ក្រោយការចុះហត្ថលេខាលើកិច្ចព្រមព្រៀងពាណិជ្ជកម្មដំណាក់កាលទី១ជាមួយប្រធានាធិបតីអាម៉េរិក ដូណាល់ ត្រាំមក ឧបនាយករដ្ឋមន្ត្រីនិងជាប្រធានអ្នកចរចារពាណិជ្ជកម្មចិន លោកលីវ ហឹ បានចេញសេចក្តីថ្លែងការណ៍មួយនិងបាននិយាយថា ចិននិងអាម៉េរិកនឹងទទួលបានផលបើសិនជាសហការគា្ននិងភាគីទាំងពីរនឹងរងគ្រោះបើបន្តឈ្លោះគ្នា ដូច្នេះ «កិច្ចសហការគឺជាជំរើសត្រឹមត្រូវតែមួយគត់ ជាពិសេសនៅក្នុងយុគសម័យថ្មីនេះ»។
ប្រធានអ្នកចរចារពាណិជ្ជកម្មចិន លោកលីវ ហឹ ដឹកនាំការធ្វើសន្និសីទកាសែត ក្រោយការចុះហត្ថលេខា
លោកលីវ ហឹ បានបន្តថាចិននិងអាម៉េរិកត្រូវបង្កើនបរិយាកាសធុរកិច្ច ធ្វើអោយប្រសើរឡើងការគាំពារកម្មសិទ្ធិបញ្ញានិងលើកទឹកចិត្តកិច្ចសហការខាងបច្ចេកវិទ្យាដើម្បីជំរុញការប្រកួតប្រជែងដោយយុត្តិធម៌ហើយបង្កើតប្រព័ន្ធវាយតំលៃមួយសំរាប់ភាគីទាំងពីររកដំណោះស្រាយនៃជម្លោះ។
បើតាមលោកលីវ ចិននិងអាម៉េរិក មានមតិផ្សេងគ្នាអំពីពាណិជ្ជកម្មនិងភាគីទាំងពីរចង់ដោះស្រាយបញ្ហា ដូច្នេះភាគីទាំងពីរត្រូវដោះស្រាយបញ្ហាតាមការចរចានិង«ក្រោយពិភាក្សាគ្នាអស់២ឆ្នាំមក យើងដឹងថានេះជាដំណើរការជាប្រព័ន្ធមួយ។កិច្ចសហការមានសារសំខាន់។ចិននិងអាម៉េរិក ធ្វើអោយមានផលប៉ះពាល់វិជ្ជមានលើពិភពលោកទាំងមូល។យើងនឹងប្រើលទ្ធផលនៃកិច្ចព្រមព្រៀងដំណាក់កាលទី១នេះ ដើម្បីបង្ហាញថា ការចរចារបស់យើងកំពុងដំណើរការដើម្បីធ្វើអោយសេដ្ឋកិច្ចល្អប្រសើរឡើង»។
លោកឧបនាយករដ្ឋមន្ត្រីចិន បានបញ្ជាក់ថា ភាគីទាំងពីរត្រូវដោះស្រាយបញ្ហាតាមការចរចា និងថាការយកពន្ធខ្ពស់មិនជាដំណោះស្រាយល្អមួយទេ ហើយវាជាជំរើសត្រឹមត្រូវ ដែលអាម៉េរិកដកចិនចេញពីបញ្ជីប្រទេសលេងល្បិចរូបិយវត្ថុដើម្បីយកប្រៀបលើគូប្រជែង ៕ប្រែសម្រួល៖វាសនា