​ព្រឹត្តិការណ៍​ជាតិ ប្រចាំ​សប្តាហ៍​

ដោយ​: ម៉េង​ឆៃ / ភ្នំពេញ​: កាលពី​ថ្ងៃអាទិត្យ ទី​៥ ខែមករា ឆ្នាំ​២០២០ ប្រតិបត្តិ​ការរុករក​ជនរងគ្រោះ នៅ​គំនរ​អគារ​បាក់​រលំ នៅ​ខេត្ត​កែប ត្រូវបាន​បិទ​បញ្ចប់ បន្ទាប់ពី​សម្តេច​តេ​ជោ នាយករដ្ឋមន្ត្រី ហ៊ុន សែន បាន​ដឹកនាំ​ប្រតិបត្តិ​ការកាយ​គំនរ​អគារ​បាក់​រលំ ចាប់តាំងពី​ថ្ងៃទី​០៣ ខែមករា​។ តួលេខ​ចុងក្រោយ មាន​ជនរងគ្រោះ ស្លាប់ ៣៦ នាក់ និង​រងរបួស ២៣ នាក់​។ ចំពោះ​ហេតុ ការណ៍​នេះ បណ្តា​ស្ថានទូត​មួយចំនួន ប្រចាំ​នៅ​កម្ពុជា រួមមាន ស្ថានទូត​អាមេរិក ចិន អូស្ត្រាលី និង​អង្គការសហប្រជាជាតិ ជាដើម បាន​ផ្ញើ​សារ​ចូលរួម​រំលែក​ទុក្ខ ជូន​គ្រួសារ​ជន រងគ្រោះ ផងដែរ​។

​គណបក្ស​ប្រជាជន​កម្ពុជា ដែលជា​គណបក្សកាន់អំណាច នៅ​កម្ពុជា នៅ​ថ្ងៃទី​០៧ ខែមករា បានរៀបចំ​ធ្វើ​មហា​មិ​ទ្ទីង អបអរសាទរ​ខួប​អនុស្សាវរីយ៍ លើក​ទី​៤១ ទិវា​ជ័យជម្នះ ៧​មករា ឆ្នាំ​២០២០ ដោយមាន​អ្នកចូលរួម​រាប់ម៉ឺន​នាក់​។
​សម្តេច​អគ្គមហាសេនាបតី​តេ​ជោ ហ៊ុន សែន ប្រធាន​គណបក្ស​ប្រជាជន​កម្ពុជា និង​ជា​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បាន​រំលេច​នូវ​សារ​នយោបាយ​ជាច្រើន ក្នុងនោះ «​អរគុណ សន្តិភាព​» គឺជា​សារ​នយោបាយ​សំខាន់​ជាងគេ​។ សំខាន់​ជាងគេ ត្បិត​សន្តិភាព​នេះហើយ ជា​មូលដ្ឋានគ្រឹះ​នៃ​ការអភិវឌ្ឍន៍​សិទ្ធិមនុស្ស និង​លទ្ធិប្រជាធិបតេយ្យ​។ សម្តេច​តេ​ជោ ហ៊ុន សែន បាន​គូស​បញ្ជាក់ជូន​ជនរួមជាតិ​ថា «​មាន​សន្តិភាព គឺមាន​អ្វីៗ​ទាំងអស់​»​។
​ក្នុង​ពិធី​នេះ សម្តេច​តេ​ជោ ហ៊ុន សែន ក៏បាន​ប្រកាសថា រាជរដ្ឋាភិបាល​កម្ពុជា ការពារ​ដាច់ខាត​នូវ​ឯករាជ្យ អធិបតេយ្យ​ជាតិ ទោះ​ស្ថិតក្នុង​កាលៈទេសៈ និង​ស្ថានភាព​ណា​ក្តី​។​

​នៅ​ដើម​សប្តាហ៍​នេះ ក្រសួងមហាផ្ទៃ បានអនុញ្ញាត​ឲ្យ​ក្រុម​អតីត​ថ្នាក់ដឹកនាំ​នៃ​អតីត​គណបក្ស​សង្គ្រោះ​ជាតិ បង្កើត​គណបក្សនយោបាយ​ថ្មី​មួយ ឈ្មោះ គណបក្ស​ខ្មែរ​ស្រឡាញ់​ជាតិ​។ នេះ​ជា​របត់​ថ្មី​មួយទៀត​នៃ​វិថី​នយោបាយ​របស់​ក្រុម​អតីត​ថ្នាក់ដឹកនាំ​គណបក្សប្រឆាំង បន្ទាប់ពី​បានស្នើ​សុំ និង​ទទួលបាន​សិទ្ធិ​ធ្វើ​នយោបាយ​ឡើងវិញ​។​

​ក្រសួង​សាធារណការ និង​ដឹកជញ្ជូន កាលពី​ថ្ងៃទី​៧ ខែមករា បានដាក់​ឲ្យ​ដំណើរការ​ជា​ផ្លូវការ​លេខ​ចុះបញ្ជី​ពិសេស​ផ្ទាល់ខ្លួន សម្រាប់​រថយន្ត​។ ផ្លាកលេខ​ពិសេស​នេះ គឺ​ម្ចាស់​យានយន្ត អាច​កំណត់​អក្សរ ឬ​លេខ ទៅតាម​អ្វីដែល​ខ្លួន​ចង់បាន ហើយក៏​អាច​យក​ស្លាក​លេខ​នេះ ទុក​ប្រើប្រាស់​ពេញ​មួយជីវិត​ផងដែរ​។ ស្លាក​លេខ​ពិសេស​ផ្ទាល់ខ្លួន​នេះ មានតម្លៃ​ចាប់ពី ប្រាំ​លាន​រៀល រហូតដល់ ១.០០០ លាន​រៀល ហើយក៏​ទទួលបាន​នូវ​ការគាំទ្រ និង​ការរិះគន់​ផងដែរ​។​

​កាលពី​ថ្ងៃទី​៨ ខែមករា អ្នកនាំពាក្យ​ក្រសួង​កាបរទេស និង​សហប្រតិបត្តិការ​អន្តរជាតិ​កម្ពុជា បានចេញ​ថ្លែងការណ៍​ផ្ទាល់មាត់ ជុំវិញ​សភាពការណ៍​ដ៏​តានតឹង​នៅ​ម​ជ្ឈឹ​ម​បូព៌ា រវាង​អាមេរិក និង​អ៊ីរ៉ង់​។ កម្ពុជា បានបង្ហាញ​ក្ដីបារម្ភ និង​អំពាវនាវ​ឲ្យ​គូ​ជម្លោះ បន្ថយ​ការប្រឈមមុខ​ដាក់គ្នា​ហើយ​ឈានទៅ​បើក​កិច្ចចរចា​។​

​នៅក្នុង​សប្តាហ៍​នេះ ធនាគារជាតិ​នៃ​កម្ពុជា បាន​ព្យាករ​ថា កំណើនសេដ្ឋកិច្ច​របស់​កម្ពុជា នៅតែ​រឹងមាំ នៅ​ឆ្នាំ​២០២០​នេះ​។ នោះ​គឺ​កំណើនសេដ្ឋកិច្ច​កម្ពុជា នៅតែ​រក្សាបាន ក្នុង​អត្រា​មធ្យម ៧ ភាគរយ ជាមួយនឹង​អត្រា​អតិផរណា ២,៣ ភាគរយ ក្នុង​ឆ្នាំ​២០២០​នេះ​។ ក្នុងនោះ ទោះបី​សហភាព​អឺរ៉ុប អាច​សម្រេចចិត្ត​ដក EBA ពី​កម្ពុជា នៅ​ខែកុម្ភៈ ឆ្នាំ​២០២០ ក៏ដោយ ក៏​ការនាំចេញ​សម្លៀកបំពាក់​ពី​កម្ពុជា ត្រូវបាន​រំពឹងថា នឹង​កើនឡើង​ដដែល​។​

​កាលពី​ថ្ងៃទី​០៩ ខែមករា សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​អំពាវនាវ​ឲ្យ​មន្ត្រីរដ្ឋបាល​ថ្នាក់ក្រោម​ជាតិ​ទាំងអស់ ត្រូវមាន​ភាពជា​ម្ចាស់ និង​ចូលរួម​កំណត់​ជោគវាសនា​ប្រទេសជាតិ ពោលគឺ​មិនមែន​ពឹងផ្អែក​តែ​លើ​មនុស្ស​មួយក្រុម​នៅ​ថ្នាក់លើ​នោះទេ​។ សម្ដេច​ក្រឡាហោម បាន​ថ្លែង​យ៉ាង​ដូច្នេះ នៅក្នុង​ឱកាស​ប្រារព្ធ​ទិវា​ជាតិ​៧​មករា​នៅ​ខេត្តបាត់ដំបង​។​

​ពិព័រណ៍​សៀវភៅ Big Bad Wolf Book ដែលជា​ពិព័រណ៍​សៀវភៅ​ធំជាងគេ​បំផុត នៅលើ​ពិភពលោក បានរៀបចំ​ធ្វើឡើង ជា​លើកដំបូង នៅ​កម្ពុជា កាលពី​ថ្ងៃទី​០៩​មករា​។ ពិព័រណ៍​សៀវភៅ​ដ៏​ធំ​នេះ បាន​នាំមក​នូវ​សៀវភៅ​ជា​ភាសា​អង់គ្លេស​ថ្មីៗ រហូតដល់ មួយ​លាន​ក្បាល​ឯណោះ មក​ដាក់លក់ និង​បញ្ចុះតម្លៃ រយៈពេល ១២​ថ្ងៃ ចាប់ពី​ថ្ងៃទី​០៩ ខែមករា​នេះ ដល់​ថ្ងៃទី​២០ ខែមករា​។

​កាលពី​ព្រឹក​ថ្ងៃទី​១០ ខែមករា ទីប្រឹក្សា​ពិសេស​អគ្គលេខាធិការ​អង្គការសហប្រជាជាតិ លោក ជែស​ហ្វ្រី សាត បាន​ចូលជួប​ពិភាក្សា​ការងារ​ជាមួយ​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា នៅ​វិមាន​សន្តិភាព​ក្នុង​រាជធានី​ភ្នំពេញ​។ ក្នុងឱកាស​នេះ លោក​ទីប្រឹក្សា បាន​សន្យា​ជួយ​អភិវឌ្ឍន៍​កម្ពុជា អោយមាន​ការអភិវឌ្ឍ​ន៍​ប្រកបដោយ​ចិ​រ​ភាព​។ ក៏ប៉ុន្តែ​លោក​ទីប្រឹក្សា​ពិសេស​អគ្គលេខាធិការ​អង្គការសហប្រជាជាតិ បាន​មើលឃើញថា បច្ចុប្បន្ន ប្រទេស​កម្ពុជា មានការ​អភិវឌ្ឍន៍​រួចទៅហើយ លើ​វិស័យសេដ្ឋកិច្ច និង​វិស័យ​ផ្សេងៗ​មួយចំនួនទៀត បើ​ប្រៀបធៀប​នឹង​អ្វីដែល​លោក​បានឃើញ​ផ្ទាល់​ភ្នែក កាលពី ១៥ ឆ្នាំមុន​។​

​អាកាសយានដ្ឋាន​អន្តរជាតិ​ភ្នំពេញ នៅ​ថ្ងៃទី​១០ ខែមករា បានរៀបចំ​ធ្វើ​លំ​ហាត់​សមយុទ្ធ ទ្រង់ទ្រាយ​ធំ​មួយ ក្រោម​ប្រធាន បទ «​ការសង្គ្រោះ​ចំណាប់ខ្មាំង​លើ​យន្តហោះ​» ។ សមយុទ្ធ​ប្រចាំ​ឆ្នាំនេះ មានការ​ចូលរួម​ពី​ស្ថាប័ន កងកម្លាំងប្រដាប់អាវុធ រួមមាន ទាំង​យន្តហោះ រថយន្ត​ពន្លត់​អគ្គិភ័យ រថយន្ត​ពេទ្យ និង​រថយន្ត​ដឹក​កងកម្លាំងប្រដាប់អាវុធ ។

​គិត​មកដល់ពេលនេះ ក្រសួង​សាធារណការ និង​ដឹកជញ្ជូន រកចំណូលបាន​ពី​ការចុះបញ្ជី​ផ្លាកលេខ​ជិត ១៦​លាន​ដុល្លារ កើនឡើង​ជាង ៥០​ភាគរយ​។ ចំណែក ផ្លាកលេខ​ពិសេស ដែល​ក្រសួង​ប្រកាស​លក់​រយៈពេល​បួន​ថ្ងៃ គិត​ចាប់ពី​ថ្ងៃទី​៧​មករា មាន​អ្នកទិញ​ជាង ៤០​ស្លាក ដោយ​ទទួលបាន​ចំណូល​ជាង ៩០០​លាន​រៀល​។​

​កាលពី​ថ្ងៃទី​១០ ខែមករា ក្រសួង​រៀបចំ​ដែនដី នគរូបនីយកម្ម និង​សំណង់ បានចេញ​សេចក្តីណែនាំ ពង្រឹង​ការអនុវត្ត​ច្បាប់ ស្តីពី​សំណង់ និង​លិខិតបទដ្ឋាន​គតិយុត្ត ពាក់ព័ន្ធ​ជា​ធរមាន ដល់​អាជ្ញា​ធរមាន​សមត្ថកិច្ច ក្នុង​វិស័យ​សំណង់ អគ្គនាយកដ្ឋាន​សំណង់ អគ្គនាយកដ្ឋាន​រៀបចំ​ដែនដី មន្ទីរ​រៀបចំ​ដែនដី គ្រប់​រាជធានី​-​ខេត្ត​។ ការចេញលិខិត​នេះ បន្ទាប់ពី​មាន​ករណី​បាក់​រលំ​អគារ​ជា​បន្តបន្ទាប់ នៅ​ខេត្ត​កែប និង​ខេត្ត​ព្រះសីហនុ បង្ក​ឲ្យ​មាន​អ្នកស្លាប់ និង​របួស​ជាច្រើន​នាក់​៕

ទីតាំងផ្សាយពាណិជ្ជកម្ម

- Advertisment -

Most Popular

រាជរដ្ឋាភិបាលថៃប្រកាសបន្ត...

ស្ថានទូតនៃព្រះរាជាណាចក្រក...

ប្រជាពលរដ្ឋ​ទីទ័លក្រ​នៅ​ក...

​ដោយ​: រិ​ទ្ធិ​សែន / ខេត្...

ជនសង្ស័យ​ម្នាក់ រួម​នឹង​វ...

​ដោ​យៈ រិ​ទ្ធិ​សែន / ពោធិ...

ប្រកាស​បិទ​ផ្សាយ ឯកសារ​កា...

​ដោយៈ ទេ​ពក​ង្រី / កំពង់ឆ...