ភ្លើងស្តុប​នៅ​ភ្នំពេញ​មាន​១៦៨​ទីតាំង​,​ភ្លើងស្តុប​ថ្មី​ផ្លូវ​លេខ​៩២​ដាក់​ដំណើរការ​

314
ចែករម្លែក

ដោយ​៖​រ៉ា​ម៉ន​/​ភ្នំពេញ​៖ លោក​សាំ ពិសិដ្ឋ ប្រធាន​មន្ទីរ​សាធារណការ​និង​ដឹកជញ្ជូន​រាជធានី​ភ្នំពេញ បានឱ្យដឹងថា​៖​គិត​មកដល់​ថ្ងៃទី​២៤​មករា​២០២០​នេះ​នៅក្នុង​រាជធានី​ភ្នំពេញ​មាន​ភ្លើងស្តុប​នៅ​រាជធានី​ភ្នំពេញ​ចំនួន​១៦៨​ទីតាំង​។​ខណៈដែល​ភ្លើងស្តុប​ថ្មី​នៅ​មហាវិថី​មិត្តភាព​ភ្នំពេញ​-​ហាណូយ​ប្រសព្វ​ផ្លូវ​លេខ​៩២(​ផ្លូវ​ចូល​ផ្សារ​ទំនើប អ៊ី​អន​ម៉​ល សែន សុខ​)​បានដាក់​ឱ្យ​ដំណើរការ​កាលពី​ថ្ងៃទី​២៣​មករា​២០២០​។​

​នៅ​ទីតាំង​មហាវិថី​មិត្តភាព​ភ្នំពេញ​-​ហាណូយ ប្រសព្វ​ផ្លូវ​លេខ ៩២ ចំណុច (​ផ្លូវ​ចូល​ផ្សារ​ទំនើប អ៊ី​អន​ម៉​ល​សែន​សុខ​)​នេះ​គឺ​ក្រោយពី​បង្កើតឱ្យមាន​ផ្សារ​ទំនើប​អ៊ី​អន​ម៉​ល​បានធ្វើឱ្យ​ទីតាំង​នេះ​ប្រឈម​នឹង​ការកកស្ទះ​ចរាចរ​រាល់ថ្ងៃ​។​ដោយ​មើលឃើញ​ពី​បញ្ហា​នេះ​ទើប​រដ្ឋបាល​រាជធានី​ភ្នំពេញ​សម្រេច​បំពាក់​ភ្លើងស្តុប​ថ្មី​។​ការដាក់ឱ្យ​ដំណើរការ​ភ្លើងស្តុប​ថ្មី​វា​នឹងធ្វើ​ឱ្យ​តំបន់​នេះ​លែង​ប្រឈម​និង​ការកកស្ទះ​ចរាចរ​ខ្លាំង​ដូច​មុន​ទៀត​។​

គួរ​បញ្ជាក់ថា​៖​លោក​ឃួ​ង​ស្រេង​អភិបាល​រាជធានី​ភ្នំពេញ​ធ្លាប់បាន​បញ្ជាក់ថា​ស្ថានភាព​ក្នុង​រាជធានី​ភ្នំពេញ​បាននិងកំពុង​កើតមាន​បញ្ហា​ការកកស្ទះ​ចរាចរ​ដោយសារតែ​ការកើនឡើង​យ៉ាងគំហុក​នូវ​ចំនួន​រថយន្ត​គ្រប់​ប្រភេទ​។​បើ​គិត​ត្រឹម​ខែធ្នូ​ឆ្នាំ​២០១៩​នេះ​ស្ថិតិ​យានយន្ត​ក្នុង​រាជធានី​ភ្នំពេញ​មាន​រថយន្ត​ចំនួន​៥០៨.១៤៣​គ្រឿង​និង​ទោចក្រយានយន្ត​ចំនួន​១.៩៦៦.៣២២​គ្រឿង​ដែល​បាន​ចុះបញ្ជី​ត្រឹមត្រូវ​នៅ​មន្ទីរ​សាធារណការ​និង​ដឹកជញ្ជូន​រាជធានី​ភ្នំពេញ​។​

​តែ​នៅក្នុង​ចំនួន​នេះ​មិនបាន​គិត​និង​រាប់បញ្ចូល​រថយន្ត​ដែល​ពាក់​ស្លាក​លេខខ​.​ម​ស្លាក​លេខ​ន​.​ប​រឺ​ម៉ក​និង​ត្រីចក្រយានយន្ត​ឡើយ​។​ជាមួយ​កំណើន​នេះ​រដ្ឋបាល​រាជធានី​ក្រោម​ការជួយ​ឧបត្ថម​គាំទ្រ​ពី​ទីភ្នាក់ងារ​សហប្រតិបត្តិ​ការ​អន្តរជាតិ​ជប៉ុន​JICA​បានធ្វើឱ្យ​ដំណើរការ​ជា​ផ្លូវការ​លើ​ការសាងសង់​គម្រោង​អភិវឌ្ឍន៍​ប្រព័ន្ធគ្រប់គ្រង​ចរាចរ​ក្នុង​រាជធានី​ភ្នំពេញ​។​

​គម្រោង​អភិវឌ្ឍន៍​ប្រព័ន្ធគ្រប់គ្រង​ចរាចរណ៍​ក្នុង​រាជធានី​ភ្នំពេញ​នេះ​ត្រូវបាន​ចាប់ផ្តើម​ដំណើរការ​អនុវត្ត​កាលពី​ខែមីនា​ឆ្នាំ​២០១៦​និង​បានបញ្ចប់​រួចរាល់​ជា​ស្ថាពរ​នៅ​ក្នុ​ខែធ្នូ​ឆ្នាំ​២០១៨​ដែលមាន​រយៈពេល​សរុប​៣៥​ខែ​ក្នុងនោះ​រួមមាន​៖១,​ការងារ​តំឡើង​និង​បំពាក់​ភ្លើងស្តុប​ថ្មី​នៅតាម​ចំណុចប្រសព្វ​សរុប​ចំនួន​១១៥​ទីតាំង​។​២,​ការងារ​បំពាក់​កា​ម៉េ​រ៉ា​ចាប់​រូបភាព​និង​វិភាគ​ទិន្នន័យ​យានយន្ត​ឆ្លងកាត់​ចំនួន​១៩៤​គ្រឿង​។​

៣,​ការងារ​បំពាក់​កា​ម៉េ​រ៉ា​សុវត្ថិភាព​CCTV​ចំនួន​២៦​គ្រឿង​សម្រាប់​ត្រត​ពិនិត្យ​តាមដាន​ស្ថានភាព​ចរាចរណ៍​នៅតាម​បណ្តា​ចំណុច​ផ្លូវ​ប្រសព្វ​សំខាន់ៗ​ក្នុង​រាជធានី​ភ្នំពេញ​។​៤,​ការងារ​សាងសង់​មជ្ឈមណ្ឌល​គ្រប់គ្រង​ប្រព័ន្ធ​ចរាចរណ៍​ចំនួន​មួយកន្លែង​នៅក្នុង​បរិវេណ​រដ្ឋបាល​រាជធានី​ភ្នំពេញ​នៅ​ជា​ន់ទី​៩​នៃ​អគារ​សាងសង់​ថ្មី​។​

៥,​ផ្តល់នូវ​វគ្គ​បណ្តុះបណ្តាល​សំខាន់ៗ​ដល់​មន្ត្រី​បច្ចេកទេស​របស់​មន្ទីរ​សាធារណការ​និង​ដឹកជញ្ជូន​រាជធានី​ភ្នំពេញ​ក៏​ដូច​មន្ត្រី​បច្ចេកទេស​នៃ​រដ្ឋបាល​រាជធានី​ភ្នំពេញ​ដើម្បី​ផ្ទេរ​ចំណេះដឹង​និង​លើកកម្ពស់​សមត្ថភាព​គ្រប់គ្រង​និង​ប្រតិបត្តិការ​ប្រព័ន្ធ​បញ្ជា​ភ្លើង​សញ្ញា​ចរាចរ​ផងដែរ​។​គម្រោង​នេះ​បានដាក់​ឲ្យ​ដំណើរការ​ជា​បណ្តោះអាសន្ន​តាំងពី​ខែធ្នូ ឆ្នាំ​២០១៨៕S/​

ទីតាំងផ្សាយពាណិជ្ជកម្ម