Home ព័ត៌មានអន្តរជាតិ អាម៉េរិក​និង​...

អាម៉េរិក​និង​ចិន​ចុះហត្ថលេខា​លើ​កិច្ចព្រមព្រៀង​ពាណិជ្ជកម្ម​ដំណាក់កាល​ទី​១

​ប្រធានាធិបតី​អាម៉េរិក លោក​ដូណាល់ ត្រាំ កាលពី​ថ្ងៃ​ពុធ​ទី​១៥​មករា បាន​ចុះហត្ថលេខា​លើ​កិច្ចព្រមព្រៀង​ពាណិជ្ជកម្ម​មួយ​ជាមួយ​ចិន ដែល​ត្រូវ​រំពឹងថា​នឹង​​ជំរុញ​ការនាំ​ចេញពី​អាម៉េរិក និង​បន្ថយ​ភាព​តានតឹង​នៃ​ជម្លោះ​ពាណិជ្ជកម្ម​រវាង​មហាអំណាច​ទាំងពីរ​។​

ឧបនាយករដ្ឋមន្រ្តីចិន លីវ ហឹ និងប្រធានាធិបតីអាម៉េរិក បង្ហាញកិច្ចព្រមព្រៀងពាណិជ្ជកម្មដែលត្រូវបានចុះហត្ថលេខា

​ក្នុង​ពិធី​ចុះហត្ថលេខា​នៅ​សេត​វិមាន ត្រាំ បាន​និយាយថា កិច្ចព្រមព្រៀង​នេះ​«​កែ​កំហុស​ពី​អតីតកាល​»​។​លោក​បាន​ជំរុញ​ឲ្យ​មាន​ការចរចា​រហូត​បង្កើត​បាន​​កិច្ចព្រមព្រៀង​បណ្តោះអាសន្ន​មួយ​នេះ ដើម្បី​ធ្វើ​ជា​ផ្លូវ​នាំ​យុត្តិធម៌​សេដ្ឋកិច្ច​សម្រាប់​កម្មករ​អាម៉េរិក និង​បាន​និយាយថា «​យើង​កត់សម្គាល់ឃើញ​ការផ្លាស់ប្តូរ​ធំ​​ធេង​នៅក្នុង​ពាណិជ្ជកម្ម​អន្តរជាតិ​»​ជាមួយនឹង​ការចុះហត្ថលេខា​នេះ​។​

​កិច្ចព្រមព្រៀង​នេះ​ត្រូវបាន​ពណ៌នា​ថា​ជា​«​កិច្ចព្រមព្រៀង​ដំណាក់កាល​ទី​១»​ពី​ការចរចា​ដ៏​យូរ​មួយ​ដោយ​ផ្តោត​លើ​ភាព​តានតឹង​ផ្សេងៗ​នៅក្នុង​ទំនាក់ទំនង​ពា​​ណិ​ជ្ជកម្ម​អាម៉េរិ​ក​-​ចិន​។​

​នៅក្នុង​លិខិត​មួយ​ផ្ញើជូន​លោក​ត្រាំ​ អាន​ដោយ​ឧបនាយករដ្ឋមន្ត្រី លីវ ហឹ ប្រធានាធិបតី​ចិន លោក​ស៊ី ជីន​ពីង បាន​មានប្រសាសន៍ថា​«​ដំណាក់កាល​ទី​១​ល្អ​​សម្រាប់​ចិន អាម៉េរិក​និង​ពិភពលោក​ទាំងមូល​»​។​

​តែ​កិច្ចព្រមព្រៀង​នេះ​មិនបាន​ធ្វើ​ឲ្យមាន​ការផ្លាស់​ប្តូរ​សេដ្ឋកិច្ច​ធំៗ​ទេ ដូច​ជា​ការឧបត្ថម្ភរ​បស់​រដ្ឋ​ចិន​លើ​ក្រុមហ៊ុន​របស់ខ្លួន ដែល​រដ្ឋ​ការ​របស់​ត្រាំ​បាន​តវ៉ា​ចាប់​​តាំង​ពី​សង្គ្រាម​ពាណិជ្ជកម្ម​បាន​ចាប់ផ្តើម​។​ទោះជា​យ៉ាងណា ក្នុង​ពិធី​លោក​ត្រាំ​បាន​មានឱកាស​និយាយ​អួត​អំពី​ការរីកចម្រើន​លើ​អាទិភាព​សេដ្ឋកិច្ច​របស់​លោក​ចំ​​ថ្ងៃ​ដែល​សភា​អាម៉េរិក​ត្រៀម​បញ្ជូន​សំណុំរឿង​ចោទ​ទោស​ទម្លាក់​តំណែង​របស់​លោក​ទៅឲ្យ​ព្រឹទ្ធសភា​បើកសវនាការ​។

​កិច្ចព្រមព្រៀង​នេះ​មានបំណង​សម្រាល​ទណ្ឌកម្មសេដ្ឋកិច្ច​អាម៉េរិក​លើ​ចិន ខណៈពេល​ដែល​រដ្ឋាភិបាល​ក្រុង​ប៉េកាំង​នឹង​បង្កើន​ការទិញ​កសិផល​អាម៉េរិក​និង​ទំនិញ​​ផ្សេងៗ​។​លោក​ត្រាំ​បាន​និយាយ​ដល់​សាច់គោ សាច់ជ្រូក មាន់​ទា អាហារ​សមុទ្រ អង្ករ​និង​ផលិតផល​ទឹកដោះគោ ជា​ឧទាហរណ៍​។​វា​នឹង​បន្ថយ​ភាព​តានតឹង​នៅក្នុង​​ជម្លោះ​ពាណិជ្ជកម្ម​មួយ​ដែល​បាន​ទាញ​ទម្លាក់​កំណើន​ពិភពលោក ប៉ះពាល់​ឧស្សាហករ​អាម៉េរិក និង​ដាក់​សម្ពាធ​លើ​សេដ្ឋកិច្ច​ចិន​។​

​បើ​តាម​លោក​ត្រាំ​ ការបន្ធូរបន្ថយ​ភាព​តានតឹង​ពាណិជ្ជកម្ម​មាន​សារសំខាន់​ណាស់​ដោយ​លោក​បាន​និយាយថា​«​ការដែល​ទុក​ឲ្យ​មហាអំណាច​ទាំងពីរ​នេះ​សុខ​​ស្រួល​ជាមួយគ្នា វា​មាន​សារសំខាន់​ណាស់​ចំពោះ​ពិភពលោក​។​ពិភពលោក​កំពុង​សម្លឹង​មើល​ពិធី​នេះ​នៅ​ថ្ងៃនេះ​»​។​

​កិច្ចព្រមព្រៀង​នេះ​មិនបាន​ធ្វើ​ឲ្យ​មាន​ការផ្លាស់​ប្តូរ​ធំៗ​ជាច្រើន​ដែល​អាម៉េរិក​បានទាមទារ​ឲ្យ​ចិន​ធ្វើ តែ​អាម៉េរិក​នៅ​រក្សាទុក​ការយកពន្ធ​ខ្ពស់​លើ​ទំនិញ​​ចិន​តម្លៃ​៣៦០​ពាន់​លាន​ដុល្លារ ជា​កម្លាំង​តថ្លៃ​ដ៏​សំខាន់​មួយ​ដើម្បី​ឲ្យ​ចិន​ធ្វើ​សម្បទាន​នាពេល​អនាគត​។​

​តំណាង​ពាណិជ្ជកម្ម​អាម៉េរិក ​លោក រ៉ូ​ប៊ឺត ឡាយ​ធី​ហ្ស៊ឺ បាន​និយាយថា ការងារ​ចរចា​បង្កើត​កិច្ចព្រមព្រៀង​បន្ទាប់​វា​អាស្រ័យ​លើ​ការបំពេញ​ការសន្យា​របស់​ចិន​នៅ​​ក្នុង​កិច្ចព្រមព្រៀង​ដំបូង​នេះ​៕​ប្រែ​សម្រួល​៖​វាសនា​/Ha

ទីតាំងផ្សាយពាណិជ្ជកម្ម

- Advertisment -

Most Popular