មណ្ឌល​សុខភាព​សាធារណៈ​នៅ​ខេត្តមណ្ឌលគិរី​បាន​កែលម្អ​ដោយមាន​ការជួយ​ពី​ក្រុម​សុក​ហ្វី​ន​ខេ​ម​បូ​ឌា

351
ចែករម្លែក

ដោយៈ​សុផល​/​ភ្នំពេញ​៖​ក្រុមហ៊ុន​SocfinCambodia​បានប្រកាសថា​ខ្លួន​បានបញ្ចប់​គម្រោង​រយៈពេល​មួយខែ​របស់ខ្លួន​រួចទៅហើយ​ដែល​គម្រោង​នោះ​គឺ​ផ្ដោតជាសំខាន់​ទៅលើ​ការងារ​កែលម្អ​ហេដ្ឋារចនាសម្ព័ន្ធ​មណ្ឌល​សុខភាព​សាធារណៈ​នៅក្នុង​ឃុំ​ប៊ូ​ស្រា​ស្រុក​ពេ​ជ្រា​ដា​ខេត្តមណ្ឌលគិរី​។​ការងារ​កែលម្អ​នេះ​ដើម្បី​ធ្វើយ៉ាងណា​អាច​ផ្ដល់​សេវា​សុខាភិបាល​ឱ្យបាន​កាន់តែ​ល្អប្រសើរ​ជូន​សហគមន៍​ក្នុង​មូលដ្ឋាន​ដែលមាន​ប្រជាជន​រស់នៅ​ប្រមាណ​ជាង​៧​ពាន់​នាក់​។​គម្រោង​នេះ​ផ្ដោតជាសំខាន់​ទៅលើ​ការងារ​កែលម្អ​មណ្ឌល​សុខភាព​សាធារណៈ​ប៊ូ​ស្រា​។​

​គម្រោង​នេះ​ផងដែរ​គឺ​ទទួលបាន​ជំនួយ​ឧបត្ថម្ភ​ផ្នែក​ហិរញ្ញវត្ថុ​ទាំងស្រុង​ពី​ក្រុមហ៊ុន​SocfinCambodia​ដែលជា​ក្រុមហ៊ុន​កសិកម្ម​គ្រប់គ្រង​ដោយ​ជនជាតិ​អឺរ៉ុប​ដែល​គ្រប់គ្រង​លើ​ចម្ការកៅស៊ូ​ចំនួន​ពីរ​នៅក្នុង​ខេត្តមណ្ឌលគិរី​។​ក្រុមហ៊ុន​បាន​វិនិយោគ​ជា​ទឹកប្រាក់​ចំនួន​ជាង​១១.០០០​ដុល្លារ​សម្រាប់​គម្រោង​នេះ​។​ការងារ​ទាំងនេះ​រួមមាន​ដូចជា​ការធ្វើ​ស្ពាន​ថ្មី​ឆ្លងទៅ​មណ្ឌល​សុខភាព​កែលម្អ​ប្រព័ន្ធ​លូបង្ហូរទឹក​ពី​មាត់​ផ្លូវ​ទៅ​មណ្ឌល​សុខភាព និង​ចាក់​ផ្លូវ​ប​តុង​នៅក្នុង​បរិវេណ​ខាងមុខ​មណ្ឌល​សុខភាព​។

ការកែលម្អ​ហេដ្ឋារចនាសម្ព័ន្ធ​ទាំងនេះ​សំដៅ​ផ្ដល់​ភាពងាយស្រួល​ជូន​ដល់​ប្រជាជន​ក្នុងការ​ធ្វើដំណើរ​ពេល​រដូវវស្សា ព្រមទាំង​កាត់បន្ថយ​ការ​ហុយ​ដី​ផ្សេងៗ​ក្នុងអំឡុងពេល​រដូវ​ប្រាំង​ផងដែរ គឺ​ធ្វើយ៉ាងណា ពង្រឹង​ភាព​ស្អាត​និង​អនាម័យ​នៅក្នុង​មណ្ឌល​សុខភាព​ទាំងមូល​តែម្ដង​។​ការងារ​នេះ​ត្រូវបាន​អនុវត្ត​ឡើង​ក្នុង​គោលបំណង​ធានា​សុវត្ថិភាព​សាធារណៈ​និង​ផ្ដល់​ភាពងាយស្រួល​ក៏ដូចជា​ផ្ដល់​ទំ​ទុកចិត្ត​ដល់​ប្រជាជន​រស់នៅក្នុង​សហគមន៍​ក្នុងការ​ប្រើប្រាស់​សេវា​សុខាភិបាល​ព្រមទាំង​កែលម្អ​ស្ថានភាព​ការងារ​ប្រចាំថ្ងៃ​របស់​មន្ត្រី​ក្នុង​មណ្ឌល​សុខភាព​ផងដែរ​។​

​សូមជម្រាបថា​កាលពី​ថ្ងៃទី​៣១​ខែមករា​ឆ្នាំ​២០១៩​លោក​ឆាង​គុណ​ប្រធាន​មណ្ឌល​សុខភាព​សាធារណៈ​ប៊ូ​ស្រា​បានរៀបចំ​កម្មវិធី​សម្ពោធ​ដាក់ឱ្យ​ប្រើប្រាស់​នូវ​សមិទ្ធិផល​មួយចំនួន​ដើម្បី​បង្ហាញ​អំពី​លទ្ធផល​ការងារ​កែលម្អ​ដែល​បាន​អនុវត្ត​រួចរាល់​នៅក្នុង​មណ្ឌល​សុខភាព​នាពេល​កន្លងមកនេះ​។​ក្នុង​កម្មវិធី​នោះ​ផងដែរ​ក៏មាន​វត្តមាន​ចូលរួម​ពី​សំណាក់​អាជ្ញាធរ​ក្នុង​មូលដ្ឋាន​តំណាង​មន្ទីរ​សុខាភិបាល​ខេត្ត​មណ្ឌល គិរី តំណាង​សហគមន៍​ក្នុង​មូលដ្ឋាន បុគ្គលិក​មណ្ឌល​សុខភាព និង​តំណាង​ក្រុមហ៊ុន សុក​ហ្វី​ន កម្ពុជា​ផងដែរ​។​

ក្នុងអំឡុងពេល​នៃ​កម្មវិធី​សម្ពោធ​នោះ​អ្នកចូលរួម​ក៏​ទទួលបាន​ឱកាស​ក្នុងការ​ស្វែងយល់​អំពី​សកម្មភាព​ដែល​បាន​អនុវត្ត​និង​ពិភាក្សា​បន្ថែមទៀត​អំពី​គម្រោង​អភិវឌ្ឍន៍​ក្នុង​ឃុំ​នាពេល​អនាគត​ទៀតផង​។​ក្រុមហ៊ុន​SocfinCambodia​និង​មណ្ឌល​សុខភាព​ប៊ូ​ស្រា​រួមទាំង​មន្ត្រី​ក្នុង​មូលដ្ឋាន​ផ្សេងទៀត​នឹង​បន្ត​ខិតខំ​ធ្វើ​ការងារ​ជាមួយគ្នា​ដើម្បី​ធានាថា​សហគមន៍​នេះ​អាច​ទទួលបាន​សេវា​ល្អ​បំផុត​តាម​ដែល​អាច ធ្វើទៅបាន​។​

លោក​JefBoedt​អ្នកគ្រប់គ្រង​ទូទៅ​ក្រុមហ៊ុន​SocfinCambodia​មានប្រសាសន៍ថា​“​ចាប់តាំងពី​ពេល​ចាប់ផ្ដើម​សកម្មភាព​ដំបូង​នៅក្នុង​ឃុំ​ប៊ូ​ស្រា ក្រុមហ៊ុន Socfin Cambodia បាន​ខិតខំ​ប្រឹងប្រែង​ជួយ​គាំទ្រ ទាំង​កម្លាំងកាយ​ចិត្ត​និង​ធនធាន​ដើម្បី​ធ្វើយ៉ាងណា​បង្កើតឱ្យមាន​សេវា​សង្គម​នានា​ប្រកបដោយ​គុណភាព ដូចជា​សេវា​សុខាភិបាល និង​អប់រំ ជាដើម​។​”

​លោក​បាន​បន្តទៀតថា​“​វិស័យ​សុខាភិបាល​បានក្លាយ​ទៅជា​បញ្ហា​ចម្បង​សម្រាប់​សហគមន៍​នៅតាម​តំបន់​ជនបទ​ហើយ​បញ្ហា​នេះ​ក៏​ជាការ​ប្ដេជ្ញាចិត្ត​ដ៏​សំខាន់​មួយ​របស់​ក្រុមហ៊ុន​ក្នុងការ​គាំទ្រ​ដល់​មន្ទីរ​សុខាភិបាល​សាធារណៈ​ដែលជា​ស្ថាប​ន័​ផ្ដល់​សេវាសាធារណៈ​ដល់​សហគម​ន៍​ទាំងមូល​ផងដែរ​។

​ការចែករំលែក​គុណ​តម្លៃ​ដែល​យើង​បាន​បង្កើតឡើង​ជាមួយនឹង​ឃុំ​ប៊ូ​ស្រា​ដើម្បី​ផ្ដល់​អត្ថប្រយោជន៍​ដល់​សហគមន៍​ដ៏​ធំ​មួយ​នេះ គឺ ជា​គុណ​តម្លៃ​ស្នូល​របស់​យើង​។​យើង​ក៏​សូម​ថ្លែងអំណរគុណ​យ៉ាង​ជ្រាលជ្រៅ ចំពោះ​កិច្ចសហការ ប្រកបដោយ​ផ្លែផ្កា​រវាង​ភាគី​ពាក់ព័ន្ធ​ទាំងអស់​ដែល​បាន​ចូលរួម​ផងដែរ​៕S/

​ ​ចំណងជើង​រូបថត​៖​មណ្ឌល​សុខភាព​សាធារណៈ​នៅ​ខេត្តមណ្ឌលគិរី បានទទួល​ការកែលម្អ​ដោយមាន​ការជួយ​ពី​ក្រុម សុក​ហ្វី​ន ខេ​ម​បូ​ឌា​

ទីតាំងផ្សាយពាណិជ្ជកម្ម