដឹងដែរថា ចំពោះការប្រកួតដំណាក់កាលទី២ ម្សិលមិញ គឺដំណើរការដោយជោគជ័យ និងទទួលបានការវាយតម្លៃបច្ចេកទេសកាន់តែខ្ពស់ថែមទៀត ពីគណៈកម្មការបច្ចេកទេស UCI ។
ក្នុងនោះកីឡាករកម្ពុជាដែលបានចូលរួមក៏ធ្វើបានកាន់តែល្អប្រសើរដែរ ជាក់ស្ដែងកីឡាករកម្ពុជា ៣នាក់ បានទទួលបានចំណាត់ថ្នាក់កីឡាករល្អជាងគេ រួមមាន៖ កីឡាករ សាន ណាវម៉ាវ កីឡាករ ហួតឡុយរស្មីនិងកីឡាករគីមចាន់ធូ។នៅថ្ងៃនេះមានកីឡាករប្រមាណ៧៤នាក់បាននិងកំពុងចូលរួមប្រកួត ក្រោយជម្រុះអស់ប្រមាណ ២០នាក់ នៅ២ថ្ងៃមុន។
ចំពោះកម្មវិធីប្រកួតដំណាក់កាលចុងក្រោយនៃព្រឹត្តិការណ៍ប្រណាំងកង់ពិភពលោកថ្ងៃនេះគឺកំពុងចេញពីក្លោងទ្វារចូលឧទ្យានជាតិព្រះមុនីវង្សបូកគោឆ្ពោះទៅមុខសាលាខេត្តកែបតែត្រូវជិះជុំវិញក្រុងកែបចំនួន៥ជុំលើចម្ងាយផ្លូវ១៤៣.៥គីឡូម៉ែត្រដោយគ្រោងបញ្ចប់នាម៉ោង៣,២០នាទីរសៀល។
បន្ទាប់មកនឹងមានរៀបចំពិធីប្រគល់រង្វាន់ជ័យលាភីនិងឯកសណ្ឋានកីឡាករជើងឯក ដំណាក់កាលទី៣ ក្រោមវត្តមានលោករដ្ឋមន្ត្រីថោងខុន,លោកប៉ានសូរស័ក្ដិរដ្ឋមន្ដ្រីក្រសួងពាណិជ្ជកម្មនិងជាប្រធានសហព័ន្ធកីឡាខ្មែរកីឡាទោចក្រយានលោកBrunoBODARDនិងលោកកែនសត្ថាអភិបាលខេត្តកែបផងដែរ៕S/
