ដោយៈសុផល/ភ្នំពេញៈធនាគារអេស៊ីលីដាកាលពីព្រឹកថ្ងៃទី១៥ខែមករាឆ្នាំ២០២០បានរៀបចំសិក្ខាសាលាមួយស្តីពីធនាគារអេស៊ីលីដាភីអិលស៊ីគ្រោងនឹងបោះផ្សាយលក់មូលបត្រកម្មសិទ្ធិជាសាធារណៈ។សិក្ខាសាលានេះបានលើកឡើងពីអត្ថប្រយោជន៍ដែលទទួលបានពីការវិនិយោគជាមួយខ្លួនក្នុងពេលឡើងផ្សារហ៊ុន។
ជាមួយគ្នានេះធនាគារអេស៊ីលីដាបានជម្រាបដល់អតិថិជនក៏ដូចជាវិនិយោគិនត្រៀមខ្លួនក្នុងការចូលរួមវិនិយោគជាមួយធនាគារអេស៊ីលីដាក្នុងពេលដែលធនាគារនេះត្រៀមខ្លួនក្នុងការលក់មូលបត្រកម្មសិទ្ធជាសាធារណៈ នៅក្នុងផ្សារមូលបត្រកកម្ពុជា ។
ថ្លែងនៅក្នុងសិក្ខាសាលាស្ដីពីធនាគារអេស៊ីលីដាភីអិលស៊ីគ្រោងនឹងបោះផ្សាយលក់មូលបត្រកម្មសិទ្ធិជាសាធារណៈដល់អតិថិជននិងដៃគូវិនិយោគកាលពីថ្ងៃទី១៥មករាឆ្នាំ២០២០នៅការិយាល័យកណ្ដាលធនាគារអេស៊ីលីដាលោកបណ្ឌិតអ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ថាកន្លងមកអត្ថប្រយោជន៍ដែលអេស៊ីលីដាទទួលបានគឺបានទៅលើតែភាគទុនិកមួយចំនួនតូចប៉ុណ្ណោះដែលមានភាគហ៊ុននៅក្នុងធនាគារអេស៊ីលីដា។ដូច្នេះធនាគារចង់ឱ្យអត្ថប្រយោជន៍របស់ខ្លួនបានទៅលើអតិថិជនកាន់តែច្រើនបន្ថែមទៀតទើបធនាគារបោះផ្សាយលក់មូលបត្រកម្មសិទ្ធជាសាធារណៈ ។
លោកបានបន្តថាអត្ថប្រយោជន៍ដែលអតិថិជនក៏ដូចជាវិនិយោគិនទទួលបានពីការវិនិយោគជាមួយធនាគារអេស៊ីលីដា តាមរយៈការទិញមូលបត្រកម្មសិទ្ធជាសាធារណៈនៅផ្សារមូលបត្រកម្ពុជា រួមមានច្រើន តែប៉ុន្តែសូមលើកយកអត្ថប្រយោជន៍ធំៗដែលនឹងទទួលបាននោះដូចជាអតិថិជននឹងទទួលបានភាគលាភ ពីអេស៊ីលីដា ហើយអាចជួញដូរភាគហ៊ុនជាមួយអេស៊ីលីដា ហើយអ្នកវិនិយោគជាមួយអេស៊ីលីដា នឹងក្លាយជាម្ចាស់ស្ថាប័នធំជាងគេនៅក្នុងប្រទេសកម្ពុជានិងអាចបង្គាប់បញ្ជាទៅកាន់ស្ថាប័ននោះទៅតាមការចង់បានរបស់គាត់ផងដែរ ។
លោកបន្ថែមថា មុននឹងអេស៊ីលីដា ប្រកាសលក់ជាផ្លូវការ ធនាគារបានធ្វើសិក្ខាសាលាជាបន្តបន្ទាប់ ដើម្បីឱ្យអតិថិជននិងវិនិយោគិនបានយល់កាន់តែច្បាស់ជាមួយនឹងការសម្រេចវិនិយោគក៏ដូចជាអោយអតិថិជនបើកគណនីជួញដូរឱ្យ បានរួចរាល់ មុននឹងធ្វើការជួញដូរជាផ្លូវការ។អេស៊ីលីដាមានបំណងចង់ឱ្យ មានការជួញដូរជាលក្ខណៈឯកត្តជន ជាជាងជាក្រុមហ៊ុនឬស្ថាប័ន ។
លោកបានបន្តទៀតថា៖«បន្ទាប់ពីបានរៀបចំនូវសិក្ខាសាលាជាបន្តបន្ទាប់ឃើញថាអតិថិជនដែលមានសក្ដានុពលបានមកចូលរួមនិងបើកគណនីជួញដូររួចជាស្រេចដើម្បីត្រៀមខ្លួនក្នុងការវិនិយោគជាមួយអេស៊ីលីដានៅពេលដែលយើងប្រកាសជួញដូរនៅពេលឆាប់ៗខាងមុខនេះ » ។
លោកបណ្ឌិតអ៊ិនចាន់នីបានបន្ថែមទៀតថាធនាគារអេស៊ីលីដាចង់ឱ្យមានការទិញមូលបត្រកម្មសិទ្ធជាសាធារណៈពីឯកត្តជនទាំងអស់តែម្ដងហើយនេះជាអ្វីដែលអេស៊ីលីដាប៉ងប្រាថ្នាហើយជាការកត់សម្គាល់ក៏មានការចាប់អារម្មណ៍ពីឯកត្តជនច្រើនលើសពីអ្វី ដែលបានរំពឹងទុកផងដែរ ។
គួរបញ្ជាក់ថាអេស៊ីលីដាបានចាប់ផ្ដើមធ្វើប្រតិបត្តិការអស់រយៈពេលជាង២៧ឆ្នាំមកហើយដោយផ្ដើមពីទុនជាង៦០ម៉ឺនដុល្លារអាមេរិកប៉ុណ្ណោះ។បច្ចុប្បន្នអេស៊ីលីដាមានទ្រព្យសកម្មជាង៦ពាន់លានដុល្លារ សមតុល្យឥណទានសរុបចំនួន ៣,៨៨ ពាន់លានដុល្លារអាមេរិក និងប្រាក់បញ្ញើសន្សំសរុបចំនួន ៤,៣៣ ពាន់លានដុល្លារអាមេរិក និងមានអតិថិជនប្រមាណជាងពីរលាននាក់ គិតត្រឹមដំណាច់ខែធ្នូ ឆ្នាំ២០១៩ ។
លោកបណ្ឌិតអ៊ិនចាន់នីបានលើកឡើងថា៖ប្រសិនបើវិនិយោគិនអតិថិជនក៏ដូចជាសាធារណជនដែលមានបំណងទិញភាគហ៊ុនរបស់ធនាគារអេស៊ីលីដាដែលនឹងគ្រោងនឹងបោះផ្សាយលក់នៅលើផ្សារមូលបត្រកម្ពុជានៅពេលឆាប់ខាងមុខនេះសូមអញ្ជើញមកបើកគណនីជួញដូរនិងអត្តសញ្ញាណវិនិយោគិនសិន។
លោកបណ្ឌិតបានគូសបញ្ជាក់ថា៖ ការបោះផ្សាយលក់មូលបត្រកម្មសិទ្ធិនេះដើម្បី៖១៖ ឲ្យវិនិយោគិន អតិថិជននិងសាធារណជនចូលរួមវិនិយោគជាមួយធនាគារដើម្បីក្លាយជាភាគហ៊ុនិករបស់ធនាគារអេស៊ីលីដាភីអិលស៊ី។២៖ប្រមូលដើមទុនគាំទ្រការរីកលូតលាស់របស់ធនាគារអេស៊ីលីដាភីអិលស៊ីទាំងក្នុងស្រុកនិងក្នុងតំបន់ប្រកបដោយចីរភាពនិងកាន់តែរឹងមាំ។៣៖បង្កើតប្រាក់ចំណូលជូនវិនិយោគិននិងសាធារណជនចូលរួមវិនិយោគជាមួយធនាគារតាមរយៈការបែងភាគលាភ។៤៖ចូលរួមលើស្ទួយប្រាក់រៀល។៥៖ចូលរួមចំណែកក្នុងការលើកស្ទួយវិស័យមូលបត្រក្នុងប្រទេសកម្ពុជា៕S/
