សម្តេច​ប្រធានព្រឹទ្ធសភា សម្តែង​ការអបអរ ដែល​លោកជំទាវ​សៅ ទី ហេង សំរិន បាន​ត្រូវ​ព្រះមហាក្សត្រ​ប្រោស​ព្រះរាជទាន នូវ​គោរមងារ​ជា សម្តេច ធម្ម​វិសុទ្ធ​វង្សា​

ដោយ​: សុផល / ភ្នំពេញ​: សម្តេច​វិបុល​សេនា​ភក្តី សាយ ឈុំ ប្រធានព្រឹទ្ធសភា ព្រមទាំង​សមាជិក សមាជិកា​ព្រឹទ្ធសភា មន្ត្រីរាជការ​អគ្គលេខាធិការដ្ឋាន​ព្រឹទ្ធសភា បាន​សម្តែង​នូវ​មនោសញ្ចេតនា​សប្បាយរីករាយ​ឥតឧបមា​ជូន​ចំពោះ​សម្តេច​ក្នុងឱកាស​ដែល​ព្រះករុណា​ព្រះបាទ សម្តេចព្រះ​បរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា ជា​អ​ម្ចាស់ជីវិតលើត្បូង ជាទីគោរព​សក្ការៈ​ដ៏​ខ្ពង់ខ្ពស់​បំផុត ទ្រង់​សព្វព្រះរាជហឫទ័យ​ប្រោស​ព្រះរាជទាន នូវ​គោរមងារ​ជា សម្តេច ធម្ម​វិសុទ្ធ​វង្សា សៅ ទី ហេង សំរិន នៅ​ថ្ងៃទី​២៣ ខែមករា ឆ្នាំ​២០២០​។​

​នៅក្នុង​លិខិត​អបអរ​នោះ បានបង្ហាញ​ថា​ នា​កាស​ប្រកបដោយ សិរី​សួស្តី​ជ័យ​មង្គល​បវរ​មហាប្រសើ​រ​បំផុត​នេះ យើងខ្ញុំ​សូម​ថ្លែង នូវ​ការគោរព​កោតសរសើរ​ដោយស្មោះ​អស់ពីដួងចិត្ត​ជូន សម្តេច ដែលជា​និច្ចកាល​ក្នុងនាម​ជា​ឧ​ត្ត​ម​ភរិយា​ប្រកបដោយ​វីរភាព​និង​ពលី​កម្ម​ដ៏​ខ្ជាប់ខ្ជួន សម្តេច​បានរួម​ដំណើរ​គាំពារ សម្តេច​អគ្គ​មហា​ពញា​ចក្រី ហេង សំរិន រំដោះជាតិ​មាតុភូមិ​និង​ប្រជាជន ពី​បន​ប្រល័យពូជសាសន៍ ដណ្តើមបាន​មកវិញ​នូវ​សន្តិភាព និង​ការ​រស់​ឡើងវិញ​របស់​ប្រជាជាតិ​កម្ពុជា​ទាំងមូល​។ សម្តេច តែង​លះបង់​កម្លាំងកាយ ចិត្ត​ប្រាជ្ញា ស្មារតី រួមចំណែក​យ៉ាង​ធំធេង​បំផុត​បម្រើ​ឧ​ត្ត​ម​ប្រយោជន៍​ជាតិ សាសនា ព្រះមហាក្សត្រ ដោយ​សទ្ធា​ជ្រះថ្លា​បរិសុទ្ធ​ដើម្បី​កសាង​អភិវឌ្ឍ​ន៍សង្គមជាតិ​ឲ្យ​រីកចម្រើន​និង​ឈាន​ឡើងជា​បន្តបន្ទាប់​។​

​លិខិត​ដដែល​នេះ ក៏បាន​បួងសួង​ដល់​វត្ថុ​ស័ក្តិសិទ្ធិ​ទាំងអស់​ក្នុង​លោក គុណបុណ្យ​ព្រះ​រតនត្រ័យ​កែវ​ទាំងបី​ ព្រមទាំង​ទេវតា រក្សា​ព្រះរាជាណាចក្រ​កម្ពុជា សូម​បន្ត​អភិបាល​គ្រង​រក្សា​ប្រោះព្រំ​ពរជ័យ​ជូន សម្តេច ធម្ម​វិសុទ្ធ​វង្សា សៅ ទី ហេង សំរិន និង សម្តេច​អគ្គ​មហា​ពញា​ចក្រី ហេង សំរិន ព្រមទាំង​បុត្រា បុត្រី ចៅ​ប្រុស ចៅស្រី ចៅទួត ជាទី​ស្រឡាញ់​ទាំងអស់ សូម​បាន​ប្រកបដោយ​ព្រះ​ពុទ្ធពរ​ទាំង​បួន​ប្រការ អាយុ វណ្ណៈ សុ​ខៈ ពលៈ កុំបី​ឃ្លៀងឃ្លាត​ឡើយ​។​

​សូមជម្រាបថា​:​លោកជំទាវ សៅ ទី ហេង សំរិន ត្រូវបាន​ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ផ្តល់​គោរមងារ ជា សម្តេច ធម្ម​វិសុទ្ធ​វង្សា សៅ ទី ហេង សំរិន ។

​សម្តេចចៅហ្វា​វាំង​វរវៀងជ័យ​អធិបតី​ស្រឹ​ង្កា​រ គង់ សំអុល ឧបនាយករដ្ឋមន្ត្រី និង​ជា​រដ្ឋមន្ត្រីក្រសួង​ព្រះបរមរាជវាំង បាន​អញ្ជើញ​យក​ព្រះរាជក្រឹត្យ​របស់​ព្រះមហាក្សត្រ ប្រគល់ជូន សម្តេច ធម្ម​វិសុទ្ធ​វង្សា សៅ ទី ហេង សំរិន នា រសៀល​ថ្ងៃទី​២៥ ខែមករា ឆ្នាំ​២០២០ នៅ​គេហដ្ឋាន របស់​សម្តេច​។

​នៅក្នុង​ព្រះរាជក្រឹត្យ​ដែល ព្រះមហាក្សត្រ បាន​ឡាយព្រះហស្ដលេខា នៅ​ថ្ងៃទី​២៣ ខែមករា ឆ្នាំ​២០២០ ទ្រង់​បាន​បញ្ជាក់ថា សម្តេច​ធម្ម​វិសុទ្ធ​វង្សា សៅ ទី ហេង សំរិន បាន​គាំទ្រ​តស៊ូ​ក្នុង​ការរំដោះ​ប្រទេសជាតិ​ដោយ​ស្វាមីភ័ក្ដិ តាំងពីដើម​រហូតមក ក្នុងការ​ដឹកនាំ​យ៉ាង​អង់អាច​ក្លាហាន ជា​អ្នកស្នេហាជាតិ ការពារជាតិ និង​សាសនា និង​គាំពារ​យ៉ាង​ខ្ជាប់ខ្ជួន​ឥត​ល្អៀង តាម​មាគ៌ា​នយោបាយ​បង្រួបបង្រួម​ជាតិ ផ្សះផ្សា​ជាតិ​របស់ ព្រះករុណា ព្រះបាទ​សម្តេចព្រះ​នរោត្តម សីហនុ ព្រះវររាជបិតា​ជាតិ ខ្មែរ “​ព្រះករុណា ព្រះ​បរម​រតន​កោដ្ឋ​” ដើម្បី​ជាតិ មាតុភូមិ​កម្ពុជា​។​

​សម្តេច​ធម្ម​វិសុទ្ធ​វង្សា សៅ ទី ហេង សំរិន ប្រសូត​នៅ​ឆ្នាំ​១៩៣៨ ​នៅ​ឃុំ​កក់ ស្រុក​ពញាក្រែក ខេត្ត​ត្បូងឃ្មុំ អតីត ខេត្តកំពង់ចាម​។ សម្តេច​បាន​រៀប​អាពាហ៍ពិពាហ៍​ជាមួយ សម្តេច​អគ្គ​មហា​ពញា​ចក្រី ហេង សំរិន នៅក្នុង​ខែមីនា​ឆ្នាំ​១៩៥៧​។ ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ទ្រង់ បាន​មាន​ព្រះរាជចំណារ​បន្តថា សម្តេច​ធម្ម​វិសុទ្ធ​វង្សា សៅ ទី ហេង សំរិន បាន​ដឹកនាំ កសាង និង​គោរព​ព្រះពុទ្ធសាសនា​ឲ្យ​មានការ​អភិវឌ្ឍ​រីកចម្រើន នៅ​ទូទាំង​ព្រះរាជាណាចក្រ​កម្ពុជា​។

​ក្នុង​ព្រះរាជក្រឹត្យ ព្រះករុណា​ព្រះមហាក្សត្រ ទ្រង់​បានលើកឡើង​បន្ថែមថា សម្តេច​ធម្ម​វិសុទ្ធ​វង្សា បាន​បរិច្ចាគ​កម្លាំងកាយ​ចិត្ត និង ទ្រព្យធន​ប្រកបដោយ​សទ្ធា​ជ្រះថ្លា​បរិសុទ្ធ​ដ៏​ខ្ពង់​ខ្ពស់បំផុត ជូន​សង្គមជាតិ និង​បាន​ជួយ​កសាង​សមិទ្ធផល​នានា ជួយឧបត្ថម្ភ​ដល់​ជនក្រីក្រ​គ្មាន​ទី​ពំនឹង​ទាំងឡាយ ប្រកបដោយ​មហា​សប្បុរ​ស​ធម៌ មនុស្សធម៌ ដ៏​ឧត្តុង្គឧត្តម​នៅ​ទូទាំង​ព្រះរាជាណាចក្រ​កម្ពុជា និង​បាន​ប្រកាន់ខ្ជាប់​ក្នុង​សេចក្តី​បរិសុទ្ធ​ដ៏​វិសេសវិសាល​ក្នុង​ព្រះធម៌​បូជា​ចំពោះ​ព្រះពុទ្ធសាសនា​។​

​ថ្នាក់ដឹកនាំ​រដ្ឋសភា សមាជិក​សមាជិកា​រដ្ឋ​សភា និង​មន្ត្រីរាជការ​នៃ​អគ្គលេខាធិការដ្ឋាន​រដ្ឋ​សភា និង​តាម​ក្រសួង​ស្ថាប័ន ព្រមទាំង​ប្រជាពលរដ្ឋ​ទូទៅ បាន​ចូលរួម អបអរសាទរ សម្តេច ធម្ម​វិសុទ្ធ​វង្សា សៅ ទី ហេង សំរិន ជា​បន្តបន្ទាប់ នៅក្នុង​ឱកាស​ដែល ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា​ចេញ​ព្រះរាជក្រឹត្យ ចុះ​ថ្ងៃទី​២៣ ខែមករា ឆ្នាំ​២០២០ ត្រាស់បង្គាប់ ផ្តល់​គោរមងារ លោកជំទាវ ជា សម្តេច ធម្ម​វិសុទ្ធ​វង្សា សៅ ទី ហេង សំរិន​៕ ល​/Ha

ទីតាំងផ្សាយពាណិជ្ជកម្ម

- Advertisment -

Most Popular

លោកស្រី អោ​ង សាន ស៊ូ​ជី​៖...

ដោយៈ​តារា​រិ​ទ្ធ​/​ភ្នំពេ...

ចាប់ផ្ដើម​សាងសង់​អគារ​សាល...

ដោយ​៖​រ៉ា​ម៉ន / ភ្នំពេញ​៖...

រាវ​រកឃើញ​គ្រាប់​យុទ្ធ​ភ័...

ដោយ​: ប​.​ជ័យ / បន្ទាយមាន...

លោកនាយ​ឧត្ដមសេនីយ៍ ម៉ឹង ស...

ដោយ​: វ៉ៃ​កូ / ខេត្តស្វាយ...