ដោយៈមុនីរ័ត្ន/ភ្នំពេញៈកាលពីរសៀលថ្ងៃទី៩ខែមករា សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអនុញ្ញាតឲ្យប្រតិភូ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) ចូលជួបសម្ដែងការគួរសម នៅទីស្ដីការក្រសួងមហាផ្ទៃ។ប្រតិភូស.ស.ស.ក ដឹកនាំដោយលោក ហ៊ុយ វណ្ណៈ ជាប្រធាន និងមានសមាជិក ចំនួន៣៣នាក់ ចូលរួម។
ក្នុងជំនួបដ៏វិសេសវិសាលនេះ លោក ហ៊ុយ វណ្ណៈ បានជម្រាបជូនសម្ដេចក្រឡាហោម ស ខេង អំពីភាពរីកចម្រើនរបស់ ស.ស.ស.ក ក្នុងរយៈពេលមួយអាណត្តិកន្លងទៅ និងវឌ្ឍនភាពថ្មីៗមួយចំនួនទៀត។ លោក បានស្នើសុំសម្ដេចក្រឡាហោម ស ខេង នូវសម្ភារការិយាល័យមួយចំនួន សម្រាប់បម្រើការងារឲ្យប្រចាំថ្ងៃ។
ជាការឆ្លើយតប សម្ដេចក្រឡាហោម ស ខេង បានអរគុណដល់ស.ស.ស.ក សម្រាប់កិច្ចខិតខំប្រឹងប្រែង និងបានឧបត្ថម្ភ សម្ភារការិយាល័យរួមមាន កុំព្យូទ័រ, ព្រីនធ័រ និងសម្ភារមួយចំនួនទៀត ដើម្បីបម្រើឲ្យការងារប្រចាំថ្ងៃ របស់ ស.ស.ស.ក ដែលគិតជាទឹកប្រាក់ ជិតបីម៉ឺនដុល្លារ។ បន្ថែមពីនេះ សម្ដេចក្រឡាហោម ស ខេង ក៏បានសន្យាបន្ដឧបត្ថម្ភ ថវិកាប្រចាំខែក្នុងមួយខែប្រាំលានរៀល ដូចអាណត្តិកន្លងទៅ។
សូមបញ្ជាក់ថា សហភាពសហព័ន្ធអ្នកសារព័ត៌មានកម្ពុជា ត្រូវបានបង្កើតឡើងដោយ ការរួមដៃគ្នារវាងអ្នកកាសែត និងអតីតអ្នកកាសែត ដែលមានបទពិសោធន៍ បំរើការងារនៅស្ថាប័នជាតិ និងអន្តរជាតិផ្សេងៗគ្នា ដូចជាវិទ្យុ ទូរទស្សន៍ កាសែតបោះពុម្ព និងកាសែតអនឡាញ (Online) ដែលមានមូលដ្ឋាន នៅក្នុងព្រះរាជាណាចក្រកម្ពុជា។
ស.ស.ស.ក ចាប់បដិសន្ធិនៅថ្ងៃទី៨ ខែសីហា ឆ្នាំ២០១៦ ដោយមានសមាជិកស្ថាបនិកដំបូង ២០រូប ទីប្រឹក្សា ១០រូប និងប្រធានគណៈកម្មការចំនួនប្រាំបួនរូប សុទ្ធសឹងជាអ្នកដឹកនាំផ្នែកសារព័ត៌មាន។
លោក ហ៊ុយ វណ្ណៈ បានបន្ដជាប់ឆ្នោតជាប្រធានស.ស.ស.កសម្រាប់អាណត្តិទី២ ដោយសំឡេងបោះឆ្នោត ២០ លើ២០។ ពិធីបោះឆ្នោតនេះ ត្រូវបានធ្វើឡើងនៅព្រឹកថ្ងៃទី១២ ខែតុលា ឆ្នាំ២០១៩ ក្នុងសមាជលើកទី២ អាណត្តិថ្មី ដឹកនាំការងាររយៈពេលបីឆ្នាំ បន្តឆ្នាំ២០១៩-២០២២ នៅអគារសេរីភាព តំបន់អភិវឌ្ឍន៍ថ្មី ជ្រោយចង្វា៕សរន
