កីឡាករ ដូននី វ៉ាន ដឺប៊ីក (Donny van de Beek) បានបើកចិត្តទទួលយកកិច្ចព្រម ព្រៀងផ្ទេរ ទៅក្របខណ្ឌព្រីមីញ៉េលីកនៅពេលកីឡាកររូបនេះចាកចេញពីក្លិបAjax នៅរដូវក្តៅនេះ ស្របពេលក្លិបម៉េនឆេស្ទ័រ យូណាយធីតត្រៀមដាក់សំណើផ្ទេរ។
កីឡាករវ័យ២២ឆ្នាំរូបនេះគឺជាកីឡាករម្នាក់ក្នុងចំណោមកីឡាករលេចធ្លោនៅក្លិប Ajax ខណៈក្រុមនេះបានឡើងដល់វគ្គពាក់កណ្តាលផ្តាច់ព្រ័ត្រក្របខណ្ឌឆេមពានលីកកាលពីរដូវកាលមុន។
កីឡាករអន្តរជាតិហូឡង់រូបនេះបានបដិសេធការផ្ទេរចេញនៅខែមករានេះ ប៉ុន្តែតាមសេចក្តី រាយការណ៍របស់ Sky Sports ថា ការផ្ទេរចេញពីពហុកីឡដ្ឋាន Amsterdam ArenA អាចនឹងកើតមាននៅដំណាច់រដូវកាលនេះ។
វ៉ាន ដឺប៊ីក អាចនឹងចូលរួមជាមួយក្លឹបកំពូលនៅអង់គ្លេស ប៉ុន្តែក្លិប Real Madrid ក៏ចាប់អារម្មណ៍ខ្លាំងណាស់ដែរ។
ក្លឹបយក្សអេស្ប៉ាញនេះមានបំណងចំណាយ៥៥លានផោនសម្រាប់កីឡាករ វ៉ាន ដឺប៊ីក ប៉ុន្តែមិនទាន់មានការព្រមព្រៀងទាក់ទិននឹងកិច្ចព្រមព្រៀងនេះនៅឡើយទេ។
វ៉ាន ដឺប៊ីក ដែលមានកិច្ចសន្យាដល់ខែមិថុនាឆ្នាំ២០២២ ថ្មីៗនេះបាននិយាយសម្រាល ពីការចរចា ដើម្បីចាកចេញនៅខែនេះ៕ ប្រែសម្រួល: ពិសិដ្ឋ
