Home ព័ត៌មានជាតិ សេដ្ឋកិច្ច លេខ​ឡាន​ពិសេស...

លេខ​ឡាន​ពិសេស ដាក់លក់​ពី​តម្លៃ​២​លាន​រៀល ដល់ ១​ពាន់​លាន​រៀល​

​ដោយ​: សុផល / ភ្នំពេញ​: ក្រសួង​សាធារណការ​និង​ដឹកជញ្ជូន កាលពី​រសៀល​ថ្ងៃទី​៧ ខែមករា ឆ្នាំ​២០២០ បាន​បើក​ឱ្យ​ដំណើរការ​ជា​ផ្លូវការ នៃ​ការលក់​លេខ​ចុះបញ្ជី​ពិសេស​ផ្ទាល់ខ្លួន​សម្រាប់​រថយន្ដ ដើម្បី​ផ្តល់​ជម្រើស​ដល់​ប្រជាពលរដ្ឋ ដែលមាន​លទ្ធភាព​អាច​ជ្រើសរើស​ផ្លាក​លេខ​ដែលមាន​លក្ខណៈពិសេស​អា​ចកុ​ម្ម៉​ង់​តាម​ការពេញចិត្ត​។​

ក្រសួង​សាធារណការ​និង​ដឹកជញ្ជូន បាន​បើក​ឱ្យ​ដំណើរការ​ជា​ផ្លូវការ​នៃ​ការលក់​លេខ​ចុះបញ្ជី​ពិសេស​ផ្ទាល់ខ្លួន​សម្រាប់​រថយន្ដ​ដើម្បី​ផ្តល់​ជម្រើស​ដល់​ប្រជាពលរដ្ឋ​

​ការបើក​ឱ្យ​ដំណើរការ​ជា​ផ្លូវការ​នៃ​ការលក់​លេខ​ចុះបញ្ជី​ពិសេស​ផ្ទាល់ខ្លួន​សម្រាប់​រថយន្ត​នេះ ធ្វើឡើង​ក្នុង​គោលបំណង​ដើម្បី​បំពេញតម្រូវការ និង​ផ្តល់​ជម្រើស​ជូន​ប្រជាពលរដ្ឋដែល​ចង់បាន​លេខ​ចុះបញ្ជី​មាន​លក្ខណៈពិសេស​ផ្ទាល់ខ្លួន ដែល​បង្ហាញ​ពី​អត្តសញ្ញាណ​កម្ពុជា​លើ​ឆាក​អន្តរជាតិ អាច​កៀរគរ​ចំណូល​បន្ថែម​ជូន​ជាតិ និង​ដើម្បីឱ្យ​ម្ចាស់​រថយន្ត​អាច​រក្សា​លេខ​នោះ​ទុក​សម្រាប់​ចុះបញ្ជី​លើ​រថយន្ត​ថ្មី​របស់ខ្លួន​ក្រោយៗ​ទៀត​។​

​ផ្លាក​លេខ​រថយន្ត​ពិសេស ដែល​អាចដាក់​ឈ្មោះ​ខ្លួនឯង ឬ​ដាក់​តាមចិត្ត​ចង់ ព្រមទាំង​អាច​កាន់កាប់​មួយជីវិត​នោះ មានតម្លៃ​ចន្លោះ​ពី​២​លាន​រៀល រហូតដល់ ១​ពាន់​លាន​រៀល និង​អាច​លើសពីនេះ​តាមរយៈ​ការដេញថ្លៃ​។​

​លោក ស៊ុន ចាន់ថុល ទេសរដ្ឋមន្ត្រី និង​ជា​រដ្ឋមន្ត្រីក្រសួង​សាធារណការ​និង​ដឹកជញ្ជូន បាន​គូសបញ្ជាក់ថា លេខ​ពិសេស​ផ្ទាល់ខ្លួន គឺ​សំដៅលើ​ប្រភេទ​លេខ​ចុះបញ្ជី ដែល​ផ្នែក​ខាងលើ​សរសេរ​អក្សរ​ខ្មែរ “​កម្ពុជា​” ផ្នែក​កណ្ដាល​ជា​លេខ​ចុះបញ្ជី​មាន​លេខ ឬ​/​និង អក្សរ​ឡាតាំង​មិន​លើសពី ៨(​ប្រាំបី​)​ខ្ទង់ និង​ផ្នែក​ខាងក្រោម​សរសេរ​អក្សរ​ឡាតាំង​“CAMBODIA” នៅ​ពីក្រោម​បន្ទាត់​ផ្តេក​។ ផ្លាក​លេខ​ពិសេស​ផ្ទាល់ខ្លួន​អាចដាក់​ឈ្មោះ ឬ លេខ​ដែល​ខ្លួន​ពេញ​ចិត្តបាន លើកលែងតែ​ឈ្មោះ​ទីកន្លែង​ប្រវត្តិសាស្ត្រ ឈ្មោះ​ប្រាសាទ ឈ្មោះ​រាជធានី​-​ខេត្ត ឈ្មោះ​ក្រសួង​-​ស្ថាប័ន គណបក្សនយោបាយ ឈ្មោះ​ថ្នាក់ដឹកនាំ​ជាន់ខ្ពស់ និង​ជន​ល្បីឈ្មោះ ជាដើម​។​

​ទន្ទឹមនឹងនោះ​ផងដែរ លោក​ទេសរដ្ឋមន្ត្រី បានស្នើ​សុំឱ្យ​ក្រសួង ស្ថាប័ន​-​ពាក់ព័ន្ធ សហការ​ជាមួយ​អគ្គនាយកដ្ឋាន​ជំនាញ​របស់​ក្រសួង​សាធារណការ និង​ដឹកជញ្ជូន ដើម្បី​អនុវត្ត​ការងារ​នេះ​ឱ្យមាន​ប្រសិទ្ធភាព​ខ្ពស់ ព្រមទាំង​អំពាវនាវ​ឱ្យ​បងប្អូន​ប្រជាពលរដ្ឋ​ប្រើប្រាស់​ប្រព័ន្ធ​ស្វ័យប្រវត្តិកម្ម​របស់​ក្រសួង​ក្នុងការ​ស្នើសុំ​សេវាសាធារណៈ​ចាំបាច់​នានា ជាពិសេស​ចូលរួម​ជាមួយ​ក្រសួង​ក្នុងការ​អនុវត្ត​ន៍​ការងារ​ផ្ទេរកម្មសិទ្ធិ​រថយន្ត​។​

សូមបញ្ជាក់ថា​៖​ តម្លៃ​មូលដ្ឋាន​ក្នុង​ការលក់​លេខ​ចុះបញ្ជី​ពិសេស​ផ្ទាល់ខ្លួន​គឺ​ចាប់ពី​ពីរលាន​រៀល​ឡើង រហូតដល់​មួយ​ពាន់​លាន​រៀល ហើយ​ការលក់​លេខ​ចុះបញ្ជី​ពិសេស​ផ្ទាល់ខ្លួន​នេះ​ត្រូវបាន​បែងចែក​ជា​បី​ប្រភេទ​គឺ ទិញ ស្នើ​ទិញ និង​ការដាក់​ដេញថ្លៃ​។ លេខ​សម្រាប់​ដាក់លក់ គឺជា​លេខ​ទាំងឡាយណា​ដែលមាន​ចំនួន​តួអក្សរ​[A-Z] ឬ​លេខ​[0-9] និង​សញ្ញា​ចុច​[.]​ហើយ​ត្រូវ​បានកំណត់​តម្លៃ​ដោយ​ស្វ័យប្រវត្តិ ផ្អែកលើ​មូលដ្ឋាន​រូបមន្ត​ប្រមាណ​១២០០​រូបមន្ត​។​ការដេញថ្លៃ​ត្រូវធ្វើឡើង​តាម​ប្រព័ន្ធ​ស្វ័យប្រវត្តិកម្ម ប្រព្រឹត្តទៅ​នៅក្នុង​សាល ឬ​តាម​ប្រព័ន្ធ​អន​ឡាញ ដែលមាន​អាសយដ្ឋាន​៖ vehicle.mpwt.gov.kh ហើយ​អ្នកដេញថ្លៃ​ដែល​ឱ្យ​ថ្លៃ​ខ្ពស់​ជាងគេ​បំផុត​ជា​ម្ចាស់​នៃ​លេខ​នោះ​។ ចំណែកឯ​ការទូទាត់​ប្រាក់​ត្រូវ​ធ្វើតាម​ប្រព័ន្ធ​ស្វ័យប្រវត្តិកម្ម​។​

​លោក​ទេសរដ្ឋមន្ត្រី ស៊ុន ចាន់ថុល បាន​ថ្លែងថា ផ្លាក​លេខ​ពិសេស​ផ្ទាល់ខ្លួន​នេះ មានតម្លៃ​ចាប់ផ្តើម​ពី​២​លាន​រៀល​ឡើងទៅ​រហូតដល់ ១០០០​លាន​រៀល តែ​សម្រាប់​ការដេញថ្លៃ​អាច​នឹង​មានតម្លៃ​ច្រើនជាង​នេះ​។ ក្រៅពី​ការជ្រើសរើស និង​កំណត់​ឈ្មោះ​តាម​ការចង់បាន​ហើយ​នោះ ផ្លាកលេខ​ពិសេស​នេះ អាច​រក្សាទុក​ពេញ​ជីវិត ដោយ​គ្រាន់តែ​កាត់ឈ្មោះ​ចេញ​នៅពេល​លក់​រថយន្ត ឬ​គេ​អាច​លក់​ផ្លាកលេខ ពេល​លក់​ទាំង​រថយន្ត​ក៏បាន​។ ប៉ុន្តែ​បើ​លក់​រថយន្ត​ចាស់​ចេញទៅ​ហើយ គឺ​ត្រូវយក​រថយន្ត​ថ្មី​ទៅ​កិប​លេខ​នេះ​ផងដែរ បើ​មិន​យក​រថយន្ត​ថ្មី​ទៅ​កិប​លេខ​ក្នុង​រយៈពេល​៣​ខែ ផ្លាកលេខ​រថយន្ត​នឹង​ធ្លាក់ចូល​ទៅក្នុង​ប្រព័ន្ធ​ដាក់លក់​វិញ​ហើយ​។​

បើតាម​លោក​រដ្ឋមន្ត្រីក្រសួង​សាធារណការ ផ្លាក​លេខ​ពិសេស​នេះ មិន​អនុញ្ញាតឱ្យ​ដាក់ពាក្យ​ពេចន៍​មួយចំនួន​ដូចជា ពាក្យ​អាសអាភាស ឈ្មោះ​ប្រាសាទ ឈ្មោះ​ថ្នាក់ដឹកនាំ និង​ស្ថាប័ន​ធំៗ​ដែល​គេ​ស្គាល់​ច្រើន​ក៏​មិនត្រូវ​បានអនុញ្ញាត​ឱ្យប្រើ​ប្រាស់​បាន​នោះទេ​។ ចំពោះ​ប្រជាពលរដ្ឋ​ដែល​ប្រើប្រាស់​រថយន្ត​មាន​ផ្លាកលេខ​ធម្មតា​ហើយ អាច​ប្តូរ​ទៅប្រើ​ផ្លាកលេខ​ពិសេស​នេះ​បាន​ផងដែរ ប្រសិនបើ​ពួកគេ​ចង់​ប្តូរ​។​

​លោក​រដ្ឋមន្ត្រីក្រសួង​សាធារណការ​បាន​អះអាងថា ​ការរៀបចំ​ឱ្យមាន​ផ្លាក​លេខ​រថយន្ត​ពិសេស ដើម្បី​ចូលរួម​ស្វែងរក​ចំណូល​ពី​ការលក់​ផ្លាកលេខ​ជួយ​ទ្រទ្រង់​ដល់​សេដ្ឋកិច្ចជាតិ និង​ពង្រឹង​ដល់​ការគ្រប់គ្រង​យានយន្ត​នៅ​កម្ពុជា​ផងដែរ​៕ ល​/Ha

ទីតាំងផ្សាយពាណិជ្ជកម្ម

- Advertisment -

Most Popular

តុលាការ​សាកសួរ​បុរស​ជនជាត...

​ដោយៈ​ស​រិ​ទ្ធ​/​កណ្តាលៈ​...

​ព្រះរាជអាជ្ញា​ខេត្តកំពង់...

ដោយៈ ទេ​ពក​ង្រី / កំពង់ឆ្...

​សមត្ថកិច្ច ឃាត់ខ្លួន​បុរ...

​ដោយៈ ស​រិ​ទ្ធ / ភ្នំពេញៈ...

​រដ្ឋមន្ត្រី​ក្រសួងបរិស្ថ...

​ដោយៈ ដេប៉ូ / ភ្នំពេញៈ កម...