ដោយ៖សនសក្តា/កំពង់ឆ្នាំង៖កាលពីរសៀលថ្ងៃទី១២ខែមករាឆ្នាំ២០២០កម្លាំងនគរបាលនៃអធិការដ្ឋាននគរបាលស្រុករលាប្អៀរបានឃាត់ខ្លួនជនសង្ស័យចំនួន២នាក់បញ្ជូនទៅស្នងការដ្ឋាននគរបាលខេត្តកំពង់ឆ្នាំងពីបទធ្វើឱ្យខូចខាតដោយចេតនា(គប់កញ្ចក់រថយន្ត) ។
ជនសង្ស័យ ដែលត្រូវសមត្ថកិច្ចចាប់ខ្លួន១-ឈ្មោះខាត់សុភក្តិភេទប្រុសអាយុ២៥ឆ្នាំនៅភូមិថ្មី ឃុំជ្រៃបាក់ ស្រុករលាប្អៀរ ។ ២- ឈ្មោះសែម សាន់ ភេទប្រុស អាយុ២០ឆ្នាំ មានទីលំនៅភូមិព្រៃពួច ឃុំជ្រៃបាក់ ស្រុករលាប្អៀរ ។
សមត្ថកិច្ចបានឲដឹងថា កាលពីវេលាម៉ោង២១និង៣០នាទីថ្ងៃទី១១ខែមករាឆ្នាំ២០២០ជនសង្ស័យទាំង ២នាក់បានយកដុំថ្មគប់លើកញ្ចក់ទ្វារថយន្តម៉ាកលុចស៊ីសមួយគ្រឿងរបស់ឈ្មោះសួងរិទ្ធីភេទប្រុសអាយុ៥០ឆ្នាំមានទីលំនៅភូមិទី១សង្កាត់ខ្សាមក្រុងកំពង់ឆ្នាំងខេត្តកំពង់ឆ្នាំង។បណ្តាលឱ្យបែកកញ្ចក់ទ្វា ក្នុងខណៈពេលដែលជនរងគ្រោះកំពុងបើករថយន្តនៅតាមបណ្តោយផ្លូវជាតិលេខ៥ត្រង់ចំណុចខាងមុខសាលាបឋមសិក្សាជ្រៃបាក់ ស្ថិតក្នុងឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។
ក្រោយពេលមានហេតុការណ៍នេះកើតឡើងកម្លាំងនគរបាលស្រុករលាប្អៀរបានធ្វើការស្រាវជ្រាវនិងឈានទៅកំណត់មុខសញ្ញាជនបង្តរហើយឃាត់ខ្លួនយកមកសាកសួរតែម្តង។ជនសង្ស័យត្រូវបានបញ្ជូនមកកាន់ស្នងការដ្ឋាននគរបាលខេត្តកំពង់ឆ្នាំង ដើម្បីបន្តនិតិវិធី ៕S/
