ភ្នំពេញៈ បុរសម្នាក់ត្រូវបានគេបាញ់សម្លាប់នៅក្នុងភោជនីយដ្ឋាន ហេបភីណេស ស៊ុប និងខារ៉ាអូខេគ្រួសារ លើផ្លូវត្រសក់ផ្អែម (ផ្លូវ៦៣) សង្កាត់បឹងរាំង ខណ្ឌដូនពេញ កាលពីវេលាម៉ោងជាង ៤ ទៀបភ្លឺ ថ្ងៃទី៩ ខែមករា ឆ្នាំ២០២០នេះ។ បុរសរងគ្រោះនោះ ត្រូវបានអ្នកលេងហ្វេសប៊ុក និងអ្នកគាំទ្រវិស័យ ឌីជេ បានទម្លាយឱ្យដឹងថា ជនរងគ្រោះ គឺជាឌីជេដ៏ល្បីម្នាក់ ឈ្មោះ ឌីជេ មីនី (Dj Mini)។
ប្រភពព័ត៌មានបានបញ្ជាក់ថា បើតាមបុគ្គលិកដែលបានឃើញហេតុការណ៍នេះ បានអះអាងថា មុនពេលកើតហេតុ គេឃើញបុរសរងគ្រោះ និងបុរសម្នាក់ទៀត ដែលជាជនដៃដល់បានជិះរថយន្តម៉ាកតូយ៉ូតា កាមរី (បាឡែន) មកជាមួយគ្នា ដើម្បីហូបស៊ុប ។ ពេលមកដល់ភោជនីយដ្ឋាន ជនរងគ្រោះបានដើរចូលក្នុងហាងអង្គុយនៅនឹងតុមុន ។ រីឯជនដៃដល់កំពុងចូលចតរថយន្តនៅខាងក្រៅ។ បន្ទាប់ពីចតរថយន្តរួច ជនដៃដល់បានដើរចូលមកក្នុងហាង ហើយបានទាញកាំភ្លើង ផ្អឹបសៀតផ្ការបស់ជនរងគ្រោះ ដោយបាញ់មួយគ្រាប់បណ្តាលឲ្យជនរងគ្រោះអង្គុយស្លាប់លើកៅអីតែម្តង។
បន្ទាប់ពីធ្វើសកម្មភាពបាញ់រួច ជនដៃដល់ក៏បានដើរចេញពីហាងដោយមានបុរសពីរនាក់ផ្សេងទៀតបើកម៉ូតូមួយគ្រឿងមកទទួល រួចហើយក្រុមជនសង្ស័យក៏បានបើកគេចខ្លួនបាត់។ ជនរងគ្រោះត្រូវបានគេស្គាល់អត្តសញ្ញាណថា ជា DJ Mini បម្រើការងារក្នុងក្លិបកម្សាន្តមួយ ហើយពេលនេះ រង់ចាំមន្ត្រីជំនាញធ្វើកោសល្យវិច័យសិន៕ ដោយៈ បូរិន/Ha
