Home បទវិភាគ/ទស្សនៈ កិច្ចព្រមព្រៀ...

កិច្ចព្រមព្រៀង​ពាណិជ្ជកម្ម​អាម៉េរិក​-​ចិន ជា​ជោគជ័យ​ចម្រុះ​សម្រាប់​ត្រាំ​

​ប្រធានាធិបតី​អាម៉េរិក ដូ​ណា​ល់ ត្រាំ ត្រូវ​ចុះហត្ថលេខា​លើ​កិច្ចព្រមព្រៀង​ពាណិជ្ជកម្ម​មួយ​ជាមួយ​ចិន​នៅ​ថ្ងៃ​ពុធ​ទី​១៥​មករា​ដែល​នឹង​អនុញ្ញាត​អោយ​លោក​ប្រ​​កាស​ជោគជ័យ​ធំ​មួយ តែ​វា​អាច​សំរេច​ឡើង​បាន​ក្រោម​ការបង់ថ្លៃ​ដ៏​ខ្ពស់​មួយ​បន្ទាប់​ពី​មាន​ការប្រឈមមុខគ្នា​អស់​ពេល​២​ឆ្នាំ​រវាង​មហាអំណាច​សេដ្ឋកិច្ច​ផុត​លេខ​​ទាំងពីរ​។

​អេ​វឺត អាល់​ដែន អ្នកជំនាញ​គោលនយោបាយ​ពាណិជ្ជកម្ម​នៅ​ក្រុមប្រឹក្សា​ស្តីពី​ទំនាក់ទំនង​បរទេស​បាន​និយាយថា «​បញ្ហាលំបាកៗ​រវាង​អាម៉េរិក​និង​ចិន​នៅតែ​​មាន​នៅឡើយ​»​តែ​លោក​បាន​ទទួលស្គាល់ថា «​ខាង​នយោបាយ វា​ល្អ​បន្តិច​ដែរ​សំរាប់​ត្រាំ​»​ដែល​កំពុង​ឈរឈ្មោះ​សំរាប់​តំណែង​ប្រធានាធិបតី​អាម៉េរិក​អាណត្តិ​ថ្មី​​នៅ​ឆ្នាំ​នេះ​។​

​អាល់​ដែន បាន​និយាយថា សេត​វិមាន​អាច​អួតអាង​ថា​វា​ជា​ការដាក់​លក្ខខណ្ឌ​ដ៏​ម៉ឺងម៉ាត់​លើ​ចិន និង​ថា​«​តាម​បច្ចេកទេស​លោក​បាន​សំរេច​កិច្ចព្រមព្រៀង​មួយ​»​ជា​អ្វីមួយ​ដែល​លោក​បាន​សន្យា​ចំពោះ​អ្នក​បោះឆ្នោត​កាលពី​ឆ្នាំ​២០១៦​។​

​យ៉ាងហោចណាស់ កិច្ចព្រមព្រៀង​នេះ​បាន​ធ្វើ​អោយ​ទីផ្សារ​មាន​លំនឹង​ឡើងវិញ ក្រោយពី​បាន​ស្ថិតក្រោម​ការ​គំរាម និង​ការ​វាយ​ពន្ធ​សង​ទៅ​សង​មក​នៅ​ឆ្នាំ​២០១៨​និង​២០១៩​។​វា​ពិតជា​នឹង​ជួយ​លោក​ត្រាំ​នៅក្នុង​ការធ្វើ​យុទ្ធនាការ​រក​សម្លេងឆ្នោត ពីព្រោះ​វា​ផ្តល់​កម្លាំង​ជំរុញ​មួយ​ដល់​សេដ្ឋកិច្ច​អាម៉េរិក​។​

​នៅពេល​ភាពមិនប្រាកដប្រជា​កាន់​តែ​រសាត់​បាត់ទៅ ពួក​អ្នកប្រើប្រាស់​នឹង​បង្កើន​ចំណាយ​ជាមួយ​នឹង​ជំនឿ​ចិត្ត រី​បណ្តា​ស្ថាប័ន​ជំនួញ​ក៏​អាច​ធ្វើ​ដំណើរ​ទៅមុខ​​លែង​សូវ​ភ័យខ្លាច​ដូច​ពីមុន​។​

ឧបនាយក​រដ្ឋមន្ត្រី​ចិន លោក លីវ ហឹ និង​ប្រធានាធិបតី​ត្រាំ ត្រូវ​រំពឹងថា​នឹង​ចុះហត្ថលេខា​លើក​កិច្ចព្រមព្រៀង​ពាណិជ្ជកម្ម​ជំហាន​ដំបូង​នៅ​ថ្ងៃ​១៥​មករា​

​សូម​រំលឹក​ថា កាលពី​ថ្ងៃ​ចូលឆ្នាំថ្មី លោក​ត្រាំ​បាន​ប្រកាស​ថា​លោក​នឹង​ចុះហត្ថលេខា​លើ​កិច្ចព្រមព្រៀង​ដំណាក់កាល​ពី​១​នៅ​ថ្ងៃ​១៥​មករា នៅ​សេត​វិមាន​។​ឥឡូវ​​ឧបនាយក​រដ្ឋមន្ត្រី​ចិន ដែល​បាន​ដឹកនាំ​ការចរចា​ពាណិជ្ជកម្ម​ជាមួយ​អាម៉េរិក បាន​ទៅដល់​ទីក្រុង​វ៉ាស៊ីនតោន​ដើម្បី​ការចុះហត្ថលេខា តែ​សេចក្តីលម្អិត​នៃ​​កិច្ចព្រមព្រៀង​នៅ​ជា​អាថ៌កំបាំង​នៅឡើយ​។​

​កាលពី​ថ្ងៃអាទិត្យ​ទី​១២​មករា រដ្ឋមន្ត្រី​រតនាគា​រ​អាម៉េរិកលោក ស្ទេ​វិន ម្នូ​ជីន បាន​ហៅ​វា​ថា​ជា​«​កិច្ចព្រមព្រៀង​ប្រវត្តិសាស្ត្រ​»​និង​ថា​«​វា​ជា​លើកដំបូង​ដែល​យើង​មាន​កិច្ចព្រមព្រៀង​ពិស្តារ​មួយ​ជាមួយ​ចិន​ស្តីពី​បញ្ហា​បច្ចេកវិទ្យា កសិកម្ម សេវា​ហិរញ្ញវត្ថុ និង​ការទិញ​។​វា​មាន​យន្តហោះ​ការ​អន្ត​វត្ត​ន៍​ច្បាប់​ជាក់ស្តែង​មួយ ដូច្នេះ​​វា​ជា​ជោគជ័យ​មួយ​សំរាប់​លោក​ប្រធានាធិបតី​»​។​

​សេត​វិមាន​ធ្លាប់បាន​និយាយ​ថា កិច្ចព្រមព្រៀង​រួមបញ្ចូល ការធ្វើអោយ​ប្រសើ​រលើ​លក្ខខណ្ឌ​ផ្ទេរ​បច្ចេកវិទ្យា ដែល​រដ្ឋាភិបាល​ក្រុង​ប៉េកាំង​ដាក់​លើ​បណ្តា​ក្រុមហ៊ុន​​បរទេស ព្រម​ទាំង​ការ​ចូល​ក្នុង​ទីផ្សារ​ចិន​កាន់តែ​ប្រសើរ​សំរាប់​សេវា​ហិរញ្ញវត្ថុ​។​

​យោង​តាម​អាម៉េរិក វា​ក៏​ចែងថា រដ្ឋាភិបាល​ក្រុង​ប៉េកាំង​នឹង​ទិញ​ផលិតផល​អាម៉េរិក​តំលៃ​២០០​ពាន់​លាន​ដុល្លារ​បន្ថែម​ក្នុងអំឡុងពេល​២​ឆ្នាំ ធៀប​នឹង​ឆ្នាំ​២០១៧ រួម​មាន​កសិផល​តំលៃ​៥០​ពាន់​លាន​ផងដែរ​។​

​ជា​ថ្នូរ​មក​វិញ រដ្ឋការ​ត្រាំ​បាន​បញ្ឈប់​ការយកពន្ធ​ពិន័យ​ថ្មី​លើ​ទំនិញ​ផលិត​នៅ​ចិន ដូច​ជា​គ្រឿង​អេឡិចត្រូនិក​និង​ទូរស័ព្ទ​ចល័ត ដែល​តាម​គំរោង​ត្រូវ​ចាប់​យក​កាល​​ពី​ខែ​មុន​។​អាម៉េរិក​ក៏​នឹង​កាត់បន្ថយ​ពន្ធ​ពាក់កណ្តាល​សំរាប់​ទំនិញ​តំលៃ​១២០​ពាន់​លាន​ដុល្លារ​ដែល​ខ្លួន​អនុវត្ត​យក​លើ​ទំនិញ​ចិន​កាលពី​ខែ​កញ្ញា​ឆ្នាំមុន​។​តែ​ពន្ធ​​គយ​ជា​ច្រើន​ទៀត​នៅ​រក្សាទុក​ដដែល ។​

​អ៊ី​ស​វ៉ា ប្រាសាត សាស្ត្រាចារ្យ​ខាង​គោលនយោបាយ​ពាណិជ្ជកម្ម​នៅ​សកល​វិទ្យាល័យ​ខន​នែ​ល និង​ជា​អ្នកជំនាញ​ខាង​កិច្ចការ​ចិន បាន​និយាយថា​កិច្ចព្រមព្រៀង​​នេះ​ជា​«​ជោគជ័យ​ចម្រុះ​មួយ​»​និង​វា​កើតចេញ​ពី​ការបង់ថ្លៃ​ខ្ពស់​គួរសម​មួយ​ដែរ​។​«​ត្រាំ​ទទួលបាន​សម្បទាន​ខ្លះ​ពី​ចិន និង​ដៃគូ​ពាណិជ្ជកម្ម​របស់​អាម៉េរិក​ខ្លះ តែ​​វា​បង្ក​ការខាតបង់​ធំ​គួរសម​មួយ​សំរាប់​សេដ្ឋកិច្ច​អាម៉េរិក និង​ការបាត់បង់​កេរ្តិ៍ឈ្មោះ​ជា​អន្តរជាតិ​របស់​អាម៉េរិក​ខ្លះ ក្នុងនាម​ជា​ដៃគូ​គួរអោយ​ទុកចិត្ត​និង​អាច​ពឹង​​ពាក់បាន​មួយ​»​។​

​សេដ្ឋកិច្ច​ចិន​រីកចំរើន​យឺត​ទៅ​មួយ​ផ្នែក​ដោយសារ​សង្គ្រាម​ពាណិជ្ជកម្ម​នេះ តែ​ផលិតកម្ម​ឧស្សាហកម្ម​និង​កសិករ​អាម៉េរិក​ក៏​រងគ្រោះ​។​បើ​គិត​អំពី​វិស័យ​កសិកម្ម​​រដ្ឋាភិបាល​ត្រាំ​បាន​ផ្តល់​ជំនួយ​២៨​ពាន់​លាន​ដុល្លារ​ដើម្បី​ជួយ​កសិករ​ក្នុងពេល​ប្រឈម​មុខ​ជាមួយ​ចិន​នៅ​ឆ្នាំ​២០១៨​និង​២០១៩​។​ផ្នែក​ផលិតកម្ម​ឧស្សាហកម្ម​អាម៉េរិក​បាន​ធ្លាក់​ចូល​ក្នុង​ឱនភាព​កាលពី​ខែ​សីហា​។​

​ស៊ូ ប៊ីន សាស្ត្រាចារ្យ​សេដ្ឋកិច្ច​និង​ហិរញ្ញវត្ថុ​នៅ​សាលា​ពាណិជ្ជកម្ម​មួយ​នៅ​ក្រុង​សៀង​ហៃ បាន​និយាយថា​ភាគី​ទាំងពីរ​អាច​ប្រកាស​ថា​ពួកគេ​សំរេច​បាន​កិច្ច​ព្រម​​ព្រៀង​មួយ​ដែល​«​អាច​ទទួលយកបាន តែ​មិនមែន​ជោគជ័យ​មួយ​ទេ​»​។​

​លោក​គិតថា ជម្លោះ​ពាណិជ្ជកម្ម​ចិន​-​អាម៉េរិក​នឹង​បន្ត​រាប់​ឆ្នាំ​ទៅ​ទៀត អាច​១០​ឆ្នាំ​ទៀត ២០​ឆ្នាំ​ទៀត​និង​ថែម​ទាំង​យូរ​ជាង​នេះ​ផង​ក៏​ថា​បាន​៕​ប្រែ​សម្រួល​៖​វាសនា​

ទីតាំងផ្សាយពាណិជ្ជកម្ម

- Advertisment -

Most Popular

ជប៉ុន​និង​ចិន​ចាប់ផ្តើម​ក...

​ប្រែ​សម្រួលៈ​វាសនា​/​តូ​...

ឡាន​ដឹក​ថ្ម​បុក​ម៉ូតូ​មួយ...

ដោយៈ​ស​រិ​ទ្ធ​/​ភ្នំពេញ​:...

រុស្ស៊ី​នឹង​លក់​វ៉ាក់សាំង...

​ប្រែ​សម្រួល : កញ្ញា​ដា​ល...

ដាក់​ផែនការ​ការពារ​សន្តិស...

​ដោយៈ​រ៉ា​ម៉ន​/​ភ្នំពេញៈ​...