ដោយ៖តារារិទ្ធ(ភ្នំពេញ)៖ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន បានអញ្ជើញចូលរួមក្នុងពិធីជប់លៀងអបអរសាទរពិធីបុណ្យ ចូលឆ្នាំប្រពៃណីជនជាតិវៀតណាមឆ្នាំ ២០២០ ជាមួយសហគមន៍និងធុរកិច្ចវៀតណាមនៅកម្ពុជានាល្ងាចថ្ងៃទី ១៧ ខែមករា ២០២០ នៅសណ្ឋាគារសុខារាជ ធានីភ្នំពេញ ដើម្បីបង្ហាញអំពីចំណងមិត្តភាព សាមគ្គីភាពជាប្រពៃណី ជាពិសេសការពង្រឹងភាពជាដៃគូពីគ្រប់ភាគីពាក់ព័ន្ធនិងកិច្ចសហប្រតិបត្តិការរវាងប្រទេស ទាំងពីរកម្ពុជាវៀតណាម។
សម្តេចតេជោ ហ៊ុន សែន ក្នុងនាមរាជរដ្ឋាភិបាល និងប្រជាជនកម្ពុជាបានសម្ដែងនូវការអបអរសាទរចំពោះការរីកចម្រើនយ៉ាងឆាប់រហ័សលើគ្រប់វិស័យរបស់វៀត ណាម ជាពិសេសការសម្រេចបាននូវកិច្ចព្រមព្រៀងពាណិជ្ជកម្មសេរីរវាងវៀតណាមនិងសហភាពអឺរ៉ុបដែលនឹងជំរុញឲ្យមានកំណើនសេដ្ឋកិច្ចពាណិជ្ជកម្មនិងទេសចរណ៍ជាមួយនឹងលំហូរវិនិយោគបរទេសក្នុងប្រទេសវៀតណាមក៏ដូចជាបណ្ដាប្រទេសជិតខាងនិងតំបន់ រួមទាំងកម្ពុជាផងដែរ ដែលជាការរួមចំណែកក្នុងការលើកកម្ពស់កំណើនសេដ្ឋកិច្ចជាពិសេសឬការលើកស្ទួយជីវភាពរស់នៅរបស់ប្រជាជននៃប្រទេសទាំងពីរ។
សម្តេចតេជោ ហ៊ុន សែន បានបង្ហាញសុទិដ្ឋិនិយមចំពោះវិស័យវិនិយោគទុនជាតិនិងបរទេសទាំងអស់ ជាពិសេសវិនិយោគិនវៀតណាមដែលនឹងជ្រើសរើសកម្ពុជាជាគោលដៅវិនិយោគដ៏មានសក្តានុពលសម្រាប់ដំណាក់កាលនៃការវិនិយោគដំបូងឬការពង្រីកអាជីវកម្មរបស់ខ្លួនបន្តទៀត ស្របតាមគោលការណ៍របស់រាជរដ្ឋាភិបាលស្តីពីការលើកទឹកចិត្តសម្រាប់ការវិនិយោគនិងការធ្វើធុរកិច្ចដោយគ្មានការរើសអើង មានលក្ខណៈប្រកួតប្រជែងស្មើភាពដល់ការការពារនូវសិទ្ធិនិងផលប្រយោជន៍ស្របច្បាប់សម្រាប់ការវិនិយោគលើគ្រប់វិស័យដើម្បីពង្រីកទំហំពាណិជ្ជកម្មរវាងប្រទេសទាំងពីរសម្រេចបានតាមគោលដៅដែលបានគ្រោងទុក ។
សម្តេចតេជោ ហ៊ុន សែន បានមានប្រសាសន៍ថា៖ទំហំពាណិជ្ជកម្មរវាងកម្ពុជានិងវៀតណាមបានលើសពី៥ពាន់២រយលានដុល្លារអាម៉េរិក តួលេខនេះគឺជាតួលេខដែលយើងជឿជាក់បាន ព្រោះថាអ្វីដែលជាតួលេខដែលយើងបានកត់ត្រានៅតាមរយៈជើងលេខគយនោះមិនមែនមិនឆ្លុះបញ្ចាំងពីការពិតនោះទេ។សម្តេចបានបន្តថា យ៉ាងហោចណាស់វៀតណាមបានជួយទិញស្រូវពីកម្ពុជាក្នុងចន្លោះពី ១ លានទៅ ២ លានតោនក្នុងមួយឆ្នាំដែលមិនបានកត់ត្រានៅក្នុងជើងលេខរបស់គយនោះទេ មូលហេតុទាំងនេះហើយដែលយើងអំពានាវឱ្យមិត្តវៀតណាមវិនិយោគនៅកម្ពុជាដោយសារវិនិយោគិនវៀតណាមមានលទ្ធភាពច្រើននៅក្នុងការកែច្នៃ ដូច្នេះការវិនិយោគទៅលើឧស្សាហកម្មកែច្នៃនៅក្នុងកម្ពុជាវាមានប្រយោជន៍សម្រាប់ប្រជាជនកម្ពុជា ក៏ដូចជាសម្រាប់ធុរកិច្ចវៀតណាមដែលធ្វើសកម្មភាពនៅទីនេះ ។
គួរបញ្ជាក់ថា នេះជាឆ្នាំទីមួយហើយដែលសម្តេចតេជោនាយករដ្ឋមន្ត្រីបានជួបពិសាបាយជាមួយសហគមន៍និងធុរកិច្ចវៀតណាមនៅកម្ពុជា ។ សម្តេចតេជោ ហ៊ុន សែន សង្ឃឹមថាឆ្នាំក្រោយមុនពេលចូលឆ្នាំវៀតណាមនឹងមានការជួបគ្នាជាបន្តទៀត ដោយសម្តេចសង្ឃឹមថាការជួបគ្នាបែបនេះដើម្បីពង្រឹងនូវចំណងមិត្តភាពនិងបង្កើននូវជំនឿទុកចិត្តរវាងគ្នាទៅវិញទៅមក ហើយជាពិសេសគឺពង្រឹងនូវការជឿទុកចិត្តសម្រាប់វិនិយោគិនវៀតណាមនៅកម្ពុជា ៕/Ha
