ភ្នំពេញ៖លោកឧកញ៉ា គីម ហ៊ាង ប្រធាន KW Cambodia និងជាអ្នកជំនាញអចលន ទ្រព្យ កម្ពុជាមួយរូប បានដាក់ក្ដីរំពឹងថា ក្នុងរយៈពេល ៣ ទៅ ៥ ឆ្នាំ ក្រោយវិស័យអចលនទ្រព្យ តំបន់ក្រុងតាខ្មៅ នឹងវិវត្តន៍ដូច តំបន់ភ្នំពេញថ្មី នាពេលបច្ចុប្បន្ន ។
ការអះអាងរបស់អ្នកជំនាញអចលនទ្រព្យរូបនេះ គឺលោកបានផ្ដោតលើ គម្រោងធំៗពីរ ដែលកំពុងសាងសង់ គឺគម្រោងអាកាសយានដ្ឋានថ្មី និងគម្រោងផ្សារទំនើបអ៊ីអនទី៣ ដែលនឹងជំរុញវិស័យដីធ្លីក្រុងតាខ្មៅ ឲ្យមានតម្លៃកើនឡើងឡើង ក្នុងរយៈពេល ៣ ទៅ ៥ឆ្នាំ ខាងមុខ។ នេះបើតាមការបញ្ជាក់ក្នុងពិធីសម្ពោធលំនៅឋាន កំពង់សំណាញ់-ក្រុងតាខ្មៅ នៅថ្ងៃទី១២ ខែមករា ឆ្នាំ២០២០។
លោកឧកញ៉ា គីម ហ៊ាង បានបញ្ជាក់ថា “រយៈពេល ៣ ទៅ ៥ ឆ្នាំក្រោយ បន្ទាប់ពីអាកាស យានដ្ឋានថ្មី សាងសង់ហើយ (ឆ្នាំ២០២៣) លំនៅដ្ឋានកំពង់សំណាញ់ និងតំបន់ជុំវិញនៅក្រុង តាខ្មៅ នឹងមានតម្លៃដូចទៅនឹងតំបន់ភ្នំពេញថ្មីយើង នៅភ្នំពេញរាល់ថ្ងៃអីចឹង ព្រោះដូចយើង ឃើញស្រាប់ តំបន់នេះ មិនមែនមានតែអាកាសយានដ្ឋានទេ ផ្សារទំនើបក៏មានពិសេសមាន ផ្លូវធំៗងាយស្រួលចេញចូលភ្នំពេញថែមទៀត”។
ជាមួយគ្នានោះ លោកឧកញ៉ា សុខ ស្រស់ ប្រធានសភាពាណិជ្ជកម្មមណ្ឌលខេត្តកណ្ដាល -កំពង់ឆ្នាំង និងជាម្ចាស់គម្រោងលំនៅឋានកំពង់សំណាញ់ បានបង្ហាញនូវសុទិដ្ឋនិយម ចំពោះភាពរីកចម្រើននៃវិស័យអចលនទ្រព្យកម្ពុជា ពិសេសតំបន់ជាយក្រុង ។ លោករំពឹងថា ការវិនិយោគផ្នែកលំនៅដ្ឋាននេះ នឹងរួមចំណែកឆ្លើយតបតម្រូវការរបស់ប្រជាពលរដ្ឋ ក៏ដូចជាភាពរីកចម្រើនរបស់ប្រទេសជាតិ បច្ចុប្បន្នផងដែរ ។
សូមបញ្ជាក់ថា ជាមួយការបើកសម្ពោធលំនៅឋានកំពង់សំណាញ់ នាក្រុងតាខ្មៅក្រុមហ៊ុនអចលនទ្រព្យដ៏ល្បី របស់អាមេរិក នៅកម្ពុជា KW Cambodia គឺបានទទួលសិទ្ធិផ្ដាច់មុខ ដើម្បីលក់គម្រោងមួយនេះ ៕ ដោយ បូរិន
