Home ព័ត៌មានជាតិ នយោបាយ ​វេទិកា​ស្តីព...

​វេទិកា​ស្តីពី «​សិទ្ធិ​ស្ដ្រី​» នៅ​ភូមិ​គោក​សំព័រ​ ​ក្នុងស្រុក​អន្លង់វែង​

បណ្ឌិត លី សុខ​ឃាង នាយក​មជ្ឈមណ្ឌល​សន្តិ​ភាព​អន្លង់វែង​នៃ​មជ្ឈមណ្ឌល​ឯកសារ​កម្ពុជា ជួបពិភាក្សា​ជាមួយ​ស្ត្រី​ចំនួន​២០​នាក់ មកពី​ភូមិ​គោក​សំព័រ ស្រុក​អន្លង់វែង ខេត្ដ​ឧត្ដរមានជ័យ នៅក្នុង​វេទិកា​ស្តីពី «​សិទ្ធិ​ស្ដ្រី​» ដែល​ត្រូវ​បានរៀបចំ​ធ្វើ​នៅ​វត្ត​គិរី​ជលសារ កាលពី​ព្រឹក​ថ្ងៃទី​២១ ខែមករា ឆ្នាំ​២០២០

ដោយៈ​សួត វិចិត្រ​/ ​ភ្នំពេញៈ​កាលពី​ព្រឹក​ថ្ងៃទី​២១ ខែមករា ឆ្នាំ​២០២០ មជ្ឈមណ្ឌល​សន្ដិភាព​អន្លង់វែង នៃ​មជ្ឈមណ្ឌល​ឯកសារ​កម្ពុជា បាន​សហការ​ជាមួយ​អាជ្ញាធរ​មូលដ្ឋាន បង្កើត​វេទិកា​ស្ដីពី «​សិទ្ធិ​ស្ដ្រី​» នៅក្នុង​ភូមិ​គោក​សំព័រ ស្រុក​អន្លង់វែង ខេត្ដ​ឧត្ដរមានជ័យ ដែលមាន​ប្រជាជន​ចូលរួម​សរុប​ចំនួន​២០​នាក់​។


វេទិកា​ស្តីពី​សិទ្ធិ​ស្ដ្រី​នេះ រៀបចំឡើង​ក្នុង​គោលបំណង​លើកកម្ពស់​នូវ​សិទ្ធិ​ចូលរួម​របស់​ស្ដ្រី​នៅក្នុង​សហគមន៍ ការ​ឈរឈ្មោះ​ជា​អ្នកតំណាង និង​ការដឹកនាំ​លើ​វិស័យ​នានា ដែល​ស្ដ្រី​គួរតែ​ត្រូវបាន​រួមចំណែក​ក្នុង​កិច្ចការ​អភិវឌ្ឍន៍​សហ​គម​ន៍​របស់ខ្លួន​។ ស្ដ្រី​រមែង​ទទួល​បានការ​គាំពារ​ពី​សង្គម ដែល​អាច​ឲ្យ​ស្ដ្រី​ជៀសផុត​ពី​ការទទួល​រង​នូវ​អំពើ​ហិ​ង្សា និង​ភាព​រឹតត្បិត​ទៅលើ​មុខងារ ឬ​តួនាទី​របស់​ស្ដ្រី​ក្នុង​សហគមន៍​ទាំងមូល​។

បណ្ឌិត លី សុខ​ឃាង នាយក​មជ្ឈមណ្ឌល​សន្តិ​ភាព​អន្លង់វែង​នៃ​មជ្ឈមណ្ឌល​ឯកសារ​កម្ពុជា ជួបពិភាក្សា​ជាមួយ​ស្ត្រី​ចំនួន​២០​នាក់ មកពី​ភូមិ​គោក​សំព័រ ស្រុក​អន្លង់វែង ខេត្ដ​ឧត្ដរមានជ័យ នៅក្នុង​វេទិកា​ស្តីពី «​សិទ្ធិ​ស្ដ្រី​» ដែល​ត្រូវ​បានរៀបចំ​ធ្វើ​នៅ​វត្ត​គិរី​ជលសារ កាលពី​ព្រឹក​ថ្ងៃទី​២១ ខែមករា ឆ្នាំ​២០២០


វេទិកា​នេះ​ចាប់ផ្ដើម​ឡើង​ដោយ​មតិ​សំណេះសំណាល​របស់​បណ្ឌិត​លី​សុខ​ឃាង នាយក​មជ្ឈមណ្ឌល​សន្ដិ​ភាព​អន្លង់វែង និង​ជា​វាគ្មិន​ផ្នែក​ប្រ​វ​ត្ដិ​សាស្ដ្រ​ទៅកាន់​ប្រជាជន​ដែលមាន​វត្ដ​មាននៅ​ក្នុង​អង្គ​វេទិកា​នេះ​។​បណ្ឌិត លី សុខ​ឃាង បាន​ឆ្លៀតឱកាស​សួរសុខទុក្ខ​ស្ត្រី​ដែល​បាន​ចូលរួម ព្រមទាំង​បានបង្ហាញ​នូវ​គម្រោង​កិច្ចការ​នានា​របស់​មជ្ឈមណ្ឌល​សន្ដិភាព​អន្លង់វែង​ដែល​ធ្លាប់បាន​អនុវត្ដ​កន្លងមក​។ ក្នុងនោះដែរ ក៏មាន​សៀវភៅ «​ប្រ​វ​ត្ដិ​សាស្ដ្រ​សហគមន៍​អន្លង់វែង​» ចំនួន​១០​ក្បាល ដែល​ត្រូវបាន​ចែកជូន​ប្រជាជន​នៅក្នុង​វេទិកា​នេះ​។​


​ក្រោយពី​កិច្ច​សំណេះសំណាល​ត្រូវបាន​បញ្ចប់ កម្មវិធី​ក៏​ចាប់ផ្តើម​លើកយក អំពី​ប្រ​វ​ត្ដិ​សាស្ដ្រ​សហគមន៍​អន្លង់វែង​មក​ពិភាក្សា លើក​អំពី​បញ្ហា​ប្រឈម​របស់​ស្ដ្រី​ក្នុង​សហគមន៍ និង​លើក​អំពី​ដំណើរការ​អភិវឌ្ឍ​ន៍ស​ហគ​មន៍​អន្លង់វែង​តាមបែប​ប្រ​វ​ត្ដិ​សាស្ដ្រ​តាមរយៈ​ប្លង់គោល​ស្រុក​អន្លង់វែង​។ កិច្ចពិភាក្សា​នេះ បានអនុញ្ញាត​ឲ្យ​ប្រជាជន​ចោទ​ជា​សំណួរ និង​ការបញ្ចេញ​មតិយោបល់​ទៅលើ​បញ្ហា​ទាំងឡាយណា​ដែល​ប្រជាជន​នៅក្នុង​សហគមន៍​ធ្លាប់បាន​ជួបប្រទះ​។​

បណ្ឌិត លី សុខ​ឃាង នាយក​មជ្ឈមណ្ឌល​សន្តិ​ភាព​អន្លង់វែង​នៃ​មជ្ឈមណ្ឌល​ឯកសារ​កម្ពុជា ជួបពិភាក្សា​ជាមួយ​ស្ត្រី​ចំនួន​២០​នាក់ មកពី​ភូមិ​គោក​សំព័រ ស្រុក​អន្លង់វែង ខេត្ដ​ឧត្ដរមានជ័យ នៅក្នុង​វេទិកា​ស្តីពី «​សិទ្ធិ​ស្ដ្រី​» ដែល​ត្រូវ​បានរៀបចំ​ធ្វើ​នៅ​វត្ត​គិរី​ជលសារ កាលពី​ព្រឹក​ថ្ងៃទី​២១ ខែមករា ឆ្នាំ​២០២០


​អ្នកស្រី អូន វុទ្ធី អាយុ​៣៨​ឆ្នាំ រស់នៅ​ភូមិ​គោក​សំព័រ មាន​តួនាទី​ទទួលបន្ទុក​កិច្ចការនារី បានបង្ហាញ​ការយល់ឃើញថា «​នាង​ខ្ញុំ​បានធ្វើ​ការងារ​ទាក់ទង​នឹង​ការលើកកម្ពស់​សិទ្ធិ​ស្ដ្រី​ជាច្រើន​ក្នុងភូមិ​គោក​សំព័រ​នេះ​។ ខ្ញុំ​សង្កេតឃើញថា កាលពី​ប៉ុន្មាន​ឆ្នាំមុន​អំពើ​ហឹ​ង្សា​ក្នុង​គ្រួសារ​គឺមាន​ការកើនឡើង​ច្រើន ពីព្រោះ​នៅ​តំបន់​នេះ​មាន​ភាពដាច់ស្រយាល​ខ្លាំង​។ អំពើ​ហឹ​ង្សា កើតឡើង​ភាគច្រើន គឺ​ដោយសារ​ខ្វះ​ភាព​អធ្យាស្រ័យ និង​ការយោគយល់​គ្នា​រវាង​ភាគី​ប្ដី​ប្រពន្ធ​។ ប៉ុន្ដែ​ក្រោយមក​យើង​បាន​បង្កើត​ក្រុមការងារ​សម្របសម្រួល​ទៅលើ​កិច្ចការ​ទាំងអស់នេះ ហើយ​បាន​មើលឃើញ​ពី​ភាព​ធូរស្រាល​កាន់តែ​ច្រើនឡើង​។ ការលើកកម្ពស់​សិទ្ធិ​ស្ដ្រី​នេះ មាន​គោលបំណង​សំខាន់​ក្នុងការ​គាំពារ​នូវ​សិទ្ធិ សេរីភាព និង​ភាពស្មើគ្នា​ចំពោះមុខ​ច្បាប់ ឬ​សកម្មភាព​ចូលរួម​ក្នុងសង្គម​រវាង​បុរស និង​ស្ដ្រី​។ ខ្ញុំ​យល់ថា ស្ដ្រី​ក៏មាន​តួនាទី​សំខាន់​នៅក្នុង​ការអភិវឌ្ឍន៍​ស​ង្គ​ម​តាមរយៈ​ការបង្កើត​ឲ្យ​មាន​ក្រុម​នារី​ចុះ​ល្បាត​ព្រៃឈើ និង​ការការពារ​ធនធានធម្មជាតិ​នៃ​ព្រៃ​សហគមន៍​សង្ឃ​រុក្ខ​វ័ន ដែលជា​គម្រប​ព្រៃឈើ​ជាង​បី​ម៉ឺន​ហិកតា ដោយ​រួមសហការ​ជាមួយ​ក្រុមការងារ​រប​ស់​ព្រះសង្ឃ​នៅ​ទីនោះ​។ ក្រៅពីនេះ ស្ដ្រី​ក៏មាន​តួនាទី​នៅក្នុង​ការអភិរក្ស​ធន​ធាន​ជលផល​ក្នុង​បឹង​ទំនប់​ថ្មី ដើម្បី​ទប់ស្កាត់​នូវ​រាល់​ការនេសាទ​ខុសច្បាប់​។ ចំណែកឯ​ក្រុម​សមាគមន៍​សិល្បៈ​ក្នុងភូមិ​គោក​សំព័រ ក៏មាន​វត្ដ​មាន​ស្ដ្រី​ក្នុង​កិច្ចការ​នេះដែរ​។ ទោះជា​យ៉ាងនេះ​ក្ដី គ្រប់​កិច្ចការងារ​ទាំងអស់​ដែល​ធ្វើឡើង ក៏​ពុំមែន​មានតែ​ការចូលរួម​របស់​ស្ដ្រី​ប៉ុណ្ណោះ​ទេ ប៉ុន្តែ​ក៏មាន​ការចូលរួម​ពី​បុរស​ដែរ​។ ខ្ញុំ​មានការ​គាំទ្រ​យ៉ាង​ពេញទំហឹង​ចំពោះ​ការចូលរួម​ពី​បុរស ពីព្រោះ​បុរស​ក៏​ជា​ផ្នែក​មួយ​ដ៏​សំខាន់​ក្នុង​ការជំរុញ​ឲ្យ​មានការ​គោរព​នូវ​សិទ្ធិសេរីភាព​របស់​ស្ដ្រី​»​។​


​តាមរយៈ​ការសាកសួរ​នៅក្នុង​កិច្ចពិភាក្សា​នេះ ស្ដ្រី​ភាគច្រើន​នៅក្នុង​ភូមិ​គោក​សំព័រ បាន​សម្ដែង​នូវ​ទុក្ខលំបាក​របស់ខ្លួន និង​បញ្ហា​ប្រឈម​ដែល​សហគមន៍​បាន​ជួបប្រទះ​។ នៅក្នុង​នោះដែរ បញ្ហា​ជំងឺ​បានក្លាយ​ទៅជា​បញ្ហា​មួយ​នៃ​ជីវិត​រស់នៅ​ប្រចាំថ្ងៃ​របស់​ប្រជាជន​នៅ​ទីនោះ ដែល​កំពុងតែ​ប្រឈម​ទៅនឹង​ការកើត​ជំងឺ​ទឹកនោមផ្អែម ជំងឺ​ក្រពះ និង​ជំងឺ​ពោះវៀន ជាដើម​។​បញ្ហា​ទាំងអស់នេះ បាន​បង្កើតជា​ការព្រួយបារម្ភ​យ៉ាងធ្ងន់ធ្ងរ​ចំពោះ​ប្រជាជន គួបផ្សំ​នឹង​ការខ្វះខាត​ស្ពាន ថ្នល់ មន្ទីរពេទ្យ សាលារៀន ដែល​បង្ហាញ​ពី​ការរាំងស្ទះ​ដល់​ការរស់នៅ​របស់​ប្រជាជន និង​ការរៀនសូត្រ​របស់​សិស្សានុសិស្ស​នៅ​ភូមិ​នេះ​ផ្ទាល់​។​


​អ្វីដែល​គួរ​ឲ្យ​កត់សម្គាល់​ជាងនេះទៅទៀត​នោះ គឺ​ការចូលរួម​របស់​ស្ដ្រី​ទៅលើ​សកម្មភាព​អភិវឌ្ឍន៍​សហគមន៍ ដែល​នៅមានកម្រិត​នៅឡើយ និង​មិនទាន់​គ្រប់​ជ្រុងជ្រោយ​នោះទេ​។ ស្ដ្រី​ភាគច្រើន​បាន​យល់ស្រប​ថា កត្ដា​ចំណេះវិជ្ជា​គឺជា​បញ្ហា​ចម្បង​ដែល​ស្ដ្រី​ក្នុងភូមិ​នេះ​បាន​ជួបប្រទះ និង​មិនអាច​ឲ្យ​ខ្លួន​ឈរឈ្មោះ​ជា​អ្នកតំណាង​បាន​។ ក្រៅពីនេះ ការ​អសកម្ម​ភាព​របស់​ស្ដ្រី​ក៏​បណ្ដាលមកពី​ការ​អសមត្ថភាព និង​អ​ឆន្ទៈ​ក្នុង​ការចូលរួម​ដោយ​ខ្លួនឯង​។ ស្ដ្រី​មួយចំនួន​ហាក់​សម្ដែង​ពី​បញ្ហា​ចំណង​គ្រួសារ ទៅនឹង​ជីវិត​ផ្ទាល់ខ្លួន​ដែល​មិនអាច​លះបង់​នូវ​ពេលវេលា​ឲ្យ​ពេញលេញ​បាន​ក្នុងការ​ចូលរួម​ធ្វើ​សកម្មភាព​ក្នុង​សហគមន៍​។ ភាព​ថមថយ​នៃ​ការចូលរួម​របស់​ស្ដ្រី ក៏​បណ្ដាលមកពី​ការខ្វះខាត​នូវ​ភាព​ជ្រោមជ្រែង និង​លើកកម្ពស់​ពី​មជ្ឈដ្ឋាន​ជុំវិញ ដើម្បី​ឲ្យ​ស្ដ្រី​ចូលរួម​ដោយ​សមភាព​។​


​តាមរយៈ​វេទិកា​ស្តីពី «​សិទ្ធិ​ស្ដ្រី​» ខាងលើ បានបង្ហាញ​ឲ្យ​ឃើញ​នូវ​ដំណើរការ​នៃ​ការចូលរួម​របស់​ប្រជាជន​ក្នុង​សហគមន៍ ជាពិសេស​ស្ដ្រី​នៅក្នុង​មូលដ្ឋាន​ដែល​បាន​ចូលរួម​សម្ដែង​នូវ​ឆន្ទៈ​ផ្ទាល់ខ្លួន​អំពី​ភាព​អសកម្ម​ក្នុង​សហគមន៍ និង​ការយល់ឃើញ​របស់ខ្លួន​ទៅលើ​បញ្ហា​ប្រឈម​នានា​ដែល​ស្ដ្រី​បាន​ជួបប្រទះ ដែល​ប៉ះពាល់​ទៅដល់​សិទ្ធិ​ទាំងឡាយ​ដែល​ខ្លួន​មាន ដើម្បី​លើកស្ទួយ​សហគមន៍​ឲ្យ​មាន​ស្ថេរភាព និង​ការអភិវឌ្ឍ​៕សរន

ទីតាំងផ្សាយពាណិជ្ជកម្ម

- Advertisment -

Most Popular

លើក​ពេល​សវនាការ សំណុំរឿង​...

​ដោយៈ ស​រិ​ទ្ធ / ភ្នំពេញៈ...

រដ្ឋបាល​រាជធានី បាន​នឹង​ក...

ដោយៈ រ៉ា​ម៉ន / ភ្នំពេញៈ ល...

សម្តេច​តេ​ជោ​ស្នើឱ្យ​មេធា...

ដោយៈ​តារា​រិ​ទ្ធ​/​ភ្នំពេ...

ស្ត្រី​អូ​ម៉ង់​ម្នាក់​រើស...

ប្រែ​សម្រួល : កញ្ញា​ដា​លី...