Home ព័ត៌មានអន្តរជាតិ ថៃ​ពិចារណា​ហា...

ថៃ​ពិចារណា​ហាម​ប្រើប្រាស់​រថយន្ត​ឯកជន ដោយសារ​ផ្សែង​អ័ព្ទ​ខ្លាំង​រហូត​ដល់​បិទ​សាលារៀន​

​រដ្ឋាភិបាល​ថៃ​កំពុង​ពិចារណា​ថា​តើ​គួរ​ចេញ​បម្រាម​ប្រើ​រថយន្ត​ផ្ទាល់ខ្លួន​នៅ​តំបន់​ជួប​ផ្សែង​អ័ព្ទ​ខ្លាំងៗ​ដែរ​ឬ​អត់ ដើម្បី​ដោះស្រាយ​កំណើន​នៃ​កំហាប់​ភាគល្អិត​PM2.5​នៅក្នុង​ខ្យល់អាកាស​។​

​សំណើ​ពិបាក​អនុវត្ត​នេះ​ត្រូវបាន​លើកឡើង​កាលពី​ថ្ងៃ​អង្គារ​ទី​២១​មករា ដោយ​នាយក​រដ្ឋមន្ត្រី ប្រា​យុទ្ធ ចាន់​អូ​ចា ក្រោយ​ធ្វើ​កិច្ចប្រជុំ​គណៈរដ្ឋមន្ត្រី​ចល័ត​មួយ​​នៅក្នុង​ខេត្ត​ណារ៉ាត​ធី​វ៉ាត​។​លោកនាយក​រដ្ឋមន្ត្រី បាន​និយាយថា មានតែ​សេវា​គមនាគមន៍​សាធារណៈ​ទេ​ដែល​នឹង​អនុញ្ញាត​ឲ្យ​ប្រើ​ផ្លូវ ឬ​ធ្វើ​ចរាចរណ៍​ក្នុង​អំ​​ឡុង​ពេល​ហាមឃាត់​។​

​លោក​ប្រា​យុទ្ធ បានបញ្ជាក់​ថា រដ្ឋាភិបាល​ត្រៀម​ចូល​អន្តរាគមន៍ និង​ដាក់​ចេញ​វិធានការ​ដូច្នេះ ក្នុងករណី​កម្រិត​ភាគ​ល្អិត​PM2.5​ឡើង​ហួស​កម្រិត​សុវត្ថិភាព​ខ្លាំង​។​

​លោក​ប្រា​យុទ្ធ​បានឲ្យដឹងថា រដ្ឋាភិបាល​បាន​ចាប់ផ្តើម​ការងា​រលើ​ផែនការមេ​រយៈពេល​យូរអង្វែង​មួយ ដើម្បី​ទប់ស្កាត់​ការ​បំពុលបរិយាកាស រួម​មាន​ការបង្កើត​​រថភ្លើង​ដើរ​ដោយ​អគ្គិសនី និង​ដូរ​រថយន្តក្រុង​ប្រើ​ម៉ា​ស៊ូ​ត​ជាមួយនឹង​រថយន្ត​ប្រើ​អគ្គិសនី​។​

​កាលពី​ថ្ងៃ​អង្គារ អភិបាលក្រុង​បាងកក​បាន​បញ្ជា​ឲ្យបិទ​សាលារៀន​៤៣៧​នៅ​ក្រុង​បាងកក​នៅ​ថ្ងៃ​ពុធ​ទី​២២​មករា ដោយសារ​ការព្យាករណ៍​បង្ហាញថា ផ្សែង​អ័ព្ទ​​ឬ​កំហាប់​ភាគល្អិត​បង្ក​គ្រោះថ្នាក់​សុខភាព​PM2.5 កើនឡើង​។​គិត​មក​ត្រឹម​ម៉ោង​៦​ល្ងាច​ថ្ងៃ​អង្គារ កម្រិត​PM2.5 នៅ​បាងកក​មាន​រង្វង់​ពី​៧១​ទៅ​៨៦​ក្នុង​មួយ​ម៉ែត្រ​​ត្រី​គុណ ហើយ​ខ្ពស់បំផុត​គឺ​៩៩​នៅ​ខេត្ត​សា​រ៉ា​ប៊ូ​រី ។​

​សូមបញ្ជាក់​ថា កម្រិត​PM2.5​ដែល​គេ​ចាត់ទុកថា​មិន​ប៉ះពាល់​ដល់​សុខភាព​គឺ​ត្រឹម​៣៥​ចុះ​។​ភាគ​តូច​ល្អិត​PM2.5 នេះ​រួមមាន​ធូលី ផ្សែង​និង​លំអង​ផ្សែង​។​

​នៅ​ប៉ុន្មាន​ឆ្នាំ​មកនេះ គុណភាព​ខ្យល់​នៅ​ថៃ​កាន់តែ​ចុះ​អាក្រក់​ទៅ​និង​វា​តែង​កើត​ឡើង​នៅ​ឆ្នាំ​ថ្មី​រវាង​ខែវិច្ឆិកា​ដល់​មីនា​ចំពេល​គេ​ប្រមូល​ផល​អំពៅ​ដែល​ពួក​ក​សិ​​ករ​តែង​ដុត​សម្អាត​ដើម​មុន​នឹង​កាប់​។​ក្រោយ​ប្រមូល​ផល សំណល់​ក្នុង​ចម្ការ​ក៏ត្រូវ​ដុត​ចោល​ជា​ថ្មី ដើម្បី​ត្រៀម​ដី​ដាំ​ដុះ​ជាថ្មី​។​

​រដ្ឋាភិបាល​បាន​ហាម​ការដុត​សំណល់​ដំណាំ​រួម​មាន​ជញ្ជ្រាំង​ស្រូវ​ក្នុង​អំឡុង​ខែ​មករា​និង​កុម្ភៈ តែ​ពួកកសិករ​នៅ​តែ​ដុត​ដោយសារ​វា​ជា​មធ្យោបាយ​អស់​សោហ៊ុយ​តិច​។​

​ការដុត​សំណល់​ដំណាំ​មិនមែនជា​ប្រភព​តែមួយ​ដែល​បង្ក​ផ្សែង​អ័ព្ទ​នៅ​ថៃ​ទេ ផ្សែង​ចេញពី​យានយន្ត អាកាសធាតុ​តាម​រដូវ​(​ខ្យល់​តិច​)​និង​ការបញ្ចេញ​ផ្សែង​ពី​ឧស្សា​​ហ​កម្ម​ក៏​ជា​កក្តា​ត្រូវ​បន្ទោស​ផង​ដែរ​៕​ដោយៈ​វាសនា​/HA

​ផ្សែង​ដ៏​ក្រាស់​គ្រប​លើ​ផ្លូវ​នៅ​ជាប់​ចំការ​អំពៅ​ក្នុង​ខេត្ត​ស៊ូ​ផាន ប៊ូ​រី ប្រទេស​ថៃ កាលពី​ថ្ងៃ​២១​មករា​។​ការដុត​សម្អាត​សំបក​អំពៅ​មុន​និង​ក្រោយ​ការប្រមូល​ផល​អំពៅ​​ជា​មូលហេតុ​មួយ​ដែល​បង្ក​ផ្សែង​អ័ព្ទ​ប្រចាំ​ឆ្នាំ​នៅ​ថៃ​

ទីតាំងផ្សាយពាណិជ្ជកម្ម

- Advertisment -

Most Popular

លោកស្រី អោ​ង សាន ស៊ូ​ជី​៖...

ដោយៈ​តារា​រិ​ទ្ធ​/​ភ្នំពេ...

ចាប់ផ្ដើម​សាងសង់​អគារ​សាល...

ដោយ​៖​រ៉ា​ម៉ន / ភ្នំពេញ​៖...

រាវ​រកឃើញ​គ្រាប់​យុទ្ធ​ភ័...

ដោយ​: ប​.​ជ័យ / បន្ទាយមាន...

លោកនាយ​ឧត្ដមសេនីយ៍ ម៉ឹង ស...

ដោយ​: វ៉ៃ​កូ / ខេត្តស្វាយ...