ក្រុមមន្ត្រីបាននិយាយកាលពីថ្ងៃអង្គារទី៧មករាថា ពួកគេគ្រោងនឹងបញ្ជូនក្រុមអ្នកពន្លត់ភ្លើង១០០នាក់ផ្សេងទៀតទៅកាន់ប្រទេសអូស្ត្រាលីដើម្បីចូលរួមជាមួយចំនួនអ្នកពន្លត់អគ្គិភ័យ១៥៩នាក់របស់ខ្លួននៅប្រទេសនេះរួចហើយ ដើម្បីជួយពន្លត់ភ្លើងឆេះព្រៃដែលរហូតដល់ពេលនេះបានសម្លាប់មនុស្ស២៥នាក់និងបំផ្លាញផ្ទះ២.០០០ខ្នង។
ក្រុមប្រឹក្សាអាជ្ញាធរសង្គ្រោះនិងអគ្គិភ័យអូស្ត្រាលី បានស្នើបញ្ជូនក្រុមអគ្គិភ័យនេះជាផ្នែកមួយនៃកិច្ចព្រមព្រៀងជួយគ្នាដែលតាមរយកិច្ចព្រមព្រៀងនេះ អូស្ត្រាលីបានបញ្ជូនបុគ្គលិកអគ្គិភ័យអូស្ត្រាលីចំនួន១៣៨ នាក់ដើម្បីប្រយុទ្ធប្រឆាំងនឹងភ្លើងឆេះព្រៃនៅសហរដ្ឋអាម៉េរិកកាលពីឆ្នាំ ២០១៨។
នៅពេលនេះ វាជារដូវក្តៅនៅប្រទេសអូស្ត្រាលី ហើយដោយសារភាពរាំងស្ងួតនិងក្តៅខ្លាំងនៅឆ្នាំនេះនៅប្រទេសនេះ វាបានបង្កឱ្យភ្លើងឆេះព្រៃកាន់តែខ្លាំង។
សហរដ្ឋអាម៉េរិក អូស្ត្រាលី និងនូវែលសេឡង់ បានផ្លាស់ប្តូរក្រុមអ្នកពន្លត់អគ្គិភ័យទៅវិញទៅមកអស់រយៈពេលជាង១៥ឆ្នាំមកហើយ៕ដោយ៖សុខា/sn
ភ្លើងឆេះព្រៃនៅអូស្ត្រាលី ចាប់តាំងពីខែកញ្ញាមក បានសម្លាប់មនុស្ស២៥នាក់និងបំផ្លាញផ្ទះ២.០០០ខ្នង