ដោយ៖រ៉ាម៉ន/ភ្នំពេញ៖រាជធានីភ្នំពេញក្រោមការដឹកនាំរបស់លោកឃួងស្រេងអភិបាលរាជធានីភ្នំពេញ បានសម្រេចឱ្យមានការដាក់អំពូលភ្លើងសឡាតាមដងផ្លូវក្នុងសង្កាត់កន្ទោកនិងសង្កាត់បឹងធំ ខណ្ឌកំបូលដើម្បីបង្កភាពងាយស្រួលឱ្យប្រជាពលរដ្ឋក៏ដូចជាបងប្អូនកម្មករកម្មការនីធ្វើដំណើរបានស្រួលនៅពេលយប់និងដើម្បីទប់ស្កាត់បទល្មើសលួច ឆក់ ប្លន់ផងដែរ។
មន្ត្រីបានឱ្យដឹងថា៖ដើម្បីឱ្យដំណើរការនៃការដាក់អំពូលភ្លើងបំភ្លឺសាធារណៈនេះដំណើរការទៅដោយរលួននិងអាចទទួលយកបានកាលពីរាត្រីថ្ងៃទី៨ខែមករាឆ្នាំ២០២០លោកឃឹមស៊ុនសូដាអភិបាលខណ្ឌកំបូលរួមជាមួយលោកស្រីអភិបាលរងមន្ត្រីសាលាខណ្ឌព្រមទាំងលោកចៅសង្កាត់កន្ទោកនិងសង្កាត់បឹងធំបានចុះពិនិត្យមើលការដាក់អំពូលសឡាតាមដងផ្លូវនេះនៅក្នុងភូមិថ្មដាសង្កាត់កន្ទោកនិងភូមិព្រៃរមាសទី១និងទី២សង្កាត់បឹងធំ។
មន្ត្រីរដ្ឋបាលខណ្ឌកំបូលបានបញ្ជាក់ថា៖នេះជាការដូមួយដែលផ្តល់ជូនដោយ លោកឃួង ស្រេង អភិបាលរាជធានីភ្នំពេញដើម្បីឱ្យបងប្អូនប្រជាពលរដ្ឋនិងបងប្អូនកម្មករកម្មការនីងាយស្រួលក្នុងការធ្វើដំណើរនាពេលយប់និងម្យ៉ាងវិញទៀតដើម្បីទប់ស្កាត់បទល្មើសលួច ឆក់ ប្លន់នៅពេលយប់ផងដែរ។
ជាការឆ្លើយតបបងប្អូនប្រជាពលរដ្ឋបានសំដែងការសប្បាយរីករាយនិងបានថ្លែងអំណរគុណយ៉ាងជ្រាលជ្រៅចំពោះលោកឃួងស្រេងអភិបាលរាជធានីភ្នំពេញដែលតែងតែយកចិត្តទុកដាក់អំពីតម្រូវការនៃការរស់នៅរបស់ពួកគាត់ ទាំងលើការធ្វើដំណើរនិងបញ្ហាសន្តិសុខ៕S/
