ភ្នំពេញៈ កញ្ញា តន់ ចន្ទសីម៉ា ដែលត្រូវបានមហាជនស្គាល់នាងលើកម្មវិធី The Voice of Cambodia រដូវកាលទី២ និងជាតារាប្រចាំផលិតកម្ម កាឡាក់ស៊ីបានប្រកាសស្វែងរកស្ត្រី ក្រីក្រចិញ្ចឹមកូនយ៉ាងវេទនា ដើម្បីជួយឧបត្ថម្ភ ខណៈនាងមិនអាចទប់អារម្មណ៍មើលនឹងភ្នែកបានឡើយ។
ក្រោយពីមានព័ត៌មានចេញពីហ្វេសប៊ុកមួយឈ្មោះថា Standard Livingបានបង្ហោះរឿងរ៉ាវដ៏គួរឲ្យរំជួលចិត្តមួយបន្ទាប់ពីជួបក្មេងៗគ្រួសារក្រីក្រខ្សត់មួយមកសុំឆ្អឹងត្រីយកទៅប្រឡាក់ជាមួយអំបិលអាំងហូបជាមួយបាយ ឃើញហើយពិតជាសង្វេគចិត្តមែនទែន។
គណនេយ្យខាងលើបានឲ្យដឹងបែបនេះថា “មិញហ្នឹងខ្ញុំទប់ទឹកភ្នែកមិនបានហួសចិត្តពេក គាត់ទៅសុំឆ្អឹងត្រីដែលមិត្តខ្ញុំបេះយកសាច់ធ្វើទឹកគ្រឿង ហើយសល់ឆ្អឹងនិងសាច់តិចៗ ស្មានតែគាត់យកទៅណា លោកអើយលោក ខ្ញុំឱ្យមិត្តទៅមើលហើយក៏ខលទៅមើលឃើញ ខ្ញុំក៏អួលដើមក យកទៅនាំកូនហូបបាយជាមួយឆ្អឹងត្រីនិងអំបិលម្ទេស។ ខ្ញុំក៏សម្រេចប្រាប់រឿងរកការជួយដល់គាត់ និយាយជាមួយគាត់ ហើយរំភើបឡើងយំ សូមបងប្អូនជួយគាត់ផង ”។
បើតាមគណនីហ្វេសប៊ុកដដែលបានឲ្យដឹងទៀតថា គាត់ជាស្ត្រីមេម៉ាយ ហើយត្រូវចិញ្ចឹមកូនតូចៗ១០នាក់ រកអង្ករហូបស្ទើរគ្មានម្តងៗ រស់នៅភូមិខ្នា ឃុំក្រទួត ស្រុកស្វាយក្រៅខេត្ត សៀមរាប។ មានអ្នកលេងបណ្តាញសង្គមហ្វេសប៊ុកចាប់អារម្មណ៍ស៊ែរចែកចាយដោយក្តុកក្តួលពេលឃើញរូបថតជាច្រើនសន្លឹក និងរូបភាពកម្សត់របស់គ្រួសារក្រីក្រមួយនេះ ដោយក្រសឹងតែគ្មានអ្វីទទួលទាននិងដើរសុំឆ្អឹងត្រីសល់ពីគេបោះចោលមកចែកគ្នាទទួលទាន គួរឱ្យសង្វេគណាស់។
ជាមួយគ្នានោះ តារាចម្រៀងស្រីមានប្រជាប្រិយក្រោមទ្រនំផលិតកម្ម កាឡាក់ស៊ីណាវ៉ាត្រា របស់ឧកញ៉ាវ័យក្មេងចិត្តសប្បុរស ឡេង ណាវ៉ាត្រា និងត្រូវអ្នកគាំទ្រស្គាល់ច្បាស់ម្ចាស់បទ “គេនោះជាស្រីកាប់ដាវ” កញ្ញា តន់ ចន្ទសីម៉ា ក៏មិនអាចឃាត់ចិត្ត ទប់អារម្មណ៍ដ៏សែនស្រណោះចំពោះរូបភាពឥតកាឡៃនេះ បានចេញសារប្រកាសផ្ដល់នូវទឹកចិត្តខ្លួន តាមរយៈការជូនថវិកានិងគ្រឿងឧបភោគបរិភោគ។
តារាចម្រៀងរូបនេះបានប្រកាសរកស្ត្រីខាងលើកាលពីថ្ងៃទី៦ ខែមករា ឆ្នាំ២០២០ ឱ្យដឹងថា “នាងខ្ញុំ តន់ ចន្ទសីម៉ា សូមចែករំលែកក្តីស្រឡាញ់និងសុំចូលរួមចំណែកជួយគ្រួសាររបស់គាត់នូវ អង្ករ១តោន ត្រីខ១០យួរ មី៣០កេស និងថវិកា២០ម៉ឺនរៀល។ សូមបងប្អូនជួយ Share ជូនដំណឹងឱ្យគាត់ដឹងផង នាងខ្ញុំព្រមទាំងក្រុមការងារនឹងចាត់ចែងយកជូនពួកគាត់ឬផ្តល់ លេខទូរស័ព្ទគាត់ដើម្បីឱ្យនាងខ្ញុំទាក់ទងទៅ”។
សូមបញ្ជាក់ថា តារាចម្រៀងមកពីក្រុងដូនកែវ ខេត្តកែវ តន់ ចន្ទសីម៉ា បានហក់ចូលប្រឡូកក្នុងវ័ស័យសិល្បៈកាលពីអំឡុង ឆ្នាំ២០១៦ ខណៈ ឆ្នាំ២០១៧ នាងបានចូលរួមប្រកួតក្នុងកម្មវិធីធំមួយរហូតទទួលបានការគាំទ្រច្រើន។ កាន់តែល្បីឈ្មោះនោះគឺក្រោយពីនាងបានបោះជំហានចូលច្រៀងក្នុងផលិតម្ម Galaxy Navatra ខណៈដែលបទថ្មីៗរបស់នាងត្រូវបានសម្រិតសម្រាំង និងអ្នកនិពន្ធល្បីឈ្មោះលោក យឹម តាស្រង់។
សូមរំលឹកថា កញ្ញា តន់ ចន្ទសីម៉ា មុននឹងឈានមកដល់តារាចម្រៀងល្បីនោះរូបនាងបានជួបនូវរឿងរ៉ាវជីវិតជូរចត់ ភាពលំបាកលំបិនជាច្រើន។ នាង ធ្លាប់មានប្រវត្តិដើរដាក់ពាក្យប្រឡងចម្រៀង ជាច្រើននិងបានដើរសុំគេឡើងច្រៀងនៅតាម កម្មវិធីនាពេលរាត្រីគ្មានពេលសម្រាក គ្រប់គ្រាន់ មកដល់ផ្ទះវិញយប់ជ្រៅគឺដើម្បីរកប្រាក់ទ្រទ្រង់ជីវភាពគ្រួសារ និងបង់ថ្លៃផ្ទះជួល តូបមួយទៀត៕ ដោយៈ បូរិន/Ha
