អាជ្ញាធរ​ជាតិ​អប្សរា​បើក​កម្មវិធី​អប់រំ​បេតិកភណ្ឌ​ដល់​កុមារ​នៅ​សាលាបឋមសិក្សា​ក្របី​រៀល​សម្រាប់​ឆ្នាំ​២០២០

183
ចែករម្លែក

ដោយ​: បាយ័ន / សៀមរាប​: នៅ​ព្រឹក​ថ្ងៃទី​២២ ខែមករា ឆ្នាំ​២០២០ ក្រុមការងារ​អប់រំ​បេតិកភណ្ឌ​នៃ​អាជ្ញាធរ​ជាតិ​អប្សរា សហការ​ជាមួយ​អង្គការ​គាំពារ​កេរ​មរតក បាន​បើក​កម្មវិធី​អប់រំ​បេតិកភណ្ឌ​សម្រាប់​ឆ្នាំ​សិក្សា​ថ្មី នៅ​សាលាបឋមសិក្សា​ក្របី​រៀល សង្កាត់​ក្របី​រៀល ក្រុង​សៀមរាប ដែលមាន​ការអញ្ជើញ​ចូលរួម​ពី​លោកនាយក នាយករង គ្រូ​បន្ទុក​ថ្នាក់ ក្រុមការងារ​អប់រំ​បេតិកភណ្ឌ​ចំនួន​៤​រូប និង​សិស្សានុសិស្ស​ចំនួន​២២០​រូប​។​អាជ្ញាធរ​ជាតិ​អប្សរា​បញ្ជាក់​ឱ្យដឹង​នៅ​ព្រលប់​ថ្ងៃទី​២២ ខែមករា​នេះ​។​

​លោក អ៊ុន មណី​នី​តា តំណាង​ក្រុមការងារ​អប់រំ​បេតិកភណ្ឌ បាន​ពន្យល់​ណែនាំ​ពី​គោលការណ៍​គម្រោង តម្រូវការ​គម្រោង​និង​សកម្មភាព​គម្រោង​ឱ្យ​លោកគ្រូ អ្នកគ្រូ បាន​ស្វែងយល់​ជាមុន ដើម្បី​ងាយស្រួល​ដឹកនាំ​និង​ជំរុញ​ដល់​សិស្ស​សម្រាប់​ការអនុវត្ត​កម្មវិធី​នេះ​។ លោក​បាន​បន្តថា ក្នុង​កម្មវិធី​អប់រំ​បេតិកភណ្ឌ​សម្រាប់​ឆ្នាំ​សិក្សា​ថ្មី លោក​ស្នើសុំ​បង្រៀន​រយៈពេល​៨​ខែ ចាប់ពី​ខែមករា​ដល់​ខែកក្កដា ឆ្នាំ​២០២០ ដោយ​បែងចែក​ការបង្រៀន​ជា​២​ផ្នែក គឺ​បង្រៀន​ក្នុង​ថ្នាក់​ឱ្យ​យល់ដឹង​ពី​មូលដ្ឋាន​នៃ​បេតិកភណ្ឌ​វប្បធម៌ និង​បង្រៀន​ក្រៅ​ថ្នាក់ គឺ​នាំ​សិស្ស​ទៅ​សិក្សា​ស្ថានភាព​ជាក់ស្តែង​នៅតាម​រមណីយដ្ឋាន​វប្ប​ធម៌​នានា​ក្នុង​តំបន់​អង្គរ​។​

​គោលបំណង​នៃ​កម្មវិធី​នេះ​បង្កើតឡើង​ដើម្បី​ផ្ដល់ឱកាស​ឱ្យ​កុមារ​ដែល​កើត​និង​រស់នៅក្នុង​តំបន់​រមណីយដ្ឋាន​វប្ប​ធម៌​-​ប្រវត្តិសាស្ត្រ យល់ដឹង​ពី​កេរ​មរតក​វប្បធម៌​របស់ខ្លួន​និង​បណ្ដុះ​គំនិត​កុមារ​ឱ្យ​ជ្រួតជ្រាប​ពី​តម្លៃ​មរតក​វប្បធម៌ ជាពិសេស ពួកគេ​អាច​ធ្វើជា​អ្នក​ស្នង​មរតក​វប្បធម៌​នៅ​សហគមន៍​របស់ខ្លួន​លើ​វិស័យ​ថែរក្សា​ការពារ គ្រប់គ្រង​កេរ​មរតក​វប្បធម៌​នាពេល អនាគត​បាន​យ៉ាង​ល្អ​៕ ល​

អាជ្ញាប័ណ្ណចែកចាយផ្តាច់មុខ