សមាគម​អ្នកវិនិយោគ​កម្ពុជា​សហ​ការ​ជាមួយ​វិទ្យាស្ថាន​សិក្សា​ដើម្បី​ជោគជ័យ​ពង្រឹងគុណភាព​ការងារ​នៅ​កម្ពុជា​

​ដោយៈ​សុផល​/​ភ្នំពេញៈ បើទោះបីជា​កម្ពុជា​មានកំ​ណើ​ន​សេដ្ឋកិច្ច​ប្រមាណ​ជា ៧​ភាគរយ ជា​មធ្យម នៅក្នុង​ប៉ុន្មាន​ឆ្នាំ​ចុង​ក្រោយនេះ​ក៏ដោយ​ក៏​ម្ចាស់​អាជីវកម្ម​នៅក្នុង​ប្រទេស​នេះ​ពិសេស​គឺ​សហគ្រាស​ធុន​តូច​និង​មធ្យម​(SME)​អះអាងថា​ធនធានមនុស្ស​កម្ពុជា​នៅមានកម្រិត​បើ​ធៀប​ទៅនឹង​បណ្តា​ប្រទេសជិតខាង​។​បញ្ហា​ធនធានមនុស្ស​ទាំងនេះ​បានធ្វើឱ្យ​ផលិតភាព​ការងារ​នៅ​កម្ពុជា​ហាក់​មិនអាច​ស្ទុះ​បាន​ហើយ​ស្នូល​នៃ​បញ្ហា​នេះ​ត្រូវបាន​ទីប្រឹក្សា​ធនាគារ​អេស៊ីលីដា​ភីអិលស៊ី​លោក​ចាន់​សេរី​អះអាងថា​បណ្តាលមកពី​ការគ្រប់គ្រង ដែល​សំដៅលើ​ជំនាញ​បច្ចេកទេស និង​ជំនាញ​ទន់​។

​លោក​ចាន់​សេរី​បាន​មានប្រសាសន៍ថា​៖“​ការគ្រប់គ្រង​ការងារ​ត្រូវ​ការឱ្យ​មនុស្ស​ម្នាក់ៗ​បុគ្គល​ដែលជា​អ្នកចូលរួម​ដែលជា​បុគ្គលិក​នោះ ត្រូវមាន​ចំណេះ​ជំនាញ ដែល​យើង​ហៅថា ជំនាញ​បច្ចេកទេស​(Hard Skill)​។​មួយទៀត​គឺ​ត្រូវការ​គំនិត​បញ្ញា​ស្មារតី​នៅ​ខាង​ផ្នែក​ជំនាញ​ទន់​(SoftSkill)​។​អ៊ីចឹង​វិបត្តិ​ដែល​កើតមាន​ដោយសារតែ​យើង​នៅ​ខ្វះខាត​”​។​ដើម្បី​ឆ្លើយតប​ទៅនឹង​បញ្ហា​នេះ​សមាគម​អ្នកវិនិយោគ​កម្ពុជា​(CIC)​ដែលមាន​ក្រុមហ៊ុន​ឯកជន​ជា​សមាជិក​ជាង​៤០០​ស្ថាប័ន​នោះបាន​សម្រេច​ចុះ​អនុស្សរណៈ​យោគយល់​ជាមួយ​វិទ្យាស្ថាន​សិក្សា​ដើម្បី​ជោគជ័យ​(LSI)​កាលពី​ថ្ងៃទី​១៣​ខែមករា​នៅ​រាជធានី​ភ្នំពេញ​។​

​គោលបំណង​នៃ​ការចុះហត្ថលេខា​ជា​ផ្លូវការ​នេះ​ត្រូវបាន​ប្រធាន​នាយកដ្ឋាន​អភិវឌ្ឍ​អាជីវកម្ម​នៃ​CIC​លោក​សាន​ឡា​ទី​អះអាងថា​ជាការ​ឆ្លើយតប​បន្ទាប់​នូវ​បញ្ហា​ប្រឈម​នៃ​វិបត្តិ​គ្រប់គ្រង​ធនធានមនុស្ស​របស់​ស្ថាប័ន​ដែលជា​សមាជិក​CIC​ក៏​ជា​ស្ទើរតែ​គ្រប់​ស្ថាប័ន​វិស័យ​ឯកជន​នៅ​កម្ពុជា​ដែល​បាននិងកំពុង​ជួបប្រទះ​។​

លោក​សាន​ឡា​ទី​បាន​លើកឡើងថា​៖“​ចេញពី​ការស្រាវជ្រាវ​របស់​យើង​សួរ​ថាបើ​គាត់​(​សហគ្រាស​ធុន​តូច​និង​មធ្យម​)​ត្រូវ​ការកសាង​សមត្ថភាព​ត្រូវការ​រក្សាទុក​(​បុគ្គលិក​)?​។​អ៊ីចឹង​សួរថា​គាត់​ត្រូវតែមាន​ជំនាញ Human Resource ឬក៏​គ្រប់គ្រង​ធនធានមនុស្ស​(​ឬទេ​)? តែ​ជាទូទៅ គាត់ SME គាត់​អត់​មាន​ទេ​។

បើសិនជា​គាត់​ត្រូវការ​អ្នកជំនាញ​នៅក្នុង​ហ្នឹង​មក​ធ្វើ​ការឱ្យ​គាត់​ជា​នាយកដ្ឋាន​គ្រប់គ្រង​ធនធានមនុស្ស​ហ្នឹង​គឺ​វា​ចំណាយ​ច្រើន​មែនទែន​ដែល​អាចដាក់​បន្ទុក​ទៅឱ្យ​គាត់​ក្នុង​ការរក្សា​ចីរភាព​នៃ​ប្រតិបត្តិការ​របស់​គាត់​។​ដូច្នេះ​អ្វីដែល​សំខាន់​គាត់​ត្រូវតែ​រក​អ្នកជំនាញ​នៅ​ខាងក្រៅ​ដែល​គេ​មាន​ជំនាញ​អាច​កសាង​សមត្ថភាព​បុគ្គលិក​រប​ស់​គាត់​បាន​។ សម្រាប់ LSI គាត់​មាន​ជំនាញ​នៅក្នុង​ការធ្វើការ​ជាមួយ​staff [​បុគ្គលិក​]​របស់​សហគ្រិន​។​អ​ញ្ជឹ​ង​គឺ​វា​ចំណេញ​ទាំងអស់គ្នា​។​អ​ញ្ជឹ​ង​សម្រាប់​SME​អ្វីដែល​យើង​មើលឃើញ​គឺជា​បញ្ហា​ធនធានមនុស្ស​ហើយ​អ្វីដែល​LSI​កំពុងតែ​ផ្តលឱ្យ​គឺ​វា​ជា​គេ​ហៅថា​ដំណោះស្រាយ​យ៉ាង​ត្រឹមត្រូវ​”​។

​ថ្លែង​ក្នុង​ពិធី​ចុះ​អនុស្សរណៈ​យោគយល់​គ្នា​នេះ នាយក​ប្រតិបត្តិ​នៃ​វិទ្យាស្ថាន​សិក្សា​ដើម្បី​ជោគជ័យ លោក កឹម អឿន បាន​ពន្យល់​អំពី​ការជ្រើសរើស​សមាគម​អ្នកវិនិយោគ​កម្ពុជា CIC ជា​ដៃគូ​ដំបូង នៃ​ការ​ផ្តល់នូវ​វគ្គ​បណ្តុះបណ្តាល​សម្រាប់​ឆ្នាំ​២០២០​នេះ​ថា​ការបណ្តុះ​ធនធានមនុស្ស​កម្ពុជា​ប្រកបដោយ​សក្តានុពល សម្រាប់​អភិវឌ្ឍ​ប្រទេស ក៏ដូចជា​ដើម្បី​ប្រកួតប្រជែង​លើ​ទីផ្សារ​ទាំង​ក្នុងស្រុក ថ្នាក់​តំបន់ និង​ពិភពលោក​គឺជា​ទស្សនៈវិស័យ​នៃ​វិទ្យាស្ថាន​ផ្ទាល់​។ ដោយឡែក សក្តានុពល​នៃ​CIC គឺ​អាចជា​ចលករ​ផ្ទាល់​ជំរុញ​និង​លើកទឹកចិត្ត​ឱ្យ​សមាជិក​របស់ខ្លួន​ឆ្លើយតប​ភ្លាមៗ​នូវ​បញ្ហា​ប្រឈម​របស់​ពួកគេ​។​

លោក​កឹម​អឿន​បាន​បន្តថា​៖“CIC​ក្នុង​រយៈពេល​១​ឆ្នាំ​ចុងក្រោយ​ជាពិសេស​នេះ​គឺ​គាត់​មានការ​អភិវឌ្ឍ​លឿន​មែនទែន​។ សមាជិក​របស់គាត់​មានការ​សកម្ម​ច្រើន គឺជា​ដៃគូ​មួយ​ដែលមាន​លក្ខណៈ​គត់​មុត​។ សមាជិក​គាត់​(CIC)​មានការ​ប្តេជ្ញាចិត្ត​ក្នុង​អភិវឌ្ឍ​ក្រុមហ៊ុន​។​ដូច្នេះ​យើង​ឃើញថា​រឿង​ជាច្រើន​ណា​ដែល​ធ្វើឱ្យ​ក្រុមហ៊ុន​មួយ​រីកចម្រើន ប៉ុន្តែ​រឿង​ធំ​មួយ​ក្នុងចំណោម​នោះ​គឺ​រឿង​បុគ្គលិក​ហ្នឹងឯង​។

​អីចឹង​ហើយ​យើង​ជួយ​គាត់​នៅក្នុង​កន្លែង​មួយ​ដុំ​ដែល​យើង​ពូកែ​ដែលជា​ជំនាញ​ដែលជា​ចំនុចខ្លាំង​របស់​យើង​។ គឺ​Product (​ផលិត​)​ថ្មី​ដែល​យើង​បង្កើត​ក្នុង​ឆ្នាំ​២០២០ ឈ្មោះថា GEMBA គឺ Staff MotivationforProductivity​។​និយាយ​ទៅ​ជប៉ុន​ដែល​រីកចម្រើន​មកដល់​សព្វថ្ងៃនេះ​គឺ​ដោយសារ​ពាក្យ​មួយ​ម៉ាត់​នេះ​ចូលរួម​ច្រើនណាស់ ហើយ​អត្ថន័យ​របស់​វា​ច្រើន ដែល​មិនអាច​បកស្រាយ​បាន​។

ប៉ុន្តែ​គ្រាន់តែ​ថា​គឺជា​ទ័ព​មួយ​ដែល​ស្រួច​។​ទ័ព​មួយ​ដែល​ស្រួច​គឺជា​ទ័ព​ដែលមាន​ផលិតភាព​ខ្ពស់​ហ្នឹងឯង​។​ដូច្នេះហើយ​ខ្ញុំ​គិតថា​យើង​អាច​យក​ជប៉ុន​គឺជា​model​បាន​ដើម្បី​ធ្វើ​ម៉េច​អភិវឌ្ឍ​បុគ្គលិក​មួយៗ​របស់​យើង​ឱ្យ​ជា​បុគ្គលិក​ខ្លឹម​របស់​ក្រុមហ៊ុន ក៏ដូចជា​របស់​ប្រទេសជាតិ​របស់​យើង​ដែរ​បាទ​”​។

​គួរ​រម្លឹក​ផងដែរ​ថា​ខណៈ​ផលិតភាព​ការងារ​នៅមានកម្រិត​កម្ពុជា​អាច​នឹង​ប្រឈម​ខ្លាំង​ក្នុងការ​ប្រកួតប្រជែង​លើ​ទីផ្សារ ដែលមាន​ការវិវឌ្ឍ​យ៉ាង​ឆាប់រហ័ស​ទាំង​លើ​ជំនួញ និង​បច្ចេកវិទ្យា​។​លោក​ឧ​ត្ត​ម​សេនីយ៍​ឯក​ម៉ម​សំ​នាយរង​សេនាធិការ​ចម្រុះ​នាយក​ខុទ្ទកាល័យ​អគ្គបញ្ជាការដ្ឋាន​នៃ​កងយោធពល​ខេមរភូមិន្ទ បាន​អះអាងថា ទាំង​លោក​ផ្ទាល់ ពិតជា​គាំទ្រ​លើ​ដំណោះស្រាយ​នេះ ព្រោះ​ការអភិវឌ្ឍ​លើ​វិស័យ​ធនធាន​ក៏​ជា​អ្វីដែល​រដ្ឋាភិបាល​បាន និង​កំពុងផ្តល់​អទិភាព​ខ្លាំង​ផងដែរ​។

​នាយរង​ផ្កាយ​៣​រូបនេះ​អះអាង​យ៉ាង​ដូច្នេះ​ថា​៖“​ក្នុង​ការងារ​រដ្ឋាភិបាល​ខ្ញុំ​គិត​ឃើញថា​ជាការ​ប្រសើរ​មែនទែន​ពីព្រោះ​[​វា​]​ជាគោលការណ៍​រាជរដ្ឋាភិបាល​លោក​ចង់ឱ្យមាន​ទីផ្សារ​ស​ម្រា​ប់​ការធ្វើ​វិនិយោគ ឬក៏​សម្រាប់​ប្រទេស​កម្ពុជា​យើង និយាយឱ្យចំ​គឺថា​ពង្រីក​ទីផ្សារ​អន្តរជាតិ​”៕S/

​ ​ ​ចំណងជើង​រូបថត​៖​សមាគម​អ្នកវិនិយោគ​កម្ពុជា បានសម្រេច​ចុះ​អនុស្សរណៈ​យោគយល់​ជាមួយ​វិទ្យាស្ថាន​សិក្សា​ដើម្បី​ជោគជ័យ​ពង្រឹងគុណភាព​ការងារ​នៅ​កម្ពុជា

ទីតាំងផ្សាយពាណិជ្ជកម្ម

- Advertisment -

Most Popular

ប្រជាពលរដ្ឋ​ងាយ​រងគ្រោះ​ច...

ដោយ​: ទេ​ពក​ង្រី / កំពង់ឆ...

រដ្ឋបាល​ខណ្ឌ​ពោធិ៍​សែន​ជ័...

ដោយ​៖ រ៉ា​ម៉ន / ភ្នំពេញ​៖...

បុរស​ម្នាក់​ចាប់រំលោភ​កូន...

​ដោយ​: សម្បត្តិ / ភ្នំពេញ...

ប៉ូលិស​បង្ក្រាប​ក្រុម​ជួញ...

​ដោយ​: មុនី​រ័ត្ន / ភ្នំព...