​វេទិកា​ថ្នាក់រៀន​ស្ដីអំពី សារសំខាន់​ប្រវត្តិសាស្ត្រ​កម្ពុជា​ប្រជាធិបតេយ្យ ពី​ឆ្នាំ​១៩៧៥-១៩៧៩ នៅ​សាលា​អនុវិទ្យាល័យ ហ៊ុន សែន ថ្មដា​

659
ចែករម្លែក

ដោយៈ​រី លក្ខិណា បុគ្គលិក​មជ្ឈមណ្ឌល​ផ្សះផ្សា​វាលវែង​នៃ​មជ្ឈមណ្ឌល​ឯកសារ​កម្ពុជា​
​ភ្នំពេញៈ​នៅ​ថ្ងៃទី​២២ ខែមករា ឆ្នាំ​២០២០ ក្រុមការងារ​របស់​ម​ជ្ឈ​មណ្ឌល​ផ្សះផ្សា​វាលវែង នៃ​មជ្ឈមណ្ឌល​ឯកសារ​កម្ពុជា បានរៀបចំ​វេទិកា​ថ្នាក់រៀន​លើក​ទី​៤ ស្តីពី​សារសំខាន់ ប្រវត្តិសាស្ត្រ​កម្ពុជា​ប្រជាធិបតេយ្យ​ដល់​សិស្សានុសិស្ស​នៃ​សាលា​អនុវិទ្យាល័យ ហ៊ុន សែន ថ្មដា​។
វេទិកា​ថ្នាក់រៀន បានចាប់ផ្ដើម​នៅ​ម៉ោង​៨​កន្លះ និង​បញ្ចប់​នៅ​ម៉ោង​១១​ព្រឹក ដោយមាន​ការចូលរួម​ពី​សិស្សានុសិស្ស​ចំនួន​៣៦​នាក់ (​ប្រុស​១៦​នាក់ និង​ស្រី​២០​នាក់​)​។ ការរៀបចំ​វេទិកា​ថ្នាក់រៀន​នេះ គឺ​ក្នុង​គោលបំណង​ដើម្បី​បង្កើន​ចំណេះដឹង​ផ្នែក​ប្រវត្តិ សាស្ដ្រ​កម្ពុជា​ប្រជាធិបតេយ្យ (១៩៧៥ – ១៩៧៩) ដល់​សិស្សានុសិស្ស​នៅ​កម្រិត​អនុវិទ្យាល័យ និង​វិទ្យាល័យ​នៅ​ទូទាំងប្រទេស ជាពិសេស​បង្កើត​ឲ្យ​មាន​កិច្ចពិភាក្សា​ប្រវត្តិសាស្ដ្រ​កម្ពុជា​ប្រជាធិបតេយ្យ រវាង​សិស្សានុសិស្ស​, ឪពុកម្តាយ និង​អ្នក​ដែល​បាន​ឆ្លងកាត់​របប​នោះ​។ វេទិកា​ថ្នាក់រៀន​នេះ ក៏​ជួយ​ដល់​ក្មេងៗ​ជំនាន់​ក្រោយ​ក្នុងការ​រៀនសូត្រ​អំពី​ប្រវត្តិសាស្ដ្រ​កម្ពុជា​ប្រជាធិបតេយ្យ​ដើម្បី​ឲ្យ​មានការ​អត់ឱន យោគយល់ អធ្យាស្រ័យ និង​ទប់ស្កាត់​កុំ​ឲ្យ​អំពើ​ប្រល័យពូជសាសន៍​កើតឡើង​ម្តងទៀត ។​

សិស្សានុសិស្ស លោកគ្រូ និង​ក្រុមការងារ​មជ្ឈមណ្ឌល​ផ្សះផ្សា​វាលវែង​នៃ​មជ្ឈមណ្ឌល​ឯកសារ​កម្ពុជា ថតរូប​ជុំគ្នា​បន្ទាប់ពី​ចប់​កម្មវិធី​វេទិកា​ថ្នាក់រៀន​ស្ដីអំពី សារសំខាន់​នៃ​ការសិក្សា​ប្រវត្តិសាស្ត្រ​កម្ពុជា​ប្រជាធិបតេយ្យ ពី​ឆ្នាំ​១៩៧៥-១៩៧៩(​រូបថត បណ្ណសារ​មជ្ឈមណ្ឌល​ឯកសារ​កម្ពុជា​)


​អនុវិទ្យាល័យ ហ៊ុន សែន ថ្មដា មាន​ទីតាំង​ស្ថិតនៅ​ក្នុងភូមិ​ឯកភាព ឃុំ​ថ្មដា ស្រុក​វាលវែង ខេត្តពោធិ៍សាត់ និង​មាន​ចម្ងាយ​ប្រមាណ​៨០​គីឡូម៉ែត្រ ពី​ទីរួមស្រុក​វាលវែង (​ក្នុង​ឃុំ​ប្រ​ម៉ោ​យ​) តាមផ្លូវ​ជាតិ​លេខ​៥៥ ដែល​អម​ទៅដោយ​ទេសភាព​ព្រៃភ្នំ​ដ៏​ស្រស់ស្អាត​។ ឃុំ​ថ្មដា គឺជា​ឃុំ​មួយ​ស្ថិត​នៅជាប់​ព្រំដែន​ខ្មែរ​-​ថៃ និង​មាន​ច្រកទ្វារព្រំដែន​ទ្វេភាគី រវាង​ខេត្តពោធិ៍សាត់ និង​ខេត្ត​ត្រាត​នៃ​ប្រទេស​ថៃ​មួយ គឺ​ច្រកទ្វារព្រំដែន​ថ្មដា​។ តំបន់​ថ្មដា នេះ ក៏​ជាទី​តាំង​តស៊ូ​មួយ​របស់​កងទ័ព​ខ្មែរក្រហម (​សមរភូមិ​កោះកុង​-​សំឡូត​) ប្រឆាំងនឹង កងទ័ព​វៀតណាម និង​កងទ័ព​នៃ​របប​សាធារណរដ្ឋ​ប្រជាមានិត​កម្ពុជា ហើយក៏​ជា ទីតាំង​លាក់ខ្លួន​ដំបូងៗ​របស់​មេដឹកនាំ​ជាន់ខ្ពស់​ខ្មែរក្រហម បន្ទាប់ពី​របប​ខ្មែរក្រហម​ដួល រលំ​នៅ​ឆ្នាំ​១៩៧៩​។
​អនុវិទ្យាល័យ​ហ៊ុនសែន ថ្មដា បានចាប់ផ្តើម​ដំណើរការ​ក្នុង​ឆ្នាំ​សិក្សា​២០០៥- ២០០៦ ដោយបាន​ខ្ចី​បន្ទប់រៀន​របស់​សាលាបឋមសិក្សា​ថ្មដា ដែល​នៅជាប់​នឹង​បរិវេណ អនុវិទ្យាល័យ​សព្វថ្ងៃ​។ នៅ​ឆ្នាំ​២០១០ សម្តេច​អគ្គមហាសេនាបតី​តេ​ជោ ហ៊ុន សែន បានផ្តល់​អគារ​មួយ​ខ្នង​មាន​៣​បន្ទប់​សម្រាប់​សិស្សានុសិស្ស​រៀន​នៅ​អនុវិទ្យាល័យ​។ ទី តាំង​អនុវិទ្យាល័យ​បច្ចុប្បន្ន គឺជា​អតីត​ទីតាំង​មណ្ឌល​សុខភាព​ឃុំ​ថ្មដា​ចាស់​។ ដោយមាន ការខ្វះខាត​បន្ទប់​សិក្សា គណៈ​គ្រប់គ្រង​សាលា​បាន​សុំ​បដិភាគ​ពី​ប្រជាពលរដ្ឋ សាងសង់ បាន​បន្ទប់រៀន​មួយទៀត​ប្រក់​ស័ង្កសី​កាលពី​ឆ្នាំ​សិក្សា ២០១៨-២០១៩ កន្លងទៅ ។

លោក ឡុង ដា​នី នាយក​មជ្ឈមណ្ឌល​ផ្សះផ្សា​វាលវែង​នៃ​មជ្ឈមណ្ឌល ឯកសារ​កម្ពុជា​ប្រមូល​សំណួរ​ស្ទាបស្ទង់​មតិ​ដែល​សិស្ស​នៅក្នុង​ថ្នាក់​បាន​បំពេញ​រួច​(​រូបថត បណ្ណសារ​មជ្ឈមណ្ឌល​ឯកសារ​កម្ពុជា​)


​អនុវិទ្យាល័យ ហ៊ុន សែន ថ្មដា មាន​គ្រូ​សរុប​៥​នាក់ សុទ្ធតែ​ប្រុស និង​មាន​សិស្ស​សរុប​១០៧ ក្នុងនោះ​មាន​ស្រី​៥៤​នាក់​។​
​ ​មុននឹង​ចាប់ផ្តើម​បើក​វេទិកា​ថ្នាក់រៀន លោក ហុក តាំង​អៀ គ្រូ​ប្រចាំ​ថ្នាក់​ទី​៩ នៃ​អនុវិទ្យាល័យ ហ៊ុន សែន ថ្មដា ក៏​មានមតិ​ទៅកាន់​ប្អូនៗ​ដែលជា​សិស្ស​ឲ្យ​យកចិត្តទុកដាក់​ស្តាប់​ការធ្វើ​បទ​បង្ហាញ និង​ណែនាំ​របស់​ក្រុមការងារ​មកពី​មជ្ឈមណ្ឌល​ឯកសារ​កម្ពុជា ពីព្រោះ​នេះ​ជា​លើក​ទី​១ ដែល​សាលា​មាន​វាគ្មិន​មក​និយាយ​ពី​ប្រវត្តិសាស្ដ្រ​កម្ពុជា​ប្រជាធិបតេយ្យ (១៩៧៥-១៩៧៩)​។
​បន្ទាប់មក​លោក ឡុង ដា​នី នាយក​មជ្ឈមណ្ឌល​ផ្សះផ្សា​វាលវែង​នៃ​មជ្ឈមណ្ឌល ឯកសារ​កម្ពុជា​បាន​ណែនាំ​ខ្លួន និង​ក្រុមការងារ ដែល​ចុះមក​ធ្វើ​វេទិកា​ថ្នាក់រៀន​នៅ អនុ វិទ្យាល័យ ហ៊ុន សែន ថ្មដា និង​ពន្យល់​ពី​គោលបំណង​ដែល​មជ្ឈមណ្ឌល​ផ្សះផ្សា​វាលវែង ចុះមក​ធ្វើ​វេទិកា​ថ្នាក់រៀន​ប្រវត្តិសាស្ដ្រ​នេះ គឺ​ដើម្បី​ឲ្យ​ប្អូន​មានការ​យល់ដឹង​កាន់តែច្រើន រៀនសូត្រ​ពី​របប​កម្ពុជា​ប្រជាធិបតេយ្យ អាច​ពិភាក្សា​ជាមួយ​មនុស្ស​ជំនាន់​មុន មានដូចជា​ឪពុកម្តាយ ជីដូន​ជីតា និង​អ្នក​រស់រានមានជីវិត​ពី​របប​នោះ​ឲ្យ​ចេះ​អត់ឱន និង​អធ្យាស្រ័យ​គ្នា​ទៅវិញទៅមក​។​
​វេទិកា​ថ្នាក់រៀន​បានចាប់ផ្តើម​ដោយ​ឲ្យ​សិស្ស​បំពេញ​នូវ​សំណួរ​ស្ទាបស្ទង់​មតិ​មុន​ពេលធ្វើ​វេទិកា ដើម្បី​វាស់​ស្ទង់​ចំណេះដឹង​សិស្ស​ស្ដីពី​ប្រវត្តិសាស្ដ្រ​ខ្មែរក្រហម​នៅមុន ពេលដែល​សិស្សានុសិស្ស​ទទួល​ចំណេះដឹង​បន្ថែម តាមរយៈ​ការចូលរួម​នៅក្នុង​វេទិកា​នេះ​។ បន្ទាប់មក​សិស្ស​ឡើង​សរសេរ​ពីអ្វី​ដែល​ខ្លួន​បានដឹង និង​ពីអ្វី​ដែល​សិស្ស​ចង់ដឹង ពី​ប្រវត្តិសាស្ដ្រ​ខ្មែរក្រហម​។ វេទិកា​នេះ​ក៏មាន​ការចាក់​បញ្ចាំង​ខ្សែភាពយន្ត​ឯកសារ​ដែលមាន​ចំណងជើង​ថា «​កុមារ កម្ពុជា​»​។

ស្ពាន​ចាស់​កាត់​ស្ទឹង​នៅក្នុង​ឃុំ​ថ្មដា ស្រុក​វាលវែង ខេត្តពោធិ៍សាត់​(​រូបថត បណ្ណសារ​មជ្ឈមណ្ឌល​ឯកសារ​កម្ពុជា​)


​នៅ​កម្មវិធី​បន្ទាប់ លោក ឡុង ដា​នី បានធ្វើ​បទ​បង្ហាញ​ដោយ​លើកយក​ចំណុច សំខាន់ៗ​ដូចជា​៖
​វគ្គ​ទី​១. ការជម្លៀស​ប្រជាជន​ចេញពី​ទីក្រុង​ភ្នំពេញ ដើម្បី​ឲ្យ​មក​ធ្វើ​កសិកម្ម​នៅ តាម​ជនបទ ព្រោះ​ខ្មែរក្រហម​គិតថា ការកសាង​សង្គម​ឡើងវិញ គឺ​ផ្អែកទៅលើ​ទិន្នផល ស្រូវ​។ នៅក្នុង​របប​ខ្មែរក្រហម​មិនមាន​ការចាយ​លុយ មិនមាន​ផ្សារ​លក់ដូរ​ទំនិញ ទ្រព្យសម្បត្តិ​ឯកជន​ត្រូវ​ប្រមូល​ដាក់​រួម ប្រពៃណី ទំនៀមទម្លាប់ សាសនា វត្ត​អារាម ត្រូវបាន​ហាមឃាត់​។ កុមារ​ត្រូវបាន​បង្ខំ​ឲ្យ​រស់នៅ​បែក​ពី​ឪពុកម្តាយ និង​តម្រូវ​ឲ្យ​ធ្វើ​ការងារ​ផ្សេងៗ​ដូចជា រើស​អាចម៍គោ កាប់​ដើម​ទន្ទ្រានខែត្រ ដើម្បី​ធ្វើ​ជី សម្រាប់​ដាក់​ស្រែ​ជាដើម​។ កុមារ​បាន​រៀនសូត្រ​តែ​នៅពេល​ថ្ងៃត្រង់​បន្ទាប់ពី​ហូបបាយ​រួច នៅក្រោម​ផ្ទះ​ប្រជាជន ឬ​ក្រោម​ដើមឈើ​ក្នុង​រយៈពេល​១​ទៅ​២​ម៉ោង ក្នុង​មួយថ្ងៃ​។ ចំណែក​ប្រជាជន​ត្រូវបាន​បង្ខំ​ឲ្យ​រស់នៅក្នុង​សហករណ៍ ដោយ​ស្នាក់នៅ​រួម ធ្វើ​ការរួម ហូបចុក​រួម និង​កម្សាន្ត​សប្បាយ​ក៏​រួមគ្នា​ដែរ​។ ខ្មែរក្រហម​បាន​បង្ខំ​ឲ្យ​ប្រជាជន​ធ្វើការ​ហួសកម្លាំង ហើយ​មិន​ផ្តល់​របប​អាហារ​គ្រប់គ្រាន់​។ ខ្មែរក្រហម​បានសម្លាប់​អ្នកចេះដឹង ព្រោះ​អ្នកចេះដឹង​មានការ​ត្រិះរិះ​ពិចារណា​រកហេតុ​រក​ផល ឬក៏​មាន​ការតវ៉ា ដូច្នេះ​ខ្មែរក្រហម​មិន​ប្រើ​អ្នកចេះដឹង​ទេ​។ ទាហាន​ដែល​ធ្លាប់​ធ្វើការ​នៅ​សម័យមុន ឬ​ទាហាន លន់ នល់ ត្រូវបាន​ខ្មែរក្រហម​ចាត់ទុកជា​សត្រូវ និង​ត្រូវ​សម្លាប់ចោល​តែម្តង​។ ចំណែក​ជនជាតិភាគតិច​នៅ​តំបន់ភ្នំ ក៏​ត្រូវបាន​ខ្មែរក្រហម​ចាត់ទុកជា​សត្រូវ​នឹង​ជា​គោលដៅ​ដែល​ត្រូវកម្ទេច​ដែរ​។ ខ្មែរក្រហម​ក៏បាន​ប្រព្រឹត្ត​អំពើ​ប្រល័យពូជសាសន៍​ទៅលើ​ជនជាតិ​ចាម និង​ជនជាតិ​វៀតណាម​។ ខ្មែរក្រហម​បាន​ប្រើពាក្យ​ថា សម្លាប់​ខ្មាំង​ជំនួស​ឲ្យ ពាក្យ​ថា​សម្លាប់​ប្រជាជន សូម្បីតែ​ទោស​តិចតួច​ដូចជា​ធ្វើ​ឲ្យ​ខូចខាត​សម្ភារ​សម្រាប់ធ្វើ​កសិកម្ម លួច​បេះ​បន្លែ ផ្លែឈើ ចាប់​ត្រី ក៏ត្រូវ​បាន​ចាប់​ឃុំឃាំង ធ្វើ​ទារុណកម្ម និង​មួយ ចំនួន​ត្រូវបាន​សម្លាប់ចោល​។ នៅក្នុង​របប​ខ្មែរក្រហម​មាន​មន្ទីរ​សន្តិសុខ (​គុក​) ប្រមាណ ជា​២០០​នៅ​ទូទាំងប្រទេស គឺ​មន្ទីរ​សន្តិសុខ​ថ្នាក់ឃុំ​, មន្ទីរ​សន្តិសុខ​ថ្នាក់ស្រុក​, មន្ទីរ សន្តិសុខ​ថ្នាក់​តំបន់​, មន្ទីរ​សន្តិសុខ​ថ្នាក់​ភូមិភាគ និង​មន្ទីរ​សន្តិសុខ​មជ្ឈិម​នៅ​ភ្នំពេញ (​ស​-២១)​។
​វគ្គ​ទី​២. ការទប់ស្កាត់​អំពើ​ប្រល័យពូជសាសន៍​។ ធាតុ​ផ្សំ​របស់​អំពើ​ប្រល័យពូជសាសន៍​គឺ ការសម្លាប់​សមាជិក​ក្រុម​មួយ ក្នុង​គោលបំណង​បំផ្លិចបំផ្លាញ​ក្រុម​ទាំងមូល​។ ការបង្ក​ការឈឺចាប់ និង​ខូចខាត​យ៉ាងដំណំ​ផ្នែក​រាងកាយ ឬ​ស្មារតី​នៃ​សមាជិក​នៃ​ក្រុម​។ ការបង្កឡើង​ដោយ​ចេតនា និង​មហន្តរាយ​លើ​ស្ថានភាព​រស់នៅ​របស់​ក្រុម ដោយ​នាំមក នូវ​ការបំផ្លិចបំផ្លាញ​ទាំងស្រុង ឬ​ផ្នែក​មួយ​នៃ​ក្រុម​។ ការ​បង្ខាំង ឬ​ការប្រើប្រាស់​វិធាន ការណ៍​នានា ដើម្បី​បង្ការ​មិន​ឲ្យ​មានកំណើត​ទារក​។ ការយក​កុមារ​ចេញពី​ទីកន្លែង​មួយ​ទៅ​ដាក់​ក្នុង​ទីកន្លែង​មួយទៀត​ដោយ​បង្ខំ​។​
​នៅ​ចុងបញ្ចប់​នៃ​វេទិកា​ថ្នាក់រៀន​ក្រុមការងារ​បាន​ចែក​ក្រដាស​ឲ្យ​សិស្ស​បំពេញ​នូវ​សំណួរ​ស្ទាបស្ទង់​មតិ​ម្តងទៀត​។​
​មតិយោបល់​អ្នកចូលរួម​វេទិកា​ថ្នាក់រៀន​
​សុខ ស្រី​ណា ភេទ​ស្រី អាយុ​១៤​ឆ្នាំ ជា​សិស្ស​ថ្នាក់​ទៅ​៨ នៃ​អនុវិទ្យាល័យ​ហ៊ុនសែន ថ្មដា សព្វថ្ងៃ​រស់នៅ​ភូមិ​ឯកភាព ឃុំ​ថ្មដា ស្រុក​វាលវែង ខេត្តពោធិ៍សាត់ ដែលមាន​ឪពុក ម្តាយ​ជា​អតីត​ខ្មែរក្រហម​បាន​រត់​ភៀសខ្លួន​ពី​ខេត្តកំពត មក​រស់នៅ​ជាយដែន​ខ្មែរ​-​ថៃ ដោយសារតែ​សង្គ្រាម​កាលពី​ឆ្នាំ​១៩៧៩​។ ស្រី​ណា បាន​ប្រាប់ថា​សប្បាយចិត្ត​ដែល​ក្រុម ការងារ​មជ្ឈមណ្ឌល​ផ្សះផ្សា​វាលវែង បាន​ចុះមក​ផ្សព្វផ្សាយ​អំពី​របប​កម្ពុជា​ប្រជាធិបតេយ្យ​ដល់​ខ្លួន ក៏ដូចជា​មិត្តភក្តិ​ឲ្យ​បាន​យល់ដឹង​។ ចំពោះ ស្រី​ណា ម្តាយ​ឪពុក​ធ្លាប់​និយាយ​រឿង​ពី​សម័យ​ខ្មែរក្រហម​ឲ្យ​ស្តាប់​ថា ជំនាន់​នោះ​ធ្វើការ​ច្រើន ហូបចុក​មិនសូវ​ឆ្អែត និង​ត្រូវ​ខ្មែរក្រហម​បំបែក​ចេញពី​គ្រួសារ ដូច​ទៅនឹង​អ្វីដែល​លោកគ្រូ ដា​នី បាន​បង្រៀន​ដែរ​។ ស្រី​ណា ក៏មាន​សំណូមពរ​ឲ្យ​ចុះមក​បង្រៀន​ម្តងទៀត ព្រោះ​នៅក្នុង​កម្មវិធី​សាលា​អត់​ទាន់​មានការ​បង្រៀន​ពី​ប្រវត្តិសាស្ត្រ​កម្ពុជា​ប្រជាធិបតេយ្យ​ទេ ជាពិសេស គឺ​នៅ​ថ្ងៃទី​១ ខែមិថុនា គឺ​បន្ទាប់ពី​មើល​ខ្សែភាពយន្ត​ហើយ ស្រី​ណា មានចិត្ត​អាណិត​ដល់​ក្មេងៗ ដែល រស់​គេច​ពី​សម័យ​សង្គ្រាម ហើយក៏​ចង់​ឲ្យ​មក​បង្រៀន​ម្តងទៀត នៅ​ថ្ងៃ​ទិវា​កុមារ​អន្តរជាតិ​។​
​ង៉ាន ជី​ង ភេទ​ប្រុស អាយុ​១៥​ឆ្នាំ ជា​សិស្ស​ថ្នាក់​ទី​៩ នៃ​អនុវិទ្យាល័យ ហ៊ុន សែន ថ្មដា សព្វថ្ងៃ​រស់នៅ​ភូមិ​កណ្តាល ឃុំ​ថ្មដា ស្រុក​វាលវែង ខេត្តពោធិ៍សាត់​។ ឪពុក ម្តាយ​របស់ ជី​ង ជា​អ្នក​ដែល​ធ្លាប់​ឆ្លងកាត់​សម័យ​ខ្មែរក្រហម ប៉ុន្តែ​ពួកគាត់​មិនដែល​និយាយ​រឿងរ៉ាវ​ដែល​កើតឡើង​កន្លងមក​ប្រាប់​ដល់​កូនចៅ​ទេ​។ នេះ​ជា​លើក​ទី​១ ដែល ជី​ង បានទទួល​ចំណេះដឹង​ពី​របប​ខ្មែរក្រហម និង​បានដឹងថា​មានរឿង​អី​ខ្លះ​បាន​កើតឡើង​ចំពោះ​ប្រជាជន​ដែល​បាន​រស់នៅក្នុង​ជំនាន់​នោះ​។ ជី​ង ក៏​ទើបតែ​បានឮ​អំពី​គុក​របស់​របប​ខ្មែរក្រហម គឺមាន​ចំនួន​ច្រើន​។ ជី​ង មានការ​សប្បាយចិត្ត ដែល​ក្រុមការងារ​របស់​ម​ជ្ឈ មណ្ឌល​ផ្សះផ្សា​វាលវែង​នៃ​មជ្ឈមណ្ឌល​ឯកសារ​កម្ពុជា​បាន​ចុះមក​ផ្សព្វផ្សាយ​អំពី ប្រវត្តិ សាស្ត្រ​ខ្មែរក្រហម ព្រោះ​ពីមុនមក​អត់​ទាន់​បាន​រៀន ហើយ​ឪពុកម្តាយ​ក៏ អត់​ដែល​បាន​និយាយប្រាប់​។
​ ​លោកគ្រូ ហុក តាំង​អៀ បង្រៀន​នៅ​ថ្នាក់​៩​នៃ​អនុវិទ្យាល័យ​ហ៊ុនសែន ថ្មដា បាន មានមតិ​ថា ការរៀបចំ​វេទិកា​ថ្នាក់រៀន​នេះ​ល្អ គឺ​សិស្ស​អាច​យល់ដឹង​ទាក់ទង​ពី​ប្រវត្តិ សាស្ត្រ​ខ្មែរក្រហម​បាន ពីព្រោះ​ក្នុង​កម្មវិធីសិក្សា​អត់​ទាន់​មាន​ទេ ហើយក៏​ចង់​ឲ្យ​មាន​កម្មវិធី​បង្រៀន​នេះ​បន្តទៀត ដើម្បី​ឲ្យ​សិស្ស​អាច​ទទួលបាន​ចំណេះដឹង​គ្រប់គ្រាន់ និង ជួយ​ពួកគាត់​ទប់ស្កាត់​កុំ​ឲ្យ​មាន​របប​ប្រល័យពូជសាសន៍​កើតឡើង​ម្តងទៀត​៕សរន