ដោយ៖រ៉ាម៉ន/ភ្នំពេញ៖រដ្ឋបាលរាជធានីភ្នំពេញបាននឹងកំពុងយកចិត្តទុកដាក់បញ្ហាបរិស្ថាននិងថែរក្សាអនាម័យនៅក្នុងរាជធានីភ្នំពេញជាមួយនឹងការដាក់បង្គន់អនាម័យនៅតាមបណ្ដាសួរច្បារនិងទីសាធារណៈនានានៅក្នុងរាជធានីភ្នំពេញ។ដើម្បីធ្វើយ៉ាងណាឱ្យបរិស្ថាននៅតាមសួនច្បារបានលក្ខណៈល្អប្រសើរ ស្របទៅនឹងក្រុងដែលមានភាពស៊ីវីល័យ។
កាលពីព្រឹកថ្ងៃទី៨ខែមករាឆ្នាំ២០២០នេះលោកសំសាមុតប្រធានអង្គភាពសួនច្បារនិងរុក្ខជាតិនៃមន្ទីរសាធារណការនិងដឹកជញ្ជូនរាជធានីភ្នំពេញបានឱ្យដឹងថា៖នៅរាជធានីភ្នំពេញមកដល់ពេលនេះមានបង្គន់អនាម័យទំនើបដាក់នៅតាមទីសាធារណៈនានាមានរហូតដល់១២កន្លែងសម្រាប់ដាក់ជូនសាធារណៈជនប្រើប្រាស់ដោយអត់បង់ប្រាក់។
លោកបន្តថា៖បង្គន់សាធារណៈទាំង១២កន្លែងនោះរួមមាននៅមុខវត្តបទុមវត្តីមានចំនួនពីរកន្លែងគឺនៅសួនកុមារចំនួន១០បង្គន់នៅមុខកន្លែងលក់នំបញ្ចុកចំនួន២០បង្គន់។នៅសួនក្រមង៉ុយមុខសណ្ឋាគារកាំបូឌីយ៉ាណាចំនួន១០បង្គន់ក្នុងខណ្ឌដូនពេញ។នៅតំបន់កំពង់ដអរិយក្សត្រចំនួន១៨បង្គន់។នៅខាងលិចរង្វង់មូលសម្ដេចជួនណាតចំនួន៦បង្គន់។
នៅបញ្ជរទេសចរណ៍មុខព្រះបរមរាជវាំងចំនួន២០បង្គន់ក្នុងខណ្ឌដូនពេញ។នៅសួនច្បារជាប់ក្រសួងការពារជាតិជាប់ក្ដាន់២ចំនួន៦បង្គន់ក្នុងខណ្ឌ៧មករា។នៅសួនច្បារកុមារវត្តភ្នំចំនួន១០បង្គន់ក្នុងខណ្ឌដូនពេញ។នៅបេនឡានក្រុងឬទីលានប្រជាធិបតេយ្យខណ្ឌឬស្សីកែវក្នុងខណ្ឌប្ញស្សីកែវចំនួន១៥បង្គន់។
នៅសួនព្រះនាងប្រាជ្ញាបារមីតំបន់ជ្រោយចង្វារខាងកើតចំនួន១៥បង្គន់ក្នុងខណ្ឌជ្រោយចង្វារ។នៅទីលានប្រជាធិបតេយ្យចាស់ក្នុងខណ្ឌដូនពេញចំនួន៦បង្គន់។នៅក្រោយក្រសួងសាធារណៈការនិងដឹកជញ្ជូនជាប់នឹងស្ថានទូតអាមេរិកជាមួយនឹងសួនច្បារយាយពេញក្នុងខណ្ឌដូនពេញចំនួន២បង្គន់។ដែលបង្គន់ទាំងនេះមានលក្ខណៈទំនើបនិងមានអនាម័យ។
លោកសំសាមុតបានបញ្ជាក់ទៀតថា៖ចំពោះការងារថែទាំសួនច្បារនិងបង្គន់អនាម័យនៅទីសាធារណៈទាំងអស់នេះគឺស្ថិតនៅក្រោមការមើលថែទាំពីកម្មករនៃមន្ទីរសាធារណការនិងដឹកជញ្ជូនរាជធានីភ្នំពេញ ហើយអ្នកចូលបង្គន់ទាំងនេះ គឺមិនតម្រូវឱ្យមានការបង់ប្រាក់ទេ ។
លោកក៏បានបញ្ជាក់ផងដែរថា៖បញ្ហាប្រឈមដែលជាការលំបាកដល់បងប្អូនកម្មករមើលថែបង្គន់សាធារណៈខ្លាំងជាងគេនោះមានបង្គន់២កន្លែងគឺនៅកំពង់ដអរិយក្សត្រ១កន្លែងនិងនៅមុខវត្តបុទុមវតីមួយកន្លែង។ដោយសារតែមានបងប្អូនប្រជាពលរដ្ឋមួយចំនួនដែលគាត់ផឹកស្រាស្រវឹងពួកគាត់បានចូលទៅក្អួតពាសវាលពាសកាលពេញបង្គង់ដែល តម្រូវឱ្យកម្មករធ្វើការបោះសម្អាតឡើងវិញ។
លោកសំសាមុតក៏បានធ្វើការអំពាវនាវឱ្យបងប្អូនប្រជាពលរដ្ឋទាំងអស់ដែលប្រើប្រាស់បង្គន់អនាម័យសាធារណៈត្រូវចូលរួមថែទាំសម្អាតបរិស្ថានទាំងអស់គ្នា។ជាពិសេសបងប្អូននារីមួយចំនួនសូមកុំយកសំឡីអនាម័យបោះចូលក្នុងចានបង្គន់នាំឱ្យស្ទះនិងបុរសៗកុំនាំគ្នាជក់បារីក្នុងបង្គន់នាំឱ្យធុំក្លិនបារី៕S/
