ព្រះមហាក្សត្រ​នៃ​ព្រះរាជា​ណា​ក្រ​កម្ពុជា ព្រះរាជ​ប្រទាន​លិខិត​សរសើរ​ជូន​បុគ្គលិក​មជ្ឈមណ្ឌល​ឯកសារ​កម្ពុជា ចំនួន​១៦​រូប​

ដោយ​: សោម ប៊ុនថន បុគ្គលិក​មជ្ឍមណ្ឌល​ឯកសារ​កម្ពុជា / ភ្នំពេញ​: ព្រះករុណា ព្រះបាទ​សម្តេច ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា បាន​សព្វ​ព្រះរាជ​ហរ​ទ័យ​ប្រោស​ព្រះរាជ​ប្រទាន​លិខិត​សរសើរ​ដល់​បុគ្គលិក​មជ្ឈមណ្ឌល​ឯកសារ​កម្ពុជា​ចំនួន​១៦​រូប ដែល​បាន​លះបង់​កម្លាំងកាយ​ចិត្ត​បម្រើ​ដល់​បុព្វហេតុ​នៃ​ការអប់រំ​ពី​អំពើ​ប្រល័យពូជសាសន៍​។​

​ព្រះបាទ​សម្តេច ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា សព្វ​ព្រះរាជ​ហរ​ទ័យ​ប្រោស​ប្រទាន​ប្រទាន​លិខិត​ដល់​លោក ឆាំង យុ នាយក​មជ្ឈមណ្ឌល​ឯកសារ​កម្ពុជា​។ ប្រភព​រូបថត​៖ បណ្ណសារ​មជ្ឈមណ្ឌល​ឯកសារ​កម្ពុជា​

​ទូល​តប​ទៅនឹង​ព្រះរាជ​លិខិត​ខាងលើ លោក ឆាំង យុ នាយក​មជ្ឈមណ្ឌល​ឯកសារ​កម្ពុជា សូម​អរ​ព្រះ​គុណ​ជា​អនេក​ចំពោះ​ព្រះករុណា ព្រះបាទ​សម្ដេច ព្រះបរមនាថ ន​រោ​ត្ដម​សីហមុនី ដែល​តែងតែ​យក​ព្រះទ័យ​ទុកដាក់​និង​ប្រទាន​ការគាំទ្រ​ដល់​បុគ្គលិក និង​ការងារ​របស់​មជ្ឈមណ្ឌល​ឯកសារ​កម្ពុជា ជា​រៀង​រហូតមក​។​

​បុគ្គលិក​ទាំង​១៦​រូប បាន​បំពេញការងារ​នៅ​មជ្ឈមណ្ឌល​ឯកសារ​កម្ពុជា​អស់​រយៈកាល​ជាង​មួយ ឬ​ពីរ​ទសវត្សរ៍​មកហើយ ក្នុងនោះ​រួមមាន​៖ សូ ហ្វា​រី​ណា​, ឆេង វេ​ង​, ឯម ឆាត​, ឡុង អូន​, ឡុង ដា​នី​, លី សុខ​ឃាង​, លី សុខ​ចំរើន​, មាស ប៊ុន​ថា​ន​, ម៉ម សុផាត​, អ៊ុច សុវណ្ណ​, ផេង ពង្ស​រ៉ាស៊ី​, រស់ សំពៅ​, សុខ វណ្ណៈ​, សោម ប៊ុនថន​, យ៉ាន់ នី​កូ​ឡា និង យិន នា​ន​។ បុគ្គល​ទាំង​១៦​រូប មាន​មុខងារ​ផ្សេងៗ​គ្នា រួមបញ្ចូល​ទាំង​អ្នក​ដែល​កាន់តំណែង​គ្រប់គ្រង បុគ្គលិក​ទូទៅ ក៏ដូចជា​បុគ្គលិក​ថែទាំ​និង​សម្អាត​ការិយាល័យ​ចំនួន​ពីររូប​ថែម​ទៀតផង​។​

​បណ្ឌិត ហូ​លី​យ៉ូ ជែ​ល​ដ្រេ​ស (Julio A. Jeldres) ទីប្រឹក្សា​ព្រះមហាក្សត្រ និង​អតីត​លេខា​ផ្ទាល់ និង​ជា​អ្នកសរសេរ​ព្រះរាជ​ជីវប្រវត្តិ​របស់​សម្តេច​ព្រះបាទ នរោត្តម សីហនុ ព្រះ​បរម​រតន​កោដ្ឋ ព្រះរាជតំណាង​ឲ្យ​ព្រះបាទ​សម្តេច ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ថតរូប​ជុំគ្នា បន្ទាប់ពី​ចែក​លិខិត​សរសើរ​ជូន​បុគ្គលិក​មជ្ឈមណ្ឌល​ឯកសារ​កម្ពុជា នៅ​ព្រឹក​ថ្ងៃទី​២៧ ខែមករា ឆ្នាំ​២០២០​។ ប្រភព​រូបថត​៖ បណ្ណសារ​មជ្ឈមណ្ឌល​ឯកសារ​កម្ពុជា​

​គោលបំណង​នៃ​ព្រះរាជ​លិខិត​នេះ គឺ​ដើម្បី​ព្រះរាជទាន​អំណរ​សាទរ និង​ការកោតសរសើរ ចំពោះ​បុគ្គលិក​ដែល​បាន​បំពេញការងារ «​អស់​រយៈកាល​១០​ឆ្នាំ ឬ​ច្រើនជាង​១០​ឆ្នាំកន្លងមក​នៅ​មជ្ឈមណ្ឌល​ឯកសារ​កម្ពុជា​»​។ ព្រះរាជ​លិខិត​នេះ ក៏មាន​ព្រះ​ខ្លឹមសារ​អបអរ​ដល់​មជ្ឈមណ្ឌល​ឯកសារ​កម្ពុជា ក្នុងឱកាស «​គម្រប់​ខួប​២៥​ឆ្នាំ​» ដែល​ប្រព្រឹត្តទៅ​នៅក្នុង​ខែមករា​នេះ​។ យោងតាម​ព្រះរាជ​លិខិត​របស់​ព្រះមហាក្សត្រ ចាប់តាំងពី​មជ្ឈមណ្ឌល​ឯកសារ​កម្ពុជា​បាន​ចាប់បដិ​ស​ណ្ឋិ​មក មជ្ឈមណ្ឌល «​បាន​ចូលរួមចំណែក​យ៉ាងច្រើន​សន្ធឹកសន្ធាប់​» នៅក្នុង​វិស័យ​អប់រំ​ពី​អំពើ​ប្រល័យពូជសាសន៍ ការរក្សា​ការចងចាំ​ជា​ប្រវត្តិសាស្ត្រ​របស់​ជនរងគ្រោះ ក៏ដូចជា​ជួយ​ដល់​ដំណើរការ​នៃ​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា និង​លះបង់​ទាំង​កម្លាំងកាយ និង​កម្លាំងចិត្ត ដើម្បី​បម្រើ​ដល់​សុខភាព​ផ្លូវកាយ និង​ផ្លូវចិត្ត​នៃ​អ្នក​រស់រានមានជីវិត​ពី​របប​កម្ពុជា​ប្រជាធិបតេយ្យ​រាប់លាន​នាក់​។​

​ព្រះមហាក្សត្រ បាន​មាន​ព្រះរាជបន្ទូល​នៅក្នុង​ព្រះរាជ​លិខិត​ទៀតថា​៖ «​បុគ្គលិក​របស់​មជ្ឈមណ្ឌល​បាន​បំពេញ​តួនាទី​យ៉ាងសំខាន់ ដើម្បី​ធានាថា ការងារ​របស់​មជ្ឈមណ្ឌល​កម្ពុជា អាច​ឈានទៅ​សម្រេចបាន​នូវ​បេសកម្ម​រយៈពេល​វែង​រប​ស់​ខ្លួន​ក្នុងការ​លើកកម្ពស់​ការ​ចងចាំ យុត្តិធម៌ និង​ការផ្សះផ្សា​»​។​

​អែម ឆាត បុគ្គលិក​ផ្នែក​គេហកិច្ច​នៃ​មជ្ឈមណ្ឌល​ឯកសារ​កម្ពុជា​។ ប្រភព​រូបថត​៖ បណ្ណសារ​មជ្ឈមណ្ឌល​ឯកសារ​កម្ពុជា​។​

​គួររម្លឹកថា ព្រះមហាក្សត្រទ្រង់​ក៏​ជា​ជនរងគ្រោះ​មួយ​ព្រះអង្គ​ដែរ នៅក្នុង​របប​ខ្មែរក្រហម​។ យោងតាម​ព្រះរាជបន្ទូល​របស់​ព្រះ​បរម​រតន​កោដ្ឋ សម្តេច​ព្រះបាទ នរោត្តម សីហនុ នៅក្នុង​ភាពយន្ត​ឯកសារ​រឿង «​កុំ​ស្មាន​បង​ភ្លេច​» ព្រះអង្គ​បាន​បាត់បង់​បុត្រី​៣​អង្គ បុត្រា​២​អង្គ ព្រះ​ធី​តុ​ប​តី​(​កូនប្រសា​ប្រុស​)២​អង្គ និង ព្រះរាជ​នត្តា (​ចៅស្រី​-​ប្រុស​)១៤​អង្គ ដែល​បាន​សោយ​ទិ​វ​ង្គ​ត់​ក្នុង​របប​ខ្មែរក្រហម​។​
​ប្រទេស​កម្ពុ​ជាមាន​អ្នក​រស់រានមានជីវិត​ពី​របប​ខ្មែរក្រហម ប្រមាណ​៥​លាន​នាក់ ក្នុងចំណោម​ប្រជាជន​កម្ពុជា​ចំនួន​១៦​លាន​នាក់​។​

​លិខិត​សរសើរ​របស់ អែម ឆាត ដែល​ទទួលបាន​ពី​ព្រះបាទ​សម្តេច ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា​។ ប្រភព​រូបថត​៖ បណ្ណសារ​មជ្ឈមណ្ឌល​ឯកសារ​កម្ពុជា​។​

​មជ្ឈមណ្ឌល​ឯកសារ​កម្ពុជា បាន​បង្កើតឡើង​ក្នុង​ឆ្នាំ​១៩៩៥ ជា​ការិយាល័យ​មួយ​នៃ​កម្មវិធី​ស្តីពី​អំពើ​ប្រល័យពូជសាសន៍​នៅ​កម្ពុជា នៃ​សាកលវិទ្យាល័យ យែ​ល សហរដ្ឋអាមេរិក​។ ក្រោម​ការដឹកនាំ​របស់​លោក ឆាំង យុ ដែល​គឺជា​អ្នក​រស់រានមានជីវិត​ពី​របប​ខ្មែរក្រហម មជ្ឈមណ្ឌល​នេះ បាន​ក្លាយជា​ស្ថាប័ន​ស្រាវជ្រាវ​ឯករាជ្យ នៅក្នុង​ឆ្នាំ​១៩៩៧៕ ល​

ទីតាំងផ្សាយពាណិជ្ជកម្ម

- Advertisment -

Most Popular

យុទ្ធនាការ​១៦​ថ្ងៃ​: បង្ក...

ដោយ​: មុនី​រ័ត្ន / ភ្នំពេ...

អភិបាលខណ្ឌ​ចំកា​មន​៖ សម្ត...

ដោយ​: រ៉ា​ម៉ន / ភ្នំពេញ​:...

ក្មេងប្រុស​អាយុ​១២​ឆ្នាំ ...

ដោយ​: អង្គា​រ៍​ហេង / ភ្នំ...

សម្តេច​ក្រឡាហោម ស ខេង ចេញ...

​ដោយ​: មុនី​រ័ត្ន / ភ្នំព...