ភ្នំពេញ៖ តារាសម្តែងល្បី ដែលមហាជនស្គាល់ថា ជាតួឆ្នាសឆ្នើម ក្នុងរឿងភាគខ្មែរច្រើននោះ អ្នកនាង សឿន ផានផាភួង បានបង្ហាញអាការមិនសប្បាយចិត្ត ស្ទើរតែដេកមិនលក់បក់មិនល្ហើយ ដោយសារតែការបាត់ហ្វេសប៊ុកផ្ទាល់ខ្លួន ដែលនាងប្រើរាល់ថ្ងៃ។
អ្នកនាង សឿន ផានផាភួង ដែលមានហ្វេសប៊ុក ប្រើរាល់ថ្ងៃ ឈ្មោះថា “PhaPhoung” ព្រមទាំងទំព័រហ្វេសបុករបស់នាងផងដែរ មានឈ្មោះដូចគ្នានោះ ត្រូវបាននាងប្រកាសថា មិនអាចប្រើ ឬលេងបានទៀតឡើយ ដោយសារតែមានមនុស្សលួចចូលប្រើ និងប្តូរលេខកូដ ធ្វើឱ្យនាងមិនអាចយកប្រើវិញ។
ការប្រកាសបាត់បង់ទាំងគណនី និងទំព័រហ្វេសប៊ុកទាំងពីរនេះ ធ្វើឱ្យនាងមិនស្រណុកចិត្តឡើយ ដោយបានឱ្យមិត្តភ័ក្តិ និងកូនៗរបស់នាង ជួយប្រកាសនូវដំណឹងនេះ ព្រោះព្រួយបារម្ភខ្លាចមានបញ្ហាអាក្រក់កើតឡើងដោយមិននឹកស្មាន។
អ្នកនាង សឿន ផានផាភួង បានប្រាប់រស្មីកម្ពុជា កាលពីថ្ងៃទី១០ ខែមករា ឆ្នាំ២០២០ ឱ្យដឹងថា ហ្វេសប៊ុករបស់នាង បានប្រើប្រាស់ អស់រយៈពេលជាច្រើនឆ្នាំមកហើយ ដែលធ្វើឱ្យនាងមានអារម្មណ៍សោកស្តាយណាស់ ព្រោះមានមនុស្សលួចចូលប្រើ ហើយប្តូរលេខកូដរបស់នាង ធ្វើឱ្យនាងមិនអាចប្រើប្រាស់លើទូរស័ព្ទផ្សេងទៀតបាន។ អ្វីដែលធ្វើឱ្យនាងព្រួយបារម្ភនោះ ខ្លាចជនអាក្រក់នោះ ប្រើប្រាស់ឈ្មោះរបស់នាងក្នុងផ្លូវអាក្រក់ណាមួយបង្កឱ្យប៉ះពាល់ដល់ នាង និងគ្រួសារ។ នេះជាមូលហេតុដែលធ្វើនាង កើតទុក្ខស្ទើរតែដេកលក់ ធ្វើការងារមិន ស្រណុកទាល់តែសោះ។
តារាស្រីឆ្នើមពូកែសម្តែងរូបនេះ បានប្រាប់ទៀតថា អ្វីដែលសោកស្តាយនោះទៀតនោះ គឺហ្វេសប៊ុកចាស់របស់នាងខំប្រើប្រាស់លេងរាប់ឆ្នាំ មានមនុស្សស្គាល់ច្រើន ហើយសូម្បីតែអ្នកដឹកនាំកម្មវិធី ឬផលិតករជាច្រើនទាក់ទងការងារតាមនេះបែរជាជួបរឿងអាក្រក់ប៉ះពាល់ការងាររបស់នាង។ ជាមួយគ្នានោះ ទាំងគណនី និងទំព័រហ្វេសប៊ុករបស់នាងសុទ្ធតែមានអ្នកគាំទ្រយ៉ាងច្រើន មិនគួរបាត់បង់ ហើយទៅបង្កើតថ្មីទៀតបែបនេះ។
អ្នកនាង សឿន ផានផាភួង ដែលម្តាយបង្កើតតារាល្បីកុមារី អាង សុជាតា (ឈូឈូ) បាន ញ្ជាក់ថា ប្រសិនបើហ្វេសប៊ុកចាស់របស់នាងមានបង្ហោះអ្វីប្លែកៗឬរឿងអ្វីចម្លែក អាក្រក់នោះ សូមជួយជូនដំណឹងមកនាងផង ហើយកុំទាន់កាត់សេចក្តីអ្វីផ្តេសផ្តាស ព្រោះអាចមនុស្សមិនល្អលេងក្នុងចេតនាណាមួយដើម្បីបំផ្លាញកេរ្តិ៍ឈ្មោះរូបនាង និងគ្រួសារ។ ហេតុដូច្នេះ អ្នកនាងសូមក្តីអាណិត គោរពស្រឡាញ់ ពីពុកម៉ែបងប្អូនទាំងអស់សូមបន្តការគាំទ្រលើរូបនាងទៀត ដើម្បីនាងមានកម្លាំងចិត្តបម្រើវិស័យសិល្បៈទៅមុខបានល្អប្រសើរ៕ ដោយ៖ បូរិន/Ha
