ដោយ:គង់ហេង/កំពង់ចាម៖កាលពីរសៀលថ្ងៃទី១៦ខែមករាឆ្នាំ២០២០ផ្ទះសង់អំពីឈើដំបូលប្រក់ក្បឿងចំនួនមួយខ្នងរបស់ប្រជាពលរដ្ឋនៅស្រុកកោះសូទិនបានដួលរលំបាក់រាបដល់ដីខណ:ក្រុមជាងបានរំកិលផ្ទះមួយខ្នងនេះថយក្រោយបានបន្តិច។ប៉ុន្តែពុំមានប៉ះពាល់ដល់អាយុជីវិតមនុស្សឡើយ។
លោកយិនវណ្ណ:អភិបាលស្រុកកោះសូទិនបានប្រាប់កាសែតរស្មីកម្ពុជាថាករណីរលំផ្ទះខាងលើបានកើតឡើងនៅភូមិព្រែករំចេកកើតឃុំពង្រស្រុកកោះសូទិន។ជាផ្ទះចាស់សង់ពីឈើនិងមានដំបូលប្រក់ក្បឿងទំហំទទឹង ប្រាំបី ម៉ែត្រនិងបណ្តោយប្រាំបួនម៉ែត្រជាកម្មសិទ្ធិរបស់គ្រួសារស្ត្រីវ៉េងសុវ៉ានអាយុ៥៣ឆ្នាំ។
លោកអភិបាលស្រុកបានដកស្រង់សម្តីម្ចាស់ផ្ទះបានឱ្យដឹងថាការដួលរលំនេះផ្ទះបានកើតឡើងបន្ទាប់ពីម្ចាស់ផ្ទះបានជួលក្រុមជាងជំនាញខាងរុញរំកិលផ្ទះរបស់គាត់ពីខាងមុខទៅកាន់ដីទំនេរផ្នែកខាងក្រោយដើម្បីទុកដីជាបរិវេណឱ្យទូលាយនៅខាងមុខផ្ទះវិញ។លោកវណ្ណ:បានបន្តថាប៉ុន្តែការរំកិលផ្ទះបានប្រមាណពីមួយទៅពីរម៉ែត្រពីទីតាំងចាស់ទំនងជាខុសបច្ចេកទេសក៏រអិលរនេលបណ្តាលឱ្យដួលរលំបាក់បែកធ្លាក់ផ្ទះរាបដល់ដីតែម្តង។
បញ្ហាបែបនេះគឺជាការទទួលខុសត្រូវរបស់ខាងក្រុមជាងរំកិលផ្ទះ។ដោយខាងនគរបាលបានចុះទៅពិនិត្យនិងជួយរុះរើយកឈើដែលនៅអាចប្រើការបាន ដើម្បីសាងសង់ម្ចាស់ផ្ទះឡើងវិញ៕S/
