ដោយ: ប.ខុន / ភ្នំពេញ: ការសាងសង់ផ្លូវចំនួន៣៤ខ្សែ ដែលមានប្រវែងជាង៨០គីឡូម៉ែត្រ នៅក្នុងក្រុងព្រះសីហនុមកទល់នឹង ពាក់កណ្តាលខែមករាឆ្នាំ២០២០នេះ សម្រេច លទ្ធផលបានប្រមាណជា៣០ភាគរយនៃគម្រោងហើយ បន្ទាប់ពីបើកការដ្ឋានជា ផ្លូវការកាលពីថ្ងៃទី១៦ខែវិច្ឆិកាឆ្នាំ២០២៩រួចមកនិងនៅថ្ងៃទី១៥ខែមករានេះផ្លូវអូរ ត្រេះចាប់ផ្តើមចាក់បេតុងហើយ។
លោក គួច ចំរើន អភិបាលខេត្តព្រះសីហនុបានប្រាប់ឱ្យរស្មីកម្ពុជាដឹងនៅថ្ងៃ ទី១៥ខែមករាឆ្នាំ២០២០ថា គ្រប់ការដ្ឋានផ្លូវទាំង៣៤ខ្សែ ដែលបានបើកការដ្ឋាន សាងសង់ជាផ្លូវការ ក្រោមអធិបភាពដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី កាលពីថ្ងៃទី១៦ខែវិច្ឆិកាឆ្នាំ២០១៩ រហូតមកដល់ត្រឹមថ្ងៃនេះ(១៥មករាឆ្នាំ២០២០) ជាលទ្ធផលសម្រេចបានប្រមាណជា៣០ភាគរយនៃគម្រោងហើយ។
ការដ្ឋានសាងសង់ផ្លូវទាំង៣៤ខ្សែ ដែលបានអនុវត្តដោយក្រុមហ៊ុនឯកជន ចំនួន៦និងកងវិស្វកម្មចំនួនពីរគឺកងវិស្វកម្មសម្តេចតេជោហ៊ុនសែនសៀមរាបនិង កងវិស្វកម្មលេខ១៧៨ស្ពានថ្នល់នៃក្រសួងការពារជាតិ គិតពីថ្ងៃទី១៦ខែវិច្ឆិកាឆ្នាំ២០១៩ ដែលជាថ្ងៃបើកការដ្ឋានជាផ្លូវការមកដល់ត្រឹមថ្ងៃទី១៥ខែមករាឆ្នាំ២០២០ នេះ គឺមានរយៈពេលពីរគត់។
លោក គួច ចំរើន បាននិយាយឱ្យដឹងទៀតថា ការសាងសង់ផ្លូវនេះជាទូទៅ មានល្បឿនលឿន ព្រោះកន្លែងខ្លះធ្វើទាំងយប់ទាំងថ្ងៃនិងយឺតនៅកន្លែងខ្លះ ដោយសារបច្ចេកទេសដាក់លូតែបានដោះស្រាយហើយ។ ថ្ងៃនេះ(១៥មករា)ផ្លូវអូរត្រេះ បាន ចាប់ផ្តើមចាក់បេតុងហើយ។ ចំណែកចំណោទផ្លូវនៅជិតរង្វង់មូលជំទាវម៉ៅ កំពុង ត្រូវបានបន្ទាប ដើម្បីងាយស្រួលធ្វើចរាចរឡើងចុះ។
នៅក្រុងព្រះសីហនុពេលនេះ ផ្លូវមួយណាក៏ត្រូវបានគេមើលឃើញ កំពុង ធ្វើ ការសាងសង់ យ៉ាងសកម្ម ដូច្នេះការធ្វើចរាចរពិតជាត្រូវជួបការលំបាក។ មិនមែន តែផ្លូវចាស់នៅក្នុងក្រុងនោះ ទេដែលកំពុងសម្រុកសាងសង់ ផ្លូវថ្មីកាត់ព្រៃតាម ឆ្នេរ ក៏ត្រូវបានសម្រុកសាងសង់ឱ្យទាន់ពេល ដែរ។
រំលឹកឱ្យដឹងថាផ្លូវចំនួន៣៤ខ្សែមានប្រវែងសរុប៨៤.៥០៥ម៉ែត្រ កំពុងត្រូវបានធ្វើការសាងសង់ដោយក្រុមហ៊ុនឯកជនចំនួន៦ និងអង្គភាពរបស់រដ្ឋចំនួនពីរ នៅក្រុងព្រះសីហនុនេះ ជាគម្រោងដែលបានលើកឡើង ដោយគណៈកម្មាធិការ ជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជា ដែលមានលោកឱបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ជាប្រធាន តាំងពីឆ្នាំ២០១៨មក។ ផ្លូវទាំង៣៤ខ្សែនេះចាក់ដោយបេតុងកម្រាស់០.២៥ម៉ែត្រ និងអ៊ុត បេទីមបន្ថែមពីលើកម្រាស់០.០៦ម៉ែត្រ៕ ល
