ដោយៈ មេសា/ភ្នំពេញៈ នៅថ្ងៃទី០៩ ខែមករា ឆ្នាំ២០២០ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន យុវនីតិសម្បទា បានជួបពិភាក្សាការងារជាមួយ លោកស្រី សាស្ត្រាចារ្យ បណ្ឌិត វីដា វណ្ណច័ន្ទ សាស្ត្រាចារ្យរង នៃ សកលវិទ្យាល័យញ៉ូវយ៉ក សហរដ្ឋអាមេរិក និង សាកលវិទ្យាល័យ Cornell និងប្រតិភូនិស្សិតជាច្រើនរូបទៀត ដើម្បីផ្លាស់ប្តូរបទពិសោធន៍ ៤ ចំណុចក្នុងវិស័យសង្គមកិច្ចរួមមាន៖
១. ការងារកិច្ចគាំពារកុមារ ផ្តោតលើ ច្បាប់យុត្តិធម៌អនីតិជន អនុសញ្ញាស្តីពីសិទ្ធិកុមារ អនុក្រឹត្យស្តីពីការគ្រប់គ្រងមណ្ឌលថែទាំកុមារ គោលនយោបាយថែទាំជំនួសចំពោះកុមាររបបគោលនយោបាយឧបត្ថម្ភកុមាររស់នៅក្នុងមជ្ឈមណ្ឌល។
២. ការងារកិច្ចគាំពារយុវជន សំដៅលើការគ្រប់គ្រង មជ្ឈមណ្ឌលជាតិស្តារនីតិសម្បទាអ្នកញៀនគ្រឿងញៀនដែលមានទីតាំង ៨ កន្លែងកំពុងជួយដល់ស្តារនីតិសម្បទាអ្នកញៀនគ្រឿងញៀន និងថ្មីៗនេះបានសាងសង់រួចរាល់មជ្ឈមណ្ឌលនៅកែវផុសមួយទៀត។ គិតត្រឹមខែកញ្ញា ឆ្នាំ២០១៩ មានជនរងគ្រោះ កំពុងទទួលសេវាស្តារនីតិសម្បទាចំនួនប្រមាណ ៣.៤២៤នាក់ (ស្រី ១៥១ នាក់ )។
៣. ការងារកិច្ចគាំពារមនុស្សចាស់ ផ្តោតទៅលើ គោលនយោបាយជាតិស្តីពីមនុស្សវ័យចាស់២០១៧-២០៣០ បង្កើតសមាគមមនុស្សតាមបណ្តាឃុំ-សង្កាត់។
៤. ការងារកិច្ចគាំពារប្រជាជនក្រីក្រ ដោយពិភាក្សាពីការផ្តល់ជំនួយសង្គ្រោះបន្ទាន់ និងសម្ភារផ្សេងៗ ដល់ប្រជាជនរងគ្រោះ និងងាយរងគ្រោះ កម្មវិធីឧបត្ថម្ភសាច់ប្រាក់ដល់ស្ត្រីមានផ្ទៃពោះ និងកុមារក្រោមអាយុ២ឆ្នាំ ក្នុងគ្រួសារក្រីក្រ។
លោក វង សូត បានបញ្ជាក់ថា កើតចេញពីបាតដៃទទេ ក្រោយថ្ងៃ៧មករា ធ្វើឲ្យប្រទេសជាតិកែប្រែមុខមាត់ថ្មីជាបន្តបន្ទាប់ ប្រទេសមានសុខ សន្តិភាព ស្ថិរភាពសង្គម សន្តិសុខស្បៀង និងកំណើន សេដ្ឋកិច្ច ជាមធ្យម ៧ភាគរយក្នុងមួយឆ្នាំៗ ដែលធ្វើឲ្យ ការវិវឌ្ឍន៍រីកចម្រើនប្រែមុខមាត់ថ្មីជាបណ្តើរ សាកសមជា ប្រទេសមានឯករាជភាព អធិបតេយ្យភាព សាមគ្គីភាព បង្រួបបង្រួមជាតិ និងបូរណភាពទឹកដីទាំងនៅក្នុងតំបន់ និងលើឆាកអន្តជាតិ ។
ទិវាជ័យជំនះ ៧ មករា គឺដើម្បី រំលឹកដល់ថ្ងៃដែលគណបក្សប្រជាជនកម្ពុជា បានរំដោះ ប្រទេសជាតិឲ្យរួចផុតពីរបបប្រល័យពូជសាសន៍ ហើយព្រឹត្តិការណ៍ជាប្រវត្តិសាស្ត្រនេះគឺជា សក្ខីភាពមួយ បង្ហាញអំពីស្មារតីគោរពដឹងគុណដ៏ជ្រាលជ្រៅបំផុត ចំពោះកម្មាភិបាល និងប្រជាជន ដែលបានតស៊ូពុះពារធ្វើពលិកម្មប្រកបដោយវីរភាពដ៏អង់អាចក្លាហានដើម្បីឯករាជ្យ សន្តិភាព សេរីភាព អធិប តេយ្យភាព បូរណភាពទឹកដី និងវឌ្ឍនភាពនៃមាតុភូមិកម្ពុជា ៕ Kh
