ដោយ៖ រ៉ូហ្សា
ភ្នំពេញ៖ អូរសោម ដែលជាតំបន់ឆ្ងាយ ដាច់ស្រយាលមួយ របស់ខេត្តពោធិ៍សាត់ នឹងក្លាយជាកន្លែង ប្រកួតកីឡាទេសចរណ៍ ថ្មីមួយទៀតរបស់កម្ពុជា ។
លោក វ៉ាត់ ចំរើន អគ្គលេខាធិការ គណៈកម្មាធិការជាតិ អូឡាំពិកកម្ពុជា បានមានប្រសាសន៍ថា ថ្មីៗនេះ យើងបានរកឃើញ តំបន់ទេសចរណ៍ ធម្មជាតិជាច្រើន ដែលនៅឆ្ងាយៗ មិនទាន់មាននរណា ទៅដល់ ។ សម្រាប់តំបន់អូរសោម ដែលស្ថិតក្នុងភូមិសាស្ត្រ ខេត្តពោធិ៍សាត់នោះ ស្ថិតនៅជាប់ព្រំដែនថៃ ដែលមានចម្ងាយប្រមាណ ២០០ គីឡូម៉ែត្រ ពីទីរួមខេត្តពោធិ៍សាត់ ។
ជាតំបន់ទេសចរណ៍ព្រហ្មចារីយ៍ ដែលទើបតែរកឃើញ ហើយឆ្នាំនេះ ក្រសួងទេសចរណ៍ និងគណៈកម្មាធិការជាតិ អូឡាំពិកកម្ពុជា និងថៃ នឹងបង្កើតព្រឹត្តិការណ៍កីឡា និងទេសចរណ៍ នៅទីនោះ ។ លោកបានបន្តថា ព្រឹត្តិការណ៍កីឡា អាចនឹងមានការប្រណាំងកង់ តាមភ្នំ ការដើរ និងរត់ឡើងភ្នំ និងប្រភេទកីឡា មួយចំនួនទៀត ។
លោកបានបន្តថា ធម្មជាតិ នៅទីនោះ ល្អ និងមានភាពទាក់ទាញ សម្បើមណាស់ ។ ទីនោះ នឹងក្លាយជាកន្លែងប្រកួតកីឡា បែបទេសចរណ៍ថ្មីមួយទៀត ដូចនៅខេត្តសៀមរាប ខេត្តព្រះសីហនុ និង ភ្នំបូកគោ នៃខេត្តកំពត ៕v
