កីឡាករ ម៉ារីយ៉ូ ហ្គុតស៍ (Mario Gotze) គ្រោងចាកចេញពីក្លឹប Dortmund ជាលើកទី២នៅពេល ចប់កិច្ចសន្យានៅរដូវក្តៅ។ ខ្សែបម្រើវ័យ២៧ឆ្នាំរូបនេះគ្មានបំណងកាត់បន្ថយប្រាក់ឈ្នួល ៣០ភាគរយ ដើម្បីបាននៅជាមួយក្លឹបនៅក្របខណ្ឌ Bundesliga តទៅទៀតទេ នេះបើតាម សេចក្តីរាយការណ៍របស់កាសែតអាល្លឺម៉ង់។
ហ្គុត មិនសូវមានឱកាសបង្ហាញមុខទេនៅរដូវកាលនេះ នៅក្រោមការដឹកនាំរបស់គ្រូបង្វឹក លូសៀន ហ្វាវរ៉េ (Lucien Favre) ។ ការមកដល់របស់ខ្សែប្រយុទ្ធ អឺលិង ហាឡែន (Erling Haaland) ពីក្លឹប Red Bull Salzburg ទំនងជាធ្វើឲ្យ ហ្គុតស៍ បាត់បង់ឱកាសបន្ថែមទៀត នៅពាក់កណ្តាលទី២នៃរដូវកាលនេះ។
ហ្គុតស៍ បានវិលត្រឡប់មកចូលរួមនៅពហុកីឡាដ្ឋាន Signal Iduna Park វិញកាលពីឆ្នាំ ២០១៦ បន្ទាប់ពីចាកចេញទៅចូលរួមជាមួយក្លឹប Bayern Munich ក្នុងតម្លៃ ៣៧លានផោនកាលពីឆ្នាំ ២០១៣។
អំឡុងរដូវកាលចុងក្រោយជាមួយក្រុម Bayern Munich ហ្គុតស៍ មានបញ្ហារបួសច្រើន ប៉ុន្តែ បានស្តាទម្រង់លេងឡើងវិញហើយរកបានគ្រាប់បាល់សម្រាប់ក្រុមជម្រើសជាតិអាល្លឺម៉ង់នៅក្នុង ការប្រកួតវើលខាប់ឆ្នាំ ២០១៤។
ហ្គុតស៍ បានវិលត្រឡប់មកចូលរួមជាមួយក្លឹប Dortmund ក្នុងតម្លៃ ២០លានផោននៅពីរឆ្នាំ ក្រោយ។ ទោះបីជាយ៉ាងណា បញ្ហារបួសធ្វើឲ្យ ហ្គុតស៍ មិនសូវមានឱកាសបង្ហាញមុខ ស្របពេលកិច្ចសន្យានឹងចប់នៅដំណាច់រដូវកាលនេះ។
តាមព័ត៌មានថា ក្លឹប Hertha Berlin ក៏កំពុងចាប់អារម្មណ៍លើកីឡាកររូបនេះផងដែរ ប៉ុន្តែរំពឹងថា នឹង ផ្ទេរទៅបរទេសច្រើនជាង៕ ប្រែសម្រួល: ពិសិដ្ឋ
