ប្រទះឃើញ​សក​សព ក្នុង​សភាព​ដុត​ឆេះ​ខ្លោច នៅមុខ​វត្ត​តា​ភេ​ម សង្ស័យ​ជា​ករណី​ឃាតកម្ម​

231
ចែករម្លែក

ដោយ​: ចាន់តូ / ភ្នំពេញ​: សាកសព​បុរស​ម្នាក់​ត្រូវបាន​ប្រទះឃើញ​ភ្លើង​ឆេះ​រោល​ខ្លោច ស្លាប់​យ៉ាង​អាណោច​អា​ធ័​ម មិនដឹងថា​មាន​ជនដៃដល់​សម្លាប់​ហើយ​ដុតបំផ្លាញ​សាកសព​ចោល​ ឬ​យ៉ាងណា​នោះទេ ត្រូវបាន​ប្រជាពលរដ្ឋ​ប្រទះឃើញ នាព្រឹកថ្ងៃទី២៣មករា២០២០ នៅ​ទីវាលផ្នូរ​កប់​សាកសព (​ម៉ុង​ចិន​) មុខ​វត្ត​តា​ភេ​ម ភូមិ​តា​ភេ​ម សង្កាត់​កំបូល ខណ្ឌ​កំបូល​។​

​សាកសព​មិនទាន់​ស្គាល់​អត្ត​សញ្ញាណ ភេទ​ប្រុស អាយុ​ប្រហែល​ជាង​៣០​ឆ្នាំ​។​

​តាម​ប្រជាពលរដ្ឋ​បាន​ឲ្យ​ដឹងថា កាលពី​វេលា​ម៉ោង​១​រសៀល ថ្ងៃទី​២២ ខែមករា ឆ្នាំ​២០២០​ម្សិលមិញ គេ​ឃើញ​មាន​បុរស​ម្នាក់ កាន់​យួរកំប៉ុង​ស្រា​បៀរ ដើរចូល​ទី​ចំណុចកើតហេតុ មួយសន្ទុះ​ក្រោយមក បុរស​រូបនោះ​បាន​ដើរ​ចាកចេញ​វិញ​ដោយ​ខ្លួន​ទទេ ហើយ​ទីនោះក៏មាន​ភ្លើង​ឆេះ​ស្មៅព្រៃ គ្មាន​អ្នក​ចាប់អារម្មណ៍ គិតថាក្រែង​មាន​អ្នក​ជម្រះ​ស្មៅ សម្អាតផ្នូរ​ចិន ស្រាប់តែ​នៅវេលា​ម៉ោង​៧​ព្រឹក ថ្ងៃទី​២៣ ខែមករា នេះ​មាន​ពលរដ្ឋដើរ​ដាក់មង​ទាក់​សត្វ ដើរកាត់​តាម​ទី​ខាងលើ ក៏​ប្រទះឃើញមាន​សាកសព​មនុស្ស ភ្លើង​ឆេះ​រោល​ខ្លោច​ទៅវិញ ប្រាប់​អ្នកភូមិ រាយការណ៍​ទៅ​សមត្ថកិច្ច ចុះទៅ​ពិនិត្យមើល​។​

​នៅ​កន្លែងកើតហេតុ នា​ព្រឹក​ថ្ងៃទី​២៣ នេះ សមត្ថកិច្ច​មិនទាន់មាន​ការសន្និដ្ឋាន​ណាមួយជុំវិញ​ការស្លាប់​បុរស​រូប​នេះដែរ​។ នៅក្បែរ​សាកសព មាន​សម្បក​កំប៉ុង​ស្រា​បៀរ ស្បែកជើង រីឯ​សាកសព​វិញភ្លើង​ឆេះខ្លោច​រោល លែង​ស្គាល់មុខ​ទៅហើយ ឆេះ​អាវសល់​ខោ​កាគី​ជើង​ខ្លី ហោ​ប៉ៅ​៤ ពណ៌​ទឹកដោះគោ ដែល​ជនរងគ្រោះ​ស្លៀក​។​

​ក្រោយពី​ប្រទះឃើញ កម្លាំង​សមត្ថកិច្ចមូលដ្ឋាន លោក ហង្ស មុន្នី អធិការ​ខណ្ឌ​កំបូល វត្តមាន​ចុះទៅពិនិត្យ​ផ្ទាល់​ដល់ទី​តាំង​កើតហេតុ និង​រង់ចាំ​សមត្ថកិច្ច​ជំនាញ ចុះទៅ​ធ្វើ​កោសល្យ​វិច័យ​។ តែ​សន្និដ្ឋាន​បឋម សង្ស័យ​ជា​ករណី​ឃាតកម្ម សម្លាប់​ហើយដុតបំផ្លាញ​សាកសព តែ​ទោះជា​យ៉ាងណាក្តី រង់ចាំ​ជំនាញ​ពិនិត្យ​កោសល្យវិច័យ និង​ស្រាវជ្រាវពី​ស្ថាប័ន​សមត្ថកិច្ច​ជំនាញ​៕ ល​/Ha

អាជ្ញាប័ណ្ណចែកចាយផ្តាច់មុខ