សែន​ចូលឆ្នាំ​ចិន សូមកុំ​ស្រវឹង​ខ្មែរ​!

​ពិធី​សែន​ចូលឆ្នាំថ្មី​ចិន​ឆ្នាំនេះ ធ្វើឡើង នា​ថ្ងៃ​សុក្រ ទី​២៤ ខែមករា​នេះហើយ​។​ ពិធី​ចូល ឆ្នាំ​ចិន រយៈពេល​បី​ថ្ងៃ ចាប់ផ្តើម​ពីថ្ងៃ​ទី​២៥-២៧ ខែមករា​។ ជា​រៀងរាល់ឆ្នាំ ខ្មែរ​កាត់​ចិន និង​ជនជាតិ ចិន​ដែល​រស់នៅ​កម្ពុជា​យើង តែងតែ​ប្រារព្ធ​ពិធី​ចូលឆ្នាំថ្មី យ៉ាង​អធិកអធម ក្នុងនោះ​បងប្អូន ខ្មែរ​យើង ដែល​ជាប់​ខ្សែស្រឡាយ​ចិន និង​តាម​ទម្លាប់​ពី​កុងម៉ា​មក បានរៀបចំ​ពិធី​សែន និង​អ្នកខ្លះ បានធ្វើ​ដំណើរ​ទៅ​ស្រុកកំណើត ជួបជុំ​ក្រុមគ្រួសារ ជាដើម​។​
​ ​
ជាការ​កត់សម្គាល់​នៅ​ថ្ងៃ​សែន​ចូលឆ្នាំ​ចិន គេ​ក៏​តែងតែ​ឃើញ​សឹង​គ្រប់​ផ្ទះ ប្រជាពលរដ្ឋ​ខ្មែរយើងបានរៀបចំ​សែន ហើយ​អ្នក​មិន​សែនក៏​ស្កាត់​ជួបជុំ​បងប្អូនមិត្តភក្តិ ដើម្បី​ជួបជុំ និង​ផឹកស៊ីជា​ក្រុមៗ​។​
​ ​
និយាយ​ពី​ការផឹកស៊ី​គ្រឿង​ស្រវឹង​វិញ គឺ​ស្ទើរតែ​គ្រប់​ផ្ទះ មិន​ថា នៅ​ភ្នំពេញ ឬ​នៅ​ខេត្ត និង​នៅ ជនបទ​ណា​ទេ​។​ពិសេស​នោះ ឲ្យ​តែមាន​ពិធី​ជួបជុំ ហើយ​ពេលនេះ សែន​ចូលឆ្នាំ​ចិន​ទៀត គឺ​ប្រជាពលរដ្ឋ​ខ្មែរ​យើង​មួយចំនួន ទាំងចាស់ ទាំង​ក្មេង និង​ទាំងស្រី ទាំងប្រុស បាន​ជួបជុំ ផឹកស៊ី​យ៉ាង​សប្បាយរីករាយ​។​

​ក៏ប៉ុន្តែ​សូមមេត្តា កុំ​ផឹក​ឲ្យ​ស្រវឹង​ពេក​។​បើ​ស្រវឹង សូមមេត្តា កុំ​បើកបរ សូម្បីតែ​ជិះ​កង់ ហើយ ទោះបីជា​ដើរ​ឆ្លងកាត់​ផ្លូវ​ក៏ដោយ​ក៏​សូមកុំ​ឲ្យ​សោះ​។ ពេល​ស្រវឹង មិន​ត្រឹមតែ​គ្រោះថ្នាក់​តែ ខ្លួនឯង​ទេ គឺអាច​បង្ក​គ្រោះថ្នាក់​ដល់​អ្នកដទៃ​ថែម​ទៀតផង​។ ក្រៅពី​អ្នក​ស្រវឹង​ចរាចរណ៍​តាម ដងផ្លូវ ក៏​មមាញឹក​ជាង​ថ្ងៃ​ធម្មតា ។​ដូច្នេះ​អ្នកបើកបរ​ទាំងអស់ សូមមេត្តា​បង្កើន​ការប្រុងប្រយ័ត្ន យោគយល់ អធ្យាស្រ័យ និង​កុំ​បើកបរ​លឿនៗ​ពេក​។​

​របាយការណ៍​របស់​ប៉ូលិស​ចរាចរណ៍ បង្ហាញថា ក្នុងអំឡុងពេល​បុណ្យចូលឆ្នាំ​ចិន កាលពី ឆ្នាំ​២០១៩ រាប់​ចាប់​ពីថ្ងៃ​សែន និង​ថ្ងៃ​ចូលឆ្នាំ​ចិន ពីថ្ងៃ​ទី​៤ ដល់​ថ្ងៃទី​៧ ខែកុម្ភៈ ឆ្នាំ​២០១៩ នៅ​ទូទាំងប្រទេស គ្រោះថ្នាក់​ចរាចរណ៍​ផ្លូវគោក បានកើត​ឡើង ៦៧​លើក បណ្តាល​ឲ្យ​ស្លាប់ ៣៦​នាក់ និង​របួស ៨៩​នាក់​។ បើ​ធៀប​នឹង​ឆ្នាំមុន គឺ​អំឡុងពេល​ចូលឆ្នាំ​ចិន នៅ​ឆ្នាំនេះ ចំនួន​គ្រោះថ្នាក់​ចរាចរណ៍ បាន​កើនឡើង តែ​ចំនួន​អ្នកស្លាប់ និង​អ្នករបួស បាន​ថយចុះ​។

គ្រោះថ្នាក់​ចរាចរណ៍​ផ្លូវគោក រយៈពេល​បួន​ថ្ងៃ ក្នុងអំឡុងពេល​ចូលឆ្នាំ​ចិន កាលពី​ឆ្នាំ​២០១៨ គឺ​ចាប់ពី​ថ្ងៃទី​១៥-១៨ ខែកុម្ភៈ គ្រោះថ្នាក់​ចរាចរណ៍​ផ្លូវគោក នៅ​ទូទាំងប្រទេស បានកើត​ឡើង ៦៦​លើក បណ្តាល​ឲ្យ​ស្លាប់ ៤៤​នាក់ និង​របួស ៩១​នាក់​។​

​ក្រៅពីនេះ​បើ​មានការ​ជួបជុំ​ផឹកស៊ី​ហើយ ពិសេស​នៅតាម​ជនបទ​ភូមិ​ឃុំ​នានា សូមមេត្តា​កុំ បង្កជម្លោះ​។ ជម្លោះ​មិនមាន​អ្វី​ចំណេញ​ទេ ហើយ​រឹតតែ​មិនគួរ​ទៀត​នោះ គឺ​បង្កជម្លោះ​ហើយ ថែមទាំង​បង្ក​ហិង្សាវាយ​កាប់​ចាក់ ឬក៏​រហូតដល់​បាញ់បណ្តាល​ឲ្យ​របួស ឬក៏​ស្លាប់ ក៏​សូមមេត្តាកុំ​ឲ្យ​សប្បាយក្លាយជា​ទុក្ខ​ឲ្យ​សោះ​។​

​ក៏​ដូចគ្នា​ដែរ អំឡុងពេល ពិធី​សែន​ចូលឆ្នាំ​ចិន​នេះ ក៏​សូម​ប្រជាពលរដ្ឋ ពិសេស​អ្នក​នៅ​ភ្នំពេញ មេត្តា​ប្រុងប្រយ័ត្ន​ភ្លើង​តាមរយៈ​ការដុត​ក្រដាសសែន ទៀនធូប និង​ភ្លើង អគ្គិសនី ជាដើម​។ ការដុត​ក្រដាសសែន គួរតែមាន​ធុង​ដែក ត្រឹមត្រូវ ហើយ​មុនពេល​ចាក​ចេញពីផ្ទះ​ក៏​គួរ​ពិនិត្យ ភ្លើងទៀន ពិសេស​ភ្លើងអគ្គិសនី​។​
​ ​
យ៉ាងណាក៏ដោយ ប្រពៃណី ចូលឆ្នាំ​ចិន ជា​រៀងរាល់​ឆ្នាំនេះ បាន​បង្កើន​ចំណូល​មិនតិច​ទេ ពិសេស​ចំណូល​ដល់​អ្នកលក់​គ្រឿង​តុបតែង​លម្អ​ផ្ទះ និង​សាច់​បន្លែ ជាដើម​។ ក្រៅ ពីនេះ ក៏​ផ្តល់​ចំណូល​ដល់​ជាតិ និង​តំបន់​ទេសចរណ៍ តាមរយៈ​ការដើរ​កម្សាន្ត​របស់​ប្រជាពលរដ្ឋ ខ្មែរ​យើង​។ ក្នុងនោះ នៅពេល​ប៉ុន្មាន​ឆ្នាំ​ចុង​ក្រោយនេះ ប្រជាពលរដ្ឋ​ខ្មែរ​យើង​មួយចំនួនធំ ក្រៅពី​ដើរលេង​តាម​រមណីយដ្ឋាន តំបន់​ទេសចរណ៍ ក្នុងស្រុក​ហើយ ក៏បាន​ជិះ​យន្តហោះ ចេញទៅ​លេង​នៅ​បរទេស​ថែម​ទៀតផង​។​
​ ​
ជារួម ការរៀបចំ​សែន​ចូលឆ្នាំថ្មី​ចិន ការជួបជុំ​ផឹកស៊ី ការដើរ​លេង​ទាំង​ក្នុង​និង​ទាំង​ក្រៅ​ស្រុក​ក្នុង អំឡុងពេល​ចូលឆ្នាំ​ចិន​នេះ សូម​ធ្វើ​ដោយ​ប្រុងប្រយ័ត្ន ប្រកបដោយ​សេចក្តីសុខ ហេង​ហេង និង​រកស៊ី​មានបាន​គ្រប់ៗ​គ្នា​តទៅទៀត​។ សូម​សប្បាយ​ដោយ​ការទទួលខុសត្រូវ និង​ចូរ​ចង ចាំ​ថា ចូលឆ្នាំ​ចិន មិនគួរ​ខ្មែរ​យើង​ស្រវឹង ហើយក៏​រឹតតែ​មិនគួរ​សប្បាយ ក្លាយជា​ទុក្ខ​នោះទេ​៕ ដោយៈ ម៉េង​ឆៃ​

ទីតាំងផ្សាយពាណិជ្ជកម្ម

- Advertisment -

Most Popular

អ្នករងគ្រោះ​ពុល​ស្រា ត្រូ...

​ដោយៈ ទេ​ពក​ង្រី / កំពង់ឆ...

សម្តេច​តេ​ជោ​ប្រាប់​ពលរដ្...

ដោយៈ​តារា​រិ​ទ្ធ​/​ភ្នំពេ...

តើ​អ្វី​ទៅជា​ទិវា​ពិភពលោក...

ដោយៈ ជា​សីហៈ​/​ភ្នំពេញៈ ថ...

តុលាការ​ឃុំខ្លួន អ្នកម៉ៅក...

ដោយៈ ស​រិ​ទ្ធ / ភ្នំពេញៈ ...