ដោយ: សុខាភ័ណ្ឌ / កំពង់ស្ពឺ: មន្ត្រីនគរបាលប៉ុស្តិ៍ឃុំរស្មីសាមគ្គីម្នាក់បានស្លាប់ខណៈដែលជិះម៉ូតូបុកពីក្រោយរថយន្ត ហើយដួលនៅត្រង់ចំណុចមុខវត្តអាញ្ញៀសេះ ស្ថិតក្នុងភូមិអូរនាងហីង ឃុំតាំងក្រូច ស្រុកសំរោងទង ខេត្តកំពង់ស្ពឺ តាមបណ្តោយផ្លូវជាតិលេខ៤៤ចន្លោះគីឡូម៉ែត្រលេខ១៨-១៩ កាលពីរសៀលថ្ងៃទី៨ខែមករាឆ្នាំ២០២០។
មន្ត្រីនគរបាលស្រុកសំរោងទងបានឲ្យដឹងថា មន្ត្រីនគរបាលដែលរងគ្រោះថ្នាក់ដួលម៉ូតូបណ្តាលឲ្យស្លាប់នេះ មានឈ្មោះ ស៊ុត អាន ភេទប្រុសអាយុ៥៤ឆ្នាំ ជាមន្ត្រីនគរបាលប៉ុស្តិ៍ឃុំរស្មីសាមគ្គីរស់នៅភូមិយ៉ាងពីស ឃុំសង្កែសាទប ស្រុកឱរ៉ាល់
ខេត្តកំពង់ស្ពឺ ជិះម៉ូតូមួយគ្រឿងម៉ាកហុងដាពណ៌ខ្មៅសេ១២៥សេរី២០១៨ម្នាក់ឯង ពីលិចទៅកើត លុះមកដល់ចំណុចកើតហេតុខាងលើ បានបុករថយន្តមួយគ្រឿងមិនស្គាល់ម៉ាក និងមិនស្គាល់អត្តសញ្ញាណអ្នកបើកបរ ដែលធ្វើដំណើរស្របគ្នាចំពីក្រោយពេញទំហឹង ដួលម៉ូតូបណ្តាលឲ្យបោកក្បាលស្លាប់ភ្លាមៗ។
ប្រភពបានបន្តថា ក្រោយពីកើតហេតុអ្នកបើកបររថយន្តបានបន្ថែមល្បឿនរត់គេចខ្លួនបាត់ស្រមោល។
សពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ហើយមន្ត្រីជំនាញបានបន្តស្រាវជ្រាវ៕ ល