នៅឆ្នាំ ២០១៩ ជីវភាពរស់នៅរបស់ប្រជាជនចិនបានផ្លាស់ប្តូរយ៉ាងច្រើន ។ ការធ្វើដំណើរកាន់ តែមានភាពងាយស្រួល ប្រព័ន្ធធានារ៉ាប់រងគ្របដណ្តប់លើវិស័យកាន់តែច្រើន សេវាកម្ម បណ្តាញអ៊ីនធើណេតមានល្បឿនកាន់តែលឿននិងមានតម្លៃកាន់តែទាប ។ ក្រសួងផ្សេងៗ បានសម្រេចនូវគោលដៅអំពីការលើកកម្ពស់ជីវភាពរស់នៅរបស់ប្រជាជនដែលលើកឡើង នៅដើមឆ្នាំ ២០១៩ ហើយបានធ្វើឱ្យប្រជាជនចិនមានជីវភាពរស់នៅកាន់តែល្អប្រសើរ ។
ការធ្វើដំណើរកាន់តែមានភាពងាយស្រួល ។ គិតមកដល់ពេលនេះ ប្រទេសចិនបានសាងសង់ និងជួសជុលផ្លូវប្រវែង ២៩ ម៉ឺនគីឡូម៉ែត្រក្នុងតំបន់ជនបទ ដែលលើសពីគោលដៅដែល បានកំណត់ ហើយបានសាងសង់ផ្លូវក្រាលស៊ីម៉ង់ត៍ ឬកៅស៊ូនៅឃុំ និងភូមិខ្លះមុនពេលកំណត់ ។ ជាពិសេស ប្រទេសចិនបានសម្រេចនូវការតភ្ជាប់ទីក្រុងចំនួន ២៧៥ និងស្រុកចំនួន ៤៤៨ ដោយប្រើសំបុត្រជិះឡានក្រុងតែមួយ ។
នៅឆ្នាំ ២០១៩ ប្រទេសចិនបានដាក់ឱ្យប្រើប្រាស់នូវខ្សែរថភ្លើងល្បឿនលឿនជាង ១០ ខ្សែ ដែលមានប្រវែងសរុបជាង ៥០០០ គីឡូម៉ែត្រ ។ ខ្សែរថភ្លើងល្បឿនលឿនទូទាំងប្រទេសចិន មានប្រវែងសរុបជាង ៣,៥ ម៉ឺនគីឡូម៉ែត្រ ជាប់លំដាប់លេខ ១ លើពិភពលោក ។
សេវាកម្មបណ្តាញអ៊ីនធើណេតមានល្បឿនកាន់តែលឿន និងមានតម្លៃកាន់តែថោក ។ នៅចុងឆ្នាំ ២០១៩ រដ្ឋាភិបាលចិនបានប្រកាសនូវរបាយការណ៍ការងាររដ្ឋាភិបាល ជាសាធារណៈ ។ តាមរបាយការណ៍នេះបានឱ្យដឹងថាប្រទេសចិនបានសម្រេចនូវគោល ដៅអំពីការបង្កើនល្បឿន និងបន្ថយតម្លៃនៃការប្រើបណ្តាញអ៊ីនធើណេត ។ រដ្ឋាភិបានចិន បានចាត់វិធានការពិសេសមួយចំនួនធំដូចជាបន្ថយចំណាយនៃការប្រើបណ្តាញអ៊ីនធើណេត របស់សហគ្រាសធុនតូចនិងមធ្យម ផ្តល់សេវាកម្មបណ្តាញអ៊ីនធើណេតដែលមានតម្លៃ ពិសេសសម្រាប់មនុស្សចាស់ និងប្រជាជនដែលមានចំណូលទាបផ្តល់ការអនុគ្រោះដល់ គ្រួសារក្រីក្រ និងបន្ថយតម្លៃនៃការប្រើប្រាស់បណ្តាញអ៊ីនធើណេតតាមទូរស័ព្ទរបស់ប្រជាជន ចិនដីគោកនៅពេលធ្វើដំណើរទៅតំបន់ហុងកុងនិងម៉ាកាវជាដើម ។
នៅខែមិថុនា ឆ្នាំ ២០១៩ ក្រសួងឧស្សាហកម្ម និងព័ត៌មានវិទ្យាចិនបានផ្តល់អាជ្ញាប័ណ្ណសេវា ៥G ដល់ក្រុមហ៊ុន CHINA TELECOM, CHINA MOBILE, CHINA UNICOM និងក្រុមហ៊ុន វិទ្យុនិងទូរទស្សន៍ចិន ។ នេះបានបង្ហាញឱ្យឃើញថា ប្រទេសចិនបានឈានចូលក្នុង យុគសម័យសេវា ៥G ជាផ្លូវការ ។ ក្នុងឆ្នាំថ្មីនេះ យុគសម័យសេវា ៥Gនឹងជំរុញការតភ្ជាប់គ្នា នូវវត្ថុអ្វីៗទាំងអស់ ហើយនឹងនាំមកនូវការផ្លាស់ប្តូរច្រើនគួរឱ្យកត់សម្គាល់ដល់ជីវភាព រស់នៅរបស់ប្រជាជន ព្រមទាំងជំរុញការអភិវឌ្ឍសេដ្ឋកិច្ចសង្គម ។
ប្រព័ន្ធធានារ៉ាប់រងផ្តល់កិច្ចធានាកាន់តែពេញលក្ខណៈដល់ប្រជាជន ។ នៅថ្ងៃទី ១៥ ខែកញ្ញា ឆ្នាំ ២០១៩ វេបសាយសេវាកម្មប្រព័ន្ធធានារ៉ាប់រងបានត្រូវប្រកាសឱ្យប្រើប្រាស់ជាផ្លូវការ ។ គិតមកដល់ពេលនេះ ប្រជាជនចិនដែលកាន់ប័ណ្ណធានារ៉ាប់រងសង្គមកិច្ចមានចំនួនជាង ១៣០០ លាននាក់ ដែលបានគ្របដណ្តប់លើប្រជាជន ៩៣% ។ រដ្ឋាភិបាលចិនបានផ្តល់ ប័ណ្ណធានារ៉ាប់រងសង្គមកិច្ចអេឡិចត្រូនិចជាង ៨០ លានសន្លឹក ។ គិតមកដល់ចុងខែតុលា ឆ្នាំ ២០១៩ ក្នុងចំណោមប្រជាជនក្រីក្រដែលបានចុះបញ្ជីនៅប្រទេសចិន មាន ៥៩,៧៧ លាននាក់បានចូលរួមក្នុងប្រព័ន្ធធានារ៉ាប់រងចាស់ជរា ។
សព្វថ្ងៃ ខេត្តចំនួន ២៣ និងតំបន់ស៊ីនជាំងនៃប្រទេសចិនបានដាក់ចេញនូវគោលនយោបាយ អំពីការកែសម្រួលស្តង់ដារធានារ៉ាប់រងចាស់ជរា ហើយមានខេត្តចំនួន ១០បានលើកកម្ពស់ កម្រិតនៃប្រាក់ឧបត្ថម្ភសម្រាប់មនុស្សចាស់ដែលចូលរួមប្រព័ន្ធធានារ៉ាប់រងចាស់ជរា ៕ ដោយ លី ជឹន (កាសែតប្រជាជន ដេលី)
