ក្លឹប Tottenham បានសម្រេចកិច្ចព្រមព្រៀងខ្ចីជើងខ្សែបម្រើ ហ្គេដសិន ហ្វឺណានដេស (Gedson Fernandes) របស់ក្លឹប Benfica ។
កីឡាករវ័យ២១ឆ្នាំរូបនេះបានពិនិត្យសុខភាពរួចហើយជាមួយក្លឹប Tottenham កាលពីថ្ងៃច័ន្ទ មុនពេលសម្រេចកិច្ចព្រមព្រៀងផ្ទេររយៈពេល១៨ខែ។
ហ្វឺណានដេស បានទាក់ទាញចំណាប់អារម្មណ៍ពីក្លឹបជាច្រើននៅក្របខណ្ឌព្រីមីញ៉េលីក រួមទាំងក្លឹប West Ham ដែលជាគូប្រជែងរបស់ក្លឹប Spurs ផងដែរ ប៉ុន្តែបានក្លាយជាកីឡាករ ដំបូងដែលលោក ចូសេ ម៉ូរីញ៉ូ (Jose Mourinho) បានផ្ទេរមកក្លឹបនេះ។
កិច្ចព្រមព្រៀងខ្ចីជើង ហ្វឺណានដេស រួមបញ្ចូលជម្រើសទិញផ្តាច់ក្នុងតម្លៃ៥០លានផោននៅ ដំណាច់នៃកិច្ចសន្យាខ្ចីជើងផងដែរ។
លោក ម៉ូរីញ៉ូ បានងាកមករក ហ្វឺណានដេស ដើម្បីជួយពង្រឹងតំបន់បម្រើរបស់លោកស្រប ពេលកីឡាករ ម៉ូសា ស៊ីសូកូ (Mourssa Sissoko) មានបញ្ហារបួសយូរអង្វែង ហើយកីឡាករ គ្រីស្ទៀន អេរិកសិន (Christian Eriksen) គ្រោងចាកចេញនៅរដូវក្តៅនេះ៕ ប្រែសម្រួល: ពិសិដ្ឋ
