Home ព័ត៌មានជាតិ នយោបាយ សម្ដេច​ពិជ័យ​...

សម្ដេច​ពិជ័យ​សេនា​អញ្ជើញ​ពិនិត្យ​ការដ្ឋាន​សាងសង់​ផ្លូវ​នៅ​ខេត្ត​ព្រះសីហនុ​

ដោយ​: ប៉ែន​ខុន / ភ្នំពេញ​: សម្តេច​ពិជ័យ​សេនា​ទៀ បាញ់ ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួងការពារជាតិ អមដំណើរ​ដោយ​លោក​ឧ​ប​នាយ​រដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី​នគ​រូបនីយកម្ម និង​សំណង់ លោក សាយ សំ​អាល់ រដ្ឋមន្ត្រី​ក្រសួងបរិស្ថាន លោក គួច ចំរើន អភិបាលខេត្ត​ព្រះសីហនុ និង​មន្ត្រី​ពាក់ព័ន្ធ​ជាច្រើនរូប​ទៀត អញ្ជើញ​ពិនិត្យ​ការដ្ឋាន​សាងសង់​ផ្លូវ​មួយចំនួន ដែល​អនុវត្ត​ដោយ​កងវិស្វកម្ម​លេខ​១៧៨​ស្ពាន​ថ្នល់​ក្រសួង​ការពារ​ជាតិ ក្នុងចំណោម​ផ្លូវ​៣៤​ខ្សែ​នៅក្នុង​ខេត្ត​ព្រះសីហនុ ​នា​ព្រឹក​ថ្ងៃទី​១៨​ខែមករា​ឆ្នាំ​២០២០​។​

​ការសាងសង់​ផ្លូវ​ចំនួន​៣៤​ខ្សែ ដែលមានប្រវែង​ជាង​៨០​គីឡូម៉ែត្រ នៅក្នុង​ក្រុង​ព្រះសីហនុ​ មកទល់នឹងពាក់កណ្តាល​ខែមករា​ឆ្នាំ​២០២០ សម្រេចលទ្ធផល​បាន​ប្រមាណ ជា​៣០​ភាគរយ​នៃ​គម្រោង​ហើយ បន្ទាប់ពី​បើក​ការដ្ឋាន​ជាផ្លូវការ​ក្រោម​អធិបតីភាព​ដ៏​ខ្ពង់ខ្ពស់​របស់​សម្តេចអ​គ្គមហា​សេនាបតី​តេ​ជោ ហ៊ុន សែន នាយករដ្ឋមន្ត្រី កាលពី​ថ្ងៃទី​១៦ ខែវិច្ឆិកា​ឆ្នាំ​២០២៩​រួចមក​និង​នៅ​ថ្ងៃទី​១៥​ខែមករា​ផ្លូវ​អូរត្រេះ​បានចាប់ផ្តើម​ចាក់​បេតុង​។​

​លោក គួច ចំរើន អភិបាលខេត្ត​ព្រះសីហនុ​បាន​ប្រាប់​ឱ្យ​រស្មី​កម្ពុជា​ដឹងថា គ្រប់​ការដ្ឋាន​ផ្លូវ​ទាំង​៣៤​ខ្សែ ដែល​បាន​បើក​ការដ្ឋាន​សាងសង់​ជា​ផ្លូវការក្រោម​អធិបតី​ភាព​ដ៏​ខ្ពង់ខ្ពស់​របស់​សម្តេច​តេ​ជោ​នាយករដ្ឋមន្ត្រី កាលពី​ថ្ងៃទី​១៦ ​ខែវិច្ឆិកា​ឆ្នាំ​២០១៩ រហូតមកដល់​ត្រឹម​ថ្ងៃនេះ​(១៥​មករា​ឆ្នាំ​២០២០) ជា​លទ្ធផល​សម្រេចបាន​ប្រមាណ​ជា​៣០​ភាគរយនៃ​គម្រោង​ហើយ​។​

​ការដ្ឋាន​សាងសង់​ផ្លូវ​ទាំង​៣៤​ខ្សែ ដែល​បាន​អនុវត្ត​ដោយ​ក្រុមហ៊ុន​ឯកជនចំនួន​៦​និង​កងវិស្វកម្ម​ចំនួន​ពីរ​គឺ​កងវិស្វកម្ម​សម្តេច​តេ​ជោ​ហ៊ុន សែន​សៀមរាប​និង កងវិស្វកម្ម​លេខ​១៧៨​ស្ពាន​ថ្នល់​នៃ​ក្រសួងការពារជាតិ គិតពី​ថ្ងៃទី​១៦​ខែវិច្ឆិកា​ឆ្នាំ ២០១៩ ដែលជា​ថ្ងៃ​បើក​ការដ្ឋាន​ជា​ផ្លូវ​ការមកដល់​ត្រឹម​ថ្ងៃទី​១៥​ខែមករា​ឆ្នាំ​២០២០ នេះ គឺមាន​រយៈពេល​ពីរ​ខែគ​ត់​។​

​លោក គួច ចំរើន បាន​និយាយ​ឱ្យដឹងទៀតថា ការសាងសង់​ផ្លូវ​នេះ​ជាទូទៅ មាន​ល្បឿន​លឿន​ ព្រោះ​កន្លែង​ខ្លះ​ធ្វើ​ទាំងយប់ ទាំង​ថ្ងៃ​និង​យឺត​នៅ​កន្លែង​ខ្លះ​ដោយសារបច្ចេកទេស​ដាក់លូ​តែ​បាន​ដោះស្រាយ​ហើយ​។ ថ្ងៃនេះ​(១៥​មករា​) ផ្លូវ​អូរត្រេះ បានចាប់ផ្តើម​ចាក់​បេតុង​ហើយ​។ ចំណែក​ចំណត​ផ្លូវ​នៅ​ជិត​រង្វង់​មូល​ជំទាវ​ម៉ៅ កំពុងត្រូវបាន​បន្ទាប ដើម្បី​ងាយស្រួល​ធ្វើចរាចរណ៍​ឡើង​ចុះ​។​

​នៅ​ក្រុងព្រះសីហនុ​ពេលនេះ ផ្លូវ​មួយណា​ក៏ត្រូវ​បាន​គេ​មើលឃើញកំពុងធ្វើការ​សាងសង់យ៉ាងសកម្ម ដូច្នេះ​ការធ្វើ​ចរាចរណ៍​ពិតជា​ត្រូវ​ជួប​ការលំបាក​។ មិនមែន តែ​ផ្លូវ​ចាស់​នៅក្នុង​ក្រុង​នោះទេ​ដែល​កំពុង​សម្រុក​សាងសង់ ផ្លូវ​ថ្មី​កាត់​ព្រៃ​តាម ឆ្នេរ ក៏ត្រូវ​បាន​សម្រុក​សាង​សង់​ឱ្យទាន់ពេលដែរ​។​

​រំលឹក​ឱ្យដឹងថា​ ផ្លូវ​ចំនួន​៣៤​ខ្សែ​មាន​ប្រវែង​សរុប​៨៤.៥០៥​ម៉ែត្រ កំពុង​ត្រូវ បានធ្វើ​ការសាងសង់​ដោយ​ក្រុមហ៊ុន​ឯកជន​ចំនួន​៦ និង​អង្គភាព​របស់​រដ្ឋ​ចំនួន​ពីរ នៅ​ក្រុងព្រះសីហនុ​នេះ ជា​គម្រោង​ដែល​បានលើកឡើងដោយ​គណៈកម្មាធិការ ជាតិ​គ្រប់គ្រង​និង​អភិវឌ្ឍន៍​តំបន់ឆ្នេរ​សមុទ្រ​កម្ពុជា ដែលមាន​លោក​ឧបនាយក​រដ្ឋ មន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី​នគរូបនីយកម្ម​និង​សំណង់​ជា​ប្រធាន តាំងពី​ឆ្នាំ​២០១៨​មក​។ ផ្លូវ​ទាំង​៣៤​ខ្សែ​នេះ​ចាក់​ដោយ​បេតុង​កម្រាស់​០.២៥​ម៉ែត្រ និង​អ៊ុតបេ​ទី​ម​បន្ថែម​ពីលើ​កម្រាស់​០.០៦​ម៉ែត្រ​៕ ល​/Ha

ទីតាំងផ្សាយពាណិជ្ជកម្ម

- Advertisment -

Most Popular