ដោយៈ មេសា/ភ្នំពេញៈ លោក ឈួរ សុបញ្ញា ប្រធាននាយកដ្ឋានសុខុមាលភាពសង្គម នៃ ក្រសួងសង្គមកិច្ច អតីតយុទ្ធជន និង យុវនីតិសម្បទា ដែលជាអ្នកដឹកនាំអនុវត្តផ្ទាល់នូវកម្មវិធីឧបត្ថម្ភសាច់ប្រាក់ដល់ស្ត្រីមានផ្ទៃពោះ និង កុមារអាយុក្រោម ២ ឆ្នាំក្នុងគ្រួសារក្រីក្រ បានលើកឡើងអំពីសារសំខាន់ នៃ អនុក្រឹត្តស្តីពី ការអនុវត្តន៍កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និង កុមារអាយុក្រោម ២ ឆ្នាំ ថា អនុក្រឹត្យដែលរាជរដ្ឋាភិបាលទើបតែចេញមកថ្មីៗនេះ ពិតជាមានតម្លៃខ្លាំងណាស់ សម្រាប់ការអនុវត្តន៍កម្មវិធីផ្តល់សាច់ប្រាក់ដល់ស្ត្រីមានផ្ទៃពោះ និង កុមារអាយុក្រោម ២ ឆ្នាំក្នុងគ្រួសារក្រីក្រ ។ មានតម្លៃខ្លាំង ព្រោះថាអនុក្រឹត្យនេះ គឺជាយន្តការធ្វើឱ្យក្រសួងស្ថាប័នពាក់ព័ន្ធ បញ្ចេញសកម្មភាពព្រមៗគ្នា និង ស៊ីសង្វាក់គ្នា សំដៅជំរុញឱ្យកម្មវិធីផ្តល់សាច់ប្រាក់នេះ មានប្រសិទ្ធភាព និង ប្រសិទ្ធផលចំពោះស្ត្រី និង កុមារក្នុងគ្រួសារក្រីក្រនៅទូទាំងប្រទេស ។
លោក ឈួរ សុបញ្ញា ពន្យល់បន្ថែមថា កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និង កុមារអាយុក្រោម ២ ឆ្នាំក្នុងគ្រួសារក្រីក្រ គឺជាកម្មវិធីការងារពហុវិស័យ និង អន្តរក្រសួង ហេតុនេះ ប្រសិនបើគ្មានអនុក្រឹត្យនេះទេ ក្រសួងស្ថាប័នពាក់ព័ន្ធ អាចនឹងមិនបញ្ចេញសកម្មភាពតាមតម្រូវការ និង ទាន់ពេលវេលាឡើយ ឬ ក៏អាចខ្វះសង្គតិភាព ( ភាពត្រូវ ឬ ស៊ីសង្វាក់គ្នា ) ហើយប្រសិនបើមានការអាក់ខាន ឬ យឺតយ៉ាវដោយក្រសួងស្ថាប័នណាមួយនោះ វានឹងនាំឱ្យមានភាពរអាក់រអួលក្នុងដំណើរការផ្តល់សាច់ប្រាក់នេះ ។
សូមជម្រាបថា ដើម្បី សម្រេចបានគោលដៅធ្វើឱ្យកម្ពុជា មានចំណូលមធ្យមកម្រិតខ្ពស់នៅឆ្នាំ ២០៣០ និង មានចំណូលខ្ពស់នៅឆ្នាំ ២០៥០ រាជរដ្ឋាភិបាលបានដាក់ចេញកម្មវិធីឧបត្ថម្ភសាច់ប្រាក់ដល់ស្ត្រីមានផ្ទៃពោះ និង កុមារអាយុក្រោម ២ ឆ្នាំក្នុងគ្រួសារក្រីក្រ សំដៅកសាងមូលធនមនុស្ស តាមរយៈលើកទឹកចិត្តដល់ស្ត្រីមានផ្ទៃពោះទៅពិនិត្យផ្ទៃពោះ និង សុខភាពទារកឱ្យបានទៀងទាត់ ហើយពេលសម្រាល ក៏ត្រូវទៅសម្រាលនៅមណ្ឌលសុខភាពដែរ ចៀសវាងទៅសម្រាលនៅកន្លែងណាផ្សេងដែលមិនមានវិជ្ជាជីវៈច្បាស់លាស់ អាចប្រឈមនឹងគ្រោះថ្នាក់ដោយប្រការណាមួយ ដល់ម្តាយ និង ទារក ហើយរាល់ការពិនិត្យ និង សម្រាលនោះទៀតសោត គឺស្ត្រីទាំងនោះ មិនតម្រូវឱ្យចំណាយថវិកាអ្វីឡើយ ដែលប្រការនេះគេអាចនិយាយម្យ៉ាងទៀតថា ពួកគាត់មិនត្រឹមតែមិនចំណាយថវិកាឡើយ ហើយក៏ថែមទាំងទទួលបានលុយទៀតផង ព្រោះរាល់ពេលទៅពិនិត្យសុខភាព និង ទៅសម្រាលនោះ ពួកគាត់ទទួលបានការឧបត្ថម្ភជាសាច់ប្រាក់ពីកម្មវិធីខាងលើងនេះទៀតផង ហើយប្រាក់ទាំងនោះ គឺពួកគេទទួលបានតាមរយៈគណនេយ្យធនាគារវីង គឺមិនមែនបើកពីមន្ត្រីណាម្នាក់ឡើយ ។
កម្មវិធីនេះ ត្រូវបានដឹកនាំអនុវត្តដោយក្រសួងសុខាភិបាលចាប់ពីខែ មិថុនា ឆ្នាំ ២០១៩ ហើយ ដើម្បី ពង្រីកវិសាលភាពឱ្យកាន់តែទូលំទូលាយគ្របដណ្តប់ទូទាំងប្រទេស កម្មវិធីនេះត្រូវបានផ្ទេរទៅឱ្យក្រសួងសង្គមកិច្ច អតីតយុទ្ធជន និង យុវនីតិសម្បទា ដែលមាននាយកដ្ឋានសុខុមាលភាពសង្គម ជាអ្នកដឹកនាំអនុវត្តផ្ទាល់ចាប់ពីថ្ងៃទី ០១ ខែ មករា ឆ្នាំ ២០២០ នេះតទៅ ។
ដើម្បីឱ្យស្ត្រី និង កុមារក្នុងគ្រួសារក្រីក្រគ្រប់ច្រកល្ហកនៅទូទាំងប្រទេសទទួលបានផលប្រយោជន៍ពីកម្មវិធីនេះ នាយកដ្ឋានសុខុមាលភាពសង្គម បានបណ្តុះបណ្តាលមន្ត្រី និង ជនបង្គោល គ្រប់រាជធានី ខេត្ត និង ឃុំ សង្កាត់ ទូទាំងប្រទេស ជាង ៨ ពាន់នាក់ បំពាក់ និង ដំឡើងប្រព័ន្ធបច្ចេកវិទ្យាគ្រប់គ្រងព័ត៌មាន និង ផ្តល់ប្លេត ជាង ១.៧០០ គ្រឿង ។
ក្រសួងសំខាន់ៗចំនួន ៥ ដែលពាក់ព័ន្ធនឹងកម្មវិធីនេះ គឺក្រសួងសង្គមកិច្ចដែលជាសាមីក្រសួង ក្រសួងសុខាភិបាល ក្រសួងមហាផ្ទៃ ក្រសួងផែនការ និង ក្រសួងសេដ្ឋកិច្ច ហើយស្ត្រីក្នុងគ្រួសារក្រីក្រដែលមានប័ណ្ណសមធម៌អាចទៅទទួលយកការឧបត្ថម្ភសាច់ប្រាក់នេះនៅមណ្ឌលសុខភាព ចំណែកស្ត្រីដែលគិតថាខ្លួនឯងក្រីក្រ ប៉ុន្តែមិនទាន់មានប័ណ្ណសមធម៌ អាចទៅទំនាក់ទំនងនៅ ឃុំ សង្កាត់របស់ខ្លួន ដើម្បី ធ្វើអត្តសញ្ញាណកម្ម មុននឹងទទួលបានផលប្រយោជន៍ពីកម្មវិធីនេះ ។
ថ្លែងនៅក្នុងពិធីប្រគល់ ថេប្លេត ចំនួន ១.៧២៥ គ្រឿង កាលពីថ្ងៃទី ៣០ ខែ ធ្នូ ឆ្នាំ ២០១៩ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និង យុវនីតិសម្បទា បានមានប្រសាសន៍អំពីគោលជំហរបស់រដ្ឋាភិបាលចំពោះកម្មវិធីឧបត្ថម្ភសាច់ប្រាក់នេះថា រាជរដ្ឋាភិបាល មានឆន្ទៈច្បាស់លាស់ ពោលគឺពិតជាមានបំណងឧបត្ថម្ភសាច់ប្រាក់ដល់ស្ត្រីមានផ្ទៃពោះក្នុងគ្រួសារក្រីក្រ និង កុមារអាយុក្រោម ២ ឆ្នាំ ពិតប្រាកដមែន ហើយថវិកា មិនមែនជាបញ្ហាទេ គឺរាជរដ្ឋាភិបាលមានប្រាក់គ្រប់គ្រាន់សម្រាប់ធ្វើការងារនេះ ! ដូច្នេះអ្នកប្រតិបត្តិផ្ទាល់ ក៏ដូចជាអ្នកពាក់ព័ន្ធទាំងឡាយ ត្រូវតែមានឆន្ទៈច្បាស់លាស់ និង ចាំបាច់ក៏ត្រូវតែមានចំណេះដឹងឱ្យបានគ្រប់គ្រាន់ ដើម្បី ធ្វើការងារដ៏មានសារសំខាន់នេះ ឱ្យមានប្រសិទ្ធភាព សមតាមបំណងរបស់រាជរដ្ឋាភិបាល ៕ Kh/Ha
