ដោយ: គង់ហេង / កំពង់ចាម: លោក អ៊ុន ចាន់ដា អភិបាលខេត្តកំពង់ចាមបានដឹកនាំមន្ត្រីជំនាញពាក់ព័ន្ធធ្វើដំណើរទៅកាន់ទីតាំងសំណើសុំផ្លូវលំប្រវែងប្រមាណ ៤.០០០ ម៉ែត្រ ស្ថិតក្នុងភូមិមេព្រីង ឃុំមេព្រីង ស្រុកបាធាយ នៅថ្ងៃទី ១០ ខែមករា ឆ្នាំ២០២០។ ប៉ុន្តែពិនិត្យលទ្ធភាពជាក់ស្តែង ទំនងជាពិបាកនឹងស្ថាបនាផ្លូវលំ ឬផ្លូវដីជូនប្រជាពលរដ្ឋធ្វើដំណើរខ្លាំងណាស់ គឺទីនោះជាតំបន់ជាប់បឹងទន្លេសាប នៅរដូវវស្សាទឹកលិចមានកម្ពស់ច្រើនម៉ែត្រ។
លោក ឃន ប្រុស នាយករដ្ឋបាលសាលាខេត្តកំពង់ចាមដែលអមដំណើរលោកអភិបាលខេត្តបានប្រាប់កាសែតរស្មីកម្ពុជានៅថ្ងៃទី ១១ មករាថា ទំនងជាគ្មានលទ្ធភាពសាងសង់ផ្លូវជូនតាមសំណើរបស់ប្រជាពលរដ្ឋបានទេ។ ដោយទីនោះ( ភូមិមេព្រីង) គឺនៅរដូវវស្សាទឹកលិចមានកម្ពស់ពី ប្រាំ ទៅ ប្រាំមួយ ម៉ែត្រឯនោះ។
លោកនាយកបានឲ្យដឹងទៀតថា ម្យ៉ាងទីនោះក៏នៅមិនមានប្រជាពលរដ្ឋរស់នៅ ដែលអាចចាត់ទុកជាភូមិបាននៅឡើយដែរ។ រូបភាពជារោងសម្រាប់ពួកគាត់ជាប្រជាពលរដ្ឋ ទៅធ្វើស្រែចម្ការនៅជាប់ទឹកដីខេត្តកំពង់ឆ្នាំង។
លោកបានបន្តថា ការចុះពិនិត្យផ្លូវនេះ គឺធ្វើឡើងតាមសំណើរបស់ប្រជាពលរដ្ឋភូមិមេព្រីង តាមរយ:ក្រុមប្រឹក្សាឃុំមេព្រីង ស្រុកបាធាយកាលពីខែវិច្ឆិកា ឆ្នាំ២០១៩ កន្លងទៅ៕ ល
