Home ព័ត៌មានអន្តរជាតិ សងសឹក​! អ៊ីរ៉...

សងសឹក​! អ៊ីរ៉ង់​បាញ់​កាំជ្រួច​ស្រោច​លើ​មូលដ្ឋានទ័ព​អាម៉េរិក​នៅ​អ៊ីរ៉ាក់​

​មូលដ្ឋាន​ទ័ពអាកាស អាយ​ណាល់ អា​សាត​(Ayn al-Asad ) ដែល​ជា​មូលដ្ឋាន​ទ័ព​អាកាស​ធំ​មួយ​របស់​អាម៉េរិក​នៅ​អ៊ីរ៉ាក់ បាន​រង​ការវាយប្រហារ​ដោយ​គ្រាប់​រ៉ុក្កែត​​ជា​ច្រើន​គ្រាប់ ​ពី​សំណាក់​កង​ឆ្មាំ​បដិវត្តន៍​អ៊ីរ៉ង់ ដើម្បី​ជា​ការ​សងសឹក​ការ​ដែល​អាម៉េរិក​សម្លាប់​ឧត្តមសេនីយ៍​ជាន់ខ្ពស់​អ៊ីរ៉ង់​​ម្នាក់​។​

មូលដ្ឋាន​ទ័ពអាកាស​អា​យ​ណាល់ អាសា​តរង​ការវាយប្រហារ​ដោយ​គ្រាប់​រ៉ុក្កែត ក្រោយ​អ៊ីរ៉ង់​បាញ់​កាំជ្រួច​ដាក់​កាលពីដើម​ថ្ងៃ​ពុធ​

​នៅ​ព្រឹក​ថ្ងៃ​ពុធ​ទី​៨​មករា​នេះ​ កង​ឆ្មាំ​បដិវត្តន៍​អ៊ីរ៉ង់​(IRGC)​បាន​អះអាង​ទៅកាន់​ទូរទស្សន៍​Press TV​ថា មូលដ្ឋាន​ទ័ពអាកាស​អា​យ​ណាល់ អា​សាត រង​ការ​វាយ​ប្រ​​ហារ​ដោយ​កាំជ្រួច​រាប់សិប​គ្រាប់​។​

IRGC​បាន​និយាយ​នៅក្នុង​សេចក្តីថ្លែងការណ៍​មួយ​ថា​«​យើង​ព្រមាន​គ្រប់​ប្រទេស​ជា​សម័្ពន្ធមិត្ត​អាម៉េរិក​ថា បើសិនជា​មាន​ការវាយប្រហា​រ​ចេញពី​ប្រទេស​ណាមួយ​​មកលើ​អ៊ីរ៉ង់ ប្រទេស​នោះ​នឹង​ក្លាយជា​គោលដៅ​នៃ​ការសង​សឹក​ដោយ​យោធា​»​។​

IRGC​បាន​ព្រមាន​ទាំង​អាម៉េរិក​និង​សម្ព័ន្ធមិត្ត​ក្នុង​តំបន់​ថា​កុំ​ឲ្យ​ធ្វើការ​សងសឹក​ក្រោយ​ការវាយប្រហារ​ថ្ងៃ​៨​មករា​នៅ​អ៊ីរ៉ាក់​។​

​ក្នុងពេល​ជាមួយគ្នា ទីភ្នាក់ងារ​សារព័ត៌មាន​អ៊ីរ៉ង់​Tasnim បាន​រាយការណ៍​ថា គ្រាប់​រ៉ុក្កែត​៣៥​គ្រាប់​ត្រូវបាន​បាញ់​ចូល​មូលដ្ឋាន​ទ័ពអាកាស ​ខណៈ​ដែល​ទីភ្នាក់ងារ​​សារព័ត៌មាន​អ៊ីរ៉ង់ Fars បានចាត់ទុក​ការបាញ់​កាំជ្រួច​ផ្លោង​របស់​អ៊ីរ៉ង់​ដាក់​មូលដ្ឋានទ័ព​អាម៉េរិកនេះ​ថា​ជា​«​ការ​សងសឹក​ចាស់ដៃ​» ។​

​ប្រភព​យោធា​អាម៉េរិក​បាន​ប្រាប់​សារព័ត៌មាន​Fox News​ថា កងកម្លាំង​អាម៉េរិក​ស្ថិតក្រោម​ការវាយប្រហារ​ពី​អ៊ីរ៉ង់​។​វា​អាច​ជា​កាំជ្រួច​បណ្តែត​ឬ​កាំជ្រួច​ផ្លោង​​ចម្ងាយ​ខ្លី​។​

​ការវាយប្រហារ​ដោយ​កាំ​ជ្រួច​ក៏​ត្រូវបាន​រាយការណ៍​ថា​មាន​នៅ​ទីក្រុង​អឺ​ប៊ីល របស់​អ៊ីរ៉ាក់​ភាគ​ខាងជើង ដែល​មាន​ស្ថាន​កុងស៊ុល​អាម៉េរិក​មួយ​នៅ​ទីនោះ​។​

​មកទល់ពេលនេះ មន្ត្រី​អាម៉េរិក​នៅ​មិន​ទាន់​បញ្ជាក់​ប្រាប់​ថា​តើ​មាន​ទាហាន​របស់ខ្លួន​ប៉ុន្មាន​នាក់​របួស​ឬ​ស្លាប់​ដោយ​ការវាយប្រហារ​ទាំងនេះ​។​

​លេខា​ព័ត៌មាន​សេត​វិមាន​បាន​និយាយថា​ «​យើង​ដឹង​អំពី​ការ​វាយប្រហារ​លើ​ទីតាំង​អាម៉េរិក​នៅ​អ៊ីរ៉ាក់​។​លោក​ប្រធានាធិបតី ក៏​ត្រូវបាន​រាយការណ៍​ជូន​និង​កំពុង​​តាមដាន​សភាពការណ៍​ជាប់ ហើយ​ប្រឹក្សា​យោបល់​ជាមួយ​ក្រុម​សន្តិសុខ​ជាតិ​របស់​លោក​»​។​

​ការវាយប្រហារ​លើ​មូលដ្ឋានទ័ព​អាម៉េរិក​នេះ​ បាន​កើត​ឡើង​តែ​ប៉ុន្មាន​ម៉ោង​ក្រោយ​មន្ត្រី​IRGC ឧត្តមសេនីយ៍ ម័រតា​ដា គួរ​បា​នី បានប្រកាសថា កងកម្លាំង​របស់​​លោក​«​ស្ថិតក្នុង​ស្ថានភាព​ប្រុងប្រៀប​ខ្លួន​ខ្ពស់បំផុត​»​ដើម្បី​កម្ទេច​មូលដ្ឋាន​អាម៉េរិក​និង​អឺរ៉ុប​នៅក្នុង​តំបន់​៕​ប្រែ​សម្រួល​៖​វាសនា​/Ha

ទីតាំងផ្សាយពាណិជ្ជកម្ម

- Advertisment -

Most Popular

ពលរដ្ឋ​ជាង ២០០​គ្រួសារ​នៅ...

ដោយៈ មុនី​រ័ត្ន​/​ភ្នំពេញ...

លោកនាយករដ្ឋមន្ត្រីទី​ម័​រ...

ដោយៈ​មុនី​រ័ត្ន​/​ភ្ន...

នាយករដ្ឋមន្ត្រី​ទី​ម័​រ​ឡ...

​ដោយ​៖​តារា​រិ​ទ្ធ​/​ភ្នំ...

អ្នក​នាំចេញ​សង្ឃឹមថា ការន...

ដោយ: ពៅនិមល/ភ្នំពេញ​: លោក...