Home ព័ត៌មានជាតិ ក្រសួងសុខាភិប...

ក្រសួងសុខាភិបាលៈ សូម​ប្រុងប្រយ័ត្ន ៦ ចំណុច ចំពោះ​ជំងឺ​រលាក​សួត មិន​ស្គាល់​អត្តសញ្ញាណ

ដោយៈ មេសា​/ភ្នំពេញៈ បន្ទាប់ពី​ត្រូវបាន​រកឃើញ​ជំងឺ​រលាក​សួត​មួយ​ប្រភេទ​ដែល​គេ​មិនទាន់​ស្គាល់​អត្តសញ្ញាណ នៅ​ទីក្រុង​វូ​ហាន ខេត្ត​ហ៊ុយ​បេ ប្រទេស​ចិន មក ក្រសួងសុខាភិបាល នៃព្រះរាជាណាចក្រ​កម្ពុជា បានចេញ​សេចក្តីជូនដំណឹង​មួយ​ដោយ​សង្កត់ធ្ងន់ថា អ្នក​ដែលមាន​គម្រោង​ធ្វើដំណើរ​ទៅ ឬ ត្រឡប់​មកពី​ទីក្រុង​វូ​ហាន ខេត្ត​ហ៊ុយ​បេ ប្រទេស​ចិន ត្រូវ​ប្រុងប្រយ័ត្ន​ខ្ពស់ បើទោះបីជា​មិនទាន់មាន​ករណី​ជំងឺ​ប្រភេទ​ខាងលើនេះនៅ​ប្រទេស​កម្ពុជា​នៅឡើយ​ក៏ដោយ ហើយ​ក្រសួង​កំពុងតែ​តាមដាន​ដោយ​យកចិត្ត​ទុក​បំផុត នូវ​ស្ថានភាព​នៃ​ការកើតមាន​ករណី​ជំងឺ​រលាក​សួត​មិន​ស្គាល់​អត្តសញ្ញាណ ។ ប្រសិនបើ​លោកអ្នក មាន​រោគសញ្ញា​ដូចជា គ្រុនក្តៅ ក្អក និង​ពិបាក​ដកដង្ហើម ទាំង​ក្នុងអំឡុងពេលធ្វើដំណើរ ឬ​បន្ទាប់ពី​ការវិលត្រឡប់​មកពី​កន្លែង​ដែល​បាន​ជម្រាប​ខាងលើ សូម​ប្រញាប់​ទៅ​ជួប​វេជ្ជបណ្ឌិត នៅ​គ្រឹះស្ថាន​សុខាភិបាល​សាធារណៈ​ដែល​នៅ​ជិត​បំផុត​ភ្លា​ម និង​ប្រាប់​ព័ត៌មាន​ដល់​គ្រូពេទ្យ​អំពី​ប្រវត្តិ​នៃ​ការធ្វើដំណើរ និង​រោគសញ្ញា​របស់លោក​អ្នក ។​


​សេចក្តីជូនដំណឹង​ដដែល​នេះ បាន​រៀបរាប់ថា អ្នកជំងឺ​ដែល​ត្រូវបាន​រកឃើញ​នៅ​ប្រទេសចិន គឺ​អ្នកជំងឺ​មាន​រោគសញ្ញា ក្តៅខ្លួន ហើយ​អ្នកជំងឺ​ភាគច្រើន​គឺជា​ឈ្មួញ ជា​អ្នកលក់​ផ្ទាល់ និងជា​អ្នក​បម្រើសេវា​នៅក្នុង​ផ្សា​រលក់​គ្រឿង​សមុទ្ទ​មួយ​នៅក្នុង​ខេត្ត ហួ​ណាន ដែល​នៅក្នុង​ផ្សារ​នោះ ក៏មាន​សត្វព្រៃ​ខ្លះ​ត្រូវបាន​ដាក់លក់​ដែរ ហើយ​អ្នកវិទ្យាសាស្ត្រ​មិនទាន់​រកឃើញថា វា​អាច​ឆ្លង​ពី​មនុស្ស​ទៅ​មនុស្ស​នៅឡើយ​ទេ ហើយ​ពួកគេ​កំពុង​តាមដាន និង ប្រមូល​ភស្តុតាង ។​


​ដោយឡែក​នៅ​កម្ពុជា លោក​វេជ្ជបណ្ឌិត​សាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួងសុខាភិបាល បាន​ក្រើនរំឭក​ឱ្យ​សាធារណជន​យកចិត្តទុកដាក់​ប្រុងប្រយ័ត្ន​ខ្ពស់ ៦ ចំណុច​គឺ​៖


១. ចៀសវាង​ប៉ះពាល់​អ្នកជំងឺ​ផ្លូវដង្ហើម​ស្រួចស្រាល់ , ២. លាងដៃ​ដោយ​សាប៊ូ និង ទឹកស្អាតឱ្យបាន​ញឹកញាប់ ជាពិសេស​បន្ទាប់ពី​ប៉ះពាល់​ដោយផ្ទាល់​ជាមួយ​អ្នកជំងឺ ឬ បរិស្ថាន​ជុំវិញ​នោះ , ៣. ចៀសវាង​ប៉ះពាល់​ជិតស្និទ្ធ ឬទៅ​ទីផ្សារ​លក់​គ្រឿង​សមុទ្ទ ហួ​ណាន ឬ ទីផ្សារ ឬ កសិដ្ឋាន​ដែលមាន​សត្វ​រស់ ឬសត្វព្រៃ ឬ កន្លែង​ដែល​គេ​ដឹងថា​មាន​វីរុស​កំពុង​ចរាចរ ។ ចាំបាច់​ត្រូវ​លាងដៃ​ឱ្យ​ទៀងទាត់​មុនពេល និងបន្ទាប់ពី​ប៉ះពាល់​សត្វ ឬ វត្ថុ​ផ្សេងៗ​ដែល​អាចជា​ប្រភព​ចម្លង​មេរោគ , ៤. ប្រកាន់ខ្ជាប់​នូវ​អនាម័យ​ស្អាត និងសុវត្ថិភាព​ម្ហូបអាហារ​ល្អ ដូចជា​ពិសេស​អាហា​រដែ​ល​ចម្អិន​ឆ្អិន​ល្អ , ៥. អ្នកមាន​រោគសញ្ញា​ជំងឺ​ផ្លូវដង្ហើម​ស្រួចស្រាល់ ត្រូវ​ខ្ទប់មាត់ និង ច្រមុះ​នៅពេល​ក្អក ឬកណ្តាស់ ដោយ​កន្សែង ក្រមា ឬ ក្រដាស , ៦. ត្រូវប្រកាន់យក​នូវ​អនាម័យ​ដៃ​ស្អាត និងអនាម័យ​ផ្លូវដង្ហើម គឺ ខ្ទប់មាត់ និង ច្រមុះ​នៅពេល​ក្អក ឬ កណ្តាស់ លាងដៃ​បន្ទាប់ពី​ប៉ះពាល់​ទឹករំអិល​ផ្លូវ​ដកដង្ហើម និង រក្សា​ចម្ងាយ​ជាង​មួយ​ម៉ែត្រ ពី​អ្នកជំងឺ​ដែលមាន​រោគសញ្ញា​ផ្លូវ​ដកដង្ហើម​ស្រួចស្រាល់​ជាដើម ។​


​ចំពោះ​ចំណុច​ទី ៥ ពោលគឺ ការ​ខ្ទប់មាត់ ឬ ច្រមុះ នៅពេល​ក្អក ឬ កណ្តាស់ នោះ លោក​វេជ្ជបណ្ឌិត លី សូ​វ៉ាន់ អ្នកនាំពាក្យ​ក្រសួងសុខាភិបាល បាន​ក្រើនរំឭក​ជា​ញឹកញាប់​ថា មិនត្រូវ​ខ្ទប់មាត់ ឬ ច្រមុះ ដោយ​ដៃ​ឡើយ ពោលគឺ​ត្រូវ​ខ្ទប់​ដោយ​ក្រណាត់ ដូចជា​ក្រមា កន្សែង និង ក្រដាស​ជាដើម ប៉ុន្តែ​ប្រសិនបើ​មិនមាន​របស់​ទាំងនេះ​ទេ ក៏​មិនត្រូវ​ខ្ទប់មាត់ ឬ ច្រមុះ​ដោយ​បាតដៃ​ឡើយ គឺ​ត្រូវ​ក្អក ឬ កណ្តាស់​ដាក់​ដើមដៃ​វិញ ព្រោះ​ខ្ទប់មាត់ ឬ ច្រមុះ ដោយ​បាតដៃ ងាយ​នឹង​ចម្លង​មេរោគ​ទៅ​អ្នកដទៃ ដូចជា​ពេល​ចាប់ដៃ ពេល​ចាប់​កាន់​របស់របរ​ប្រើប្រាស់​រួម និង ពេល​ចាប់​កាន់​បង្កាន់ដៃ​បើកទ្វារ​ជាដើម ។​


​ក្រសួងសុខាភិបាល​អះអាង​ថា ក្រសួង​បានដាក់​ម៉ា​ស៊ី​ស្គែ​ន​នៅ​អាកាសយានដ្ឋាន​ភ្នំពេញ ,​ព្រះសីហនុ និង សៀមរាប និង បាន​ត្រៀម​បន្ទប់​សម្រាប់​ដាក់​អ្នកជំងឺ​ដាច់ដោយឡែក ហើយ​ក្រសួង​ក៏បាន​ក្រើនរំឭក​មន្ទីរ​សុខាភិបាល ទាំង ២៥ រាជធានី ខេត្ត ឱ្យ​ត្រៀមលក្ខណៈ​ជានិច្ច​សម្រាប់​ឆ្លើយតប ប្រសិនបើ​មាន​ករណី​សង្ស័យ ៕ Kh/Ha

លោក​វេជ្ជបណ្ឌិត លី សូ​វ៉ាន់ បង្ហាញ​ឱ្យ​ប្តូរ​ការ​ខ្ទប់មាត់ ឬ ច្រមុះ​ដោយ​បាតដៃ ទៅ​ក្អក​ដាក់​ដើមដៃ​វិញ ក្នុងករណី​គ្មាន​ក្រដាស ឬ ក្រណាត់​ខ្ទប់ ( រូបៈ មេសា )

កន្លែងពិនិត្យសុខភាពនៅអាកាសយានដ្ឋាន នៅកម្ពុជា ( រូបៈ ឯកសារ )

ទីតាំងផ្សាយពាណិជ្ជកម្ម

- Advertisment -

Most Popular

អភិបាលរងខេត្តកំពង់ឆ្នាំងដ...

ដោយ:ទេពកង្រី/កំពង់ឆ្នាំងៈ...

អាវុធហត្ថឃាត់ខ្លួនបុរសម្ន...

ដោយ:ទេពកង្រី/កំពង់ឆ្នាំងៈ...

អ្នកនាំពាក្យ​ក្រសួងសុខាភិ...

ដោយ: មុនីរ័ត្ន / ភ្នំពេញ:...

នាយកដ្ឋាន​ព័ត៌មានវិទ្យា រ...

​ដោយៈ មុនី​រ័ត្ន / ភ្នំពេ...