Home ព័ត៌មានជាតិ នយោបាយ ស្ថាន​បេសកកម្...

ស្ថាន​បេសកកម្ម​អចិន្ត្រៃយ៍​កម្ពុជា​ប្រចាំ​នៅ​អង្គការសហប្រជាជាតិ​ប្រតិកម្ម​អ្នករាយការណ៍​ពិសេស​ចំនួន​បី​រូប

ដោយៈ​មុនី​រ័ត្ន​/​ភ្នំពេញ​៖​ស្ថាន​បេសកកម្ម​អចិន្ត្រៃយ៍​នៃ​ព្រះរាជាណាចក្រ​កម្ពុជា​ប្រចាំ​ការិយាល័យ​អង្គការសហប្រជាជាតិ​នៅ​ទីក្រុង​ហ្សឺ​ណែវ​ ត្រូវបាន​រំខានដោយ​និង​សូម​ច្រានចោល​ការចេញផ្សាយ​ព័ត៌មាន​របស់​អ្នករាយការណ៍​ពិសេស​ចំនួន​បី​រូប​កាលពី​ថ្ងៃទី​១៧​ខែមករា​ឆ្នាំ​២០២០​ ក្រោម​ហេតុផល​នយោបាយ​និង​មានបំណង​បំភ័ន្ត​សាធារណជន អំពី​ដំណើរការ​សវនាការ​លើ​ជនជាប់ចោទ លោក កឹម សុខា​។​

​ដូច​ពេលកន្លងមក​ដែរ ​ស្ថាន​បេសកកម្ម​អចិន្ត្រៃយ៍​កម្ពុជា​សូម​សម្តែង​នូវ​ការសោកស្តាយ​ជា​ពន់ពេក​ចំពោះ​ការប្រព្រឹត្តិ​មិន​ស្របតាម​វិជ្ជាជីវៈ​របស់​អ្នកជំនាញ​ខាងលើ​ដែល​មិនមែនជា​មន្ត្រី​អង្គការសហប្រជាជាតិ​និង​គ្រាន់តែ​បំពេញការងារ​ក្នុងឋានៈ​ផ្ទាល់ខ្លួន ​ប៉ុន្តែ​តាំងខ្លួន​ជា​ចៅក្រម​នៅក្នុង​កិច្ចការ​តុលាការ​និង​ផ្ទៃក្នុង​របស់​រដ្ឋ​អធិបតេយ្យ​មួយ​។

​ស្ថាន​បេសកកម្ម​អចិន្ត្រៃយ៍​កម្ពុជា​សូម​រំលឹក​អ្នកជំនាញ​ទាំងនោះ​ថា ​នៅ​ប្រទេស​កម្ពុជា​ ក៏​ដូច​សង្គម​ប្រជាធិបតេយ្យ​ដទៃទៀត​ បុគ្គល​បំពាន​ច្បាប់​ត្រូវ​រង​ការចោទប្រកាន់​និង​កាត់ទោស​ដោយ​ឈរលើ​មូលដ្ឋាន​នៃ​បទល្មើស​ដែល​បាន​ប្រព្រឹត្ត​និង​មិន​ផ្អែកលើ​ឋានៈ​នយោបាយ​ឡើយ​។​ឋានៈ​ជា​អ្នកនយោបាយ​មិន​ថា​ស្ថិតនៅក្រោម​ស្លាក​បក្សប្រឆាំង​ឬ​អត់​ ពុំបាន​ផ្តល់​សិទ្ធិ​ឱ្យ​បុគ្គល​នោះ​ធ្វើ​សកម្មភាព​ដោយ​និ​ទណ្ឌ​ភាព​ទេ​។​

ហេតុផល​បុគ្គល​ឬ​នយោបាយ​មិនអាច​ប្រើប្រាស់​ជាទ​ឡ្ហីករ​ណ៍​សម្រាប់​ការប្រព្រឹត្តិ​បទល្មើស​ឡើយ​។ បទ​ចោទ​លើ​លោក​កឹម​សុខា​មានចែង​យ៉ាងច្បាស់​នៅក្នុង​ក្រមព្រហ្មទណ្ឌ​របស់​កម្ពុ​ជា (​មាត្រា ៤៥១ និង​៤៥៣)​ហើយ​វិធានការ​ច្បាប់​ចំពោះ​គាត់​នាពេល​កន្លងមក​បាន​ត្រូវអនុវត្ត​ស្របតាម​ច្បាប់​ពាក់ព័ន្ធ​របស់​ប្រទេស រួមទាំង​រដ្ឋធម្មនុញ្ញ​។​

​ការនិយាយ​យោង​របស់​អ្នករាយការណ៍​ពិសេស​ទៅនឹង​ទស្សនៈ​របស់​”​ក្រុមការងារ​ស្តីពី​ការឃុំខ្លួន​តាម​អំពើ​ចិត្ត​” (​ហៅ​កាត់​ថា ” ក្រុមការងារ​”)​ដែលជា​បណ្តុំ​បុគ្គល​ប្រាំ​រូប​រួមគ្នា មិន​ត្រឹមតែ​ពុំមាន​សំអាង​ត្រឹមត្រូវ ហើយ​ថែមទាំង​បង្កឲ្យមាន​ការភ័ន្តច្រឡំ​ទៀត​។​បុគ្គល​ទាំង​ប្រាំ​រូប​ពុំមែន​ជាម​ន្ត្រី​អង្គការសហប្រជាជាតិ​ គ្រាន់តែ​បំពេញការងារ​ក្នុងឋានៈ​ផ្ទាល់ខ្លួន​ដែល​ពុំមាន​ការយល់ដឹង​ជាក់ស្តែង​ស្តីពី​ស្ថានភាព​ច្បាប់​និង​នយោបាយ​របស់​ប្រទេស​កម្ពុជា​។​ទស្សនៈ​ឬ​សេចក្តីសន្និដ្ឋាន​របស់​”​ក្រុមការងារ​”​នេះ​ពុំមាន​ទម្ងន់​អ្វី​ទាល់តែសោះ​ រាប់ទាំង​ទម្ងន់​ផ្លូវច្បាប់​មកលើ​រដ្ឋ​អធិបតេយ្យ​មួយ​ ហើយ​ស្ថាន​បេសកកម្ម​អចិន្ត្រៃយ៍​សូម​បដិសេធ​ចំពោះ​សេចក្តីសន្និដ្ឋាន​របស់ ” ក្រុមការងារ ” នេះ​ដែល​ពុំបាន​គោរព​តាម​របប​ធ្វើ​ការងារ​ត្រឹមត្រូវ​។​

​ការចោទប្រកាន់ថា លោក កឹម សុខា ត្រូវបាន​ឃុំខ្លួន​លើស​រយៈពេល​កំណត់ដោយ​ច្បាប់ គឺជា​ការ​បំផ្លើស និង​បង្ហាញ​យ៉ាងច្បាស់​អំពី​ការយល់ដឹង​នៅមានកម្រិត ឬ​ពុំមាន​ឆន្ទៈ​ចង់​យល់​អំពី​នីតិវិធី​តុលាការ​របស់​ប្រទេស​កម្ពុជា ពី​សំណាក់​អ្នកជំនាញ​ទាំងនោះ​។ ការពិត​គឺថា លោក កឹម សុខា បាន​ត្រូវ​ដោះលែង​កាលពី​ថ្ងៃទី​០៩ ខែកញ្ញា ឆ្នាំ​២០១៨ ក្រោម​ការត្រួតពិនិត្យ​ផ្លូវ​តុលាការ ដោយមាន​លក្ខខណ្ឌ​​ជាក់លាក់​។នេះ​មានន័យថា គាត់​ពុំ​ស្ថិតក្រោម​របប​នៃ​ការឃុំខ្លួន​មុន​សវនាការ ដែលមាន​រយៈពេល​អតិបរមា​១៨​ខែ​នោះឡើយ​។​លោក​កឹម​សុខា​ពុំ​ស្ថិត​ក្នុងការ​ឃុំឃាំង​ក្នុងផ្ទះ​ទេ​។​

សូម​រំលឹក​អ្នកជំនាញ​ឲ្យប្រើ​ប្រាស់​វាក្យ​ស័ព្ទ​ច្បាប់​ឱ្យបាន​ត្រឹមត្រូវ​នៅក្នុង​សេចក្តីថ្លែងការណ៍​របស់​ខ្លួន ​ប្រសិនបើ​ពុំមាន​បំណង​ធ្វើឱ្យ​សាធារណជន​យល់​ខុស​និង​ភ័ន្តច្រឡំ​។​ដោយ​ស្ថិតនៅ​ជា​ជនជាប់ចោទ​នៅឡើយ​ លោក​កឹម​សុខា​ពុំ​អាចធ្វើ​ដំណើរ​ចាក​ចេញពី​ព្រំដែន​កម្ពុជា​ ​ហើយ​មិនត្រូវ​ចូលរួម​ក្នុង​សកម្មភាព​នយោបាយ​ណាមួយ​ទេ​។​

​ការចោទប្រកាន់​របស់​អ្នករាយការណ៍​ពិសេស​ខាងលើ​អំពី​កង្វះ​ការចូលរួម​ជា​សាធារណៈ​នៅក្នុង​បន្ទប់​សវនាការ ​បង្ហាញ​យ៉ាងច្បាស់​ថា​ការវាយតម្លៃ​របស់​អ្នកជំនាញ​ទាំងនោះ​អំពី​កម្ពុជា​បាន​ផ្អែកលើ​តែ​ប្រភពព័ត៌មាន​ពុំបាន​ផ្ទៀ​ង​ផ្ទាត់​និង​មិនអាច​ទុកចិត្តបាន​។​នៅ​គ្រប់​ប្រទេស​ប្រជាធិបតេយ្យ​ទាំងអស់​ការសម្រេច​ឲ្យចូល​ទៅក្នុង​បន្ទប់​សវនាការ​តែងតែ​ជា​ឆន្ទានុសិទ្ធិ​របស់​តុលាការ​ ដោយ​ពិចារណា​លើ​ទំហំ​ជាក់ស្តែង​នៃ​បន្ទប់​សវនាការ​ សណ្តាប់​ធ្នាប់​និង​ការប្រព្រឹត្តិទៅ​នៃ​ការ​ជំនុំជម្រះ​។​

​មាន​តំណាង​អង្គទូត​ជាច្រើន​ចូលរួម​ ហើយ​ពុំមាន​កៅអី​នៅសល់​ទំនេរ​ទុកចោល​ទេ​។​ស្ថាន​បេសកកម្ម​អចិន្ត្រៃយ៍​យល់ថា ​ការលើកឡើង​របស់​អ្នករាយការណ៍​ពិសេស​ថា​កង្វះខាត​ការចូលរួម​ជា​សាធារណៈ​នៅក្នុង​បន្ទប់​សវនាការ ​មានន័យ​ស្មើនឹង​កង្វះ​យុត្តិធម៌ ​គឺជា​ការ​ចំអក​លើ​បទដ្ឋាន​នៃ​វិជ្ជាជីវៈ​ច្បាប់​និង​តុលាការ​ទាំងស្រុង​។​
​ជា​ចុងក្រោយ ស្ថាន​បេសកកម្ម​អចិន្ត្រៃយ៍​ទទូច​ដល់​អ្នករាយការណ៍​ពិសេស​ទាំងអស់ គោរព​ឱ្យ​បាន​ខ្ជាប់ខ្ជួន​នូវ “​ក្រម​ប្រតិបត្តិ​សម្រាប់​តំណាង​អាណត្តិ​នៃ​នីតិវិធី​ពិសេស​របស់​ក្រុមប្រឹក្សា​សិទ្ធិមនុស្ស ” នៅពេល​បំពេញ​មុខងារ​ខ្លួន​រួមទាំង​ការចេញ​សេចក្តីថ្លែងការណ៍​សាធារណៈ​ដែល​អាច​ត្រូវ​បកស្រាយ​ថា​ជាការ​ជ្រៀតជ្រែក​ក្នុង​ប្រព័ន្ធយុត្តិធម៌​កម្ពុជា​៕S/​Ha

ទីតាំងផ្សាយពាណិជ្ជកម្ម

- Advertisment -

Most Popular

ក្រសួង​អប់រំ​ជូនដំណឹង​ពី​...

ដោយ​:​ដេប៉ូ​/​ភ្នំពេញៈ​នៅ...

​កំណាត់​ផ្លូវ​៥ ខ្សែ ដែល​...

​ដោយៈ រ៉ា​ម៉ន / ភ្នំពេញៈ ...

ស្ថានទូត​ជប៉ុន​ប្រកាស​លុប...

ដោយៈ ជា​សីហៈ / ភ្នំពេញ​៖ ...