យន្តហោះ​ពាណិជ្ជកម្ម​ត្រៀម​ចេញដំណើរ​ទៅ​ជម្លៀស​ជនជាតិ​ថៃ បន្ទាប់​ពី​ចិន​មិន​អនុញ្ញាត​ឲ្យយន្តហោះ​យោធា​ថៃ​ចូល​

1076
ចែករម្លែក

​បុគ្គលិក​វេជ្ជសាស្ត្រ​មួយក្រុម​នឹង​ចេញ​ដំណើរ​តាម​យន្តហោះ​ពាណិជ្ជកម្ម​មួយ​ដើម្បី​ទៅ​នាំ​ជនជាតិ​ថៃ​ចេញពី​ទីក្រុង​វូ​ហាន ប្រទេស​ចិន នៅ​ពេល​ឆាប់ៗ​នេះ នៅពេល​​ណា​ដែល​ផែនការ​ជម្លៀស​ពលរដ្ឋ​ថៃ​ចេញពី​កន្លែង​ផ្ទុះ​ជម្ងឺ​ផ្លូវដង្ហើម​នេះ​ទទួលបាន​ការអនុញ្ញាត​ពី​ចិន នេះ​បើ​តាម​អ្វី​ដែល​នាយក​រដ្ឋមន្ត្រី​ថៃ​លោក​ប្រា​យុទ្ធ ចាន​​អូ​ចា បាន​និយាយ​កាលពី​ថ្ងៃ​ពុធ​ទី​២៩​មករា​។​

​លោកនាយក​រដ្ឋមន្ត្រី​បាន​បន្ថែមថា​ ​ផែនការ​កាលពី​ប៉ុន្មាន​ថ្ងៃមុន​ដើម្បី​ដឹក​ជនជាតិ​ថៃ​ចេញពី​វូ​ហាន​នោះ​ត្រូវ​រារាំង​ដោយ​ច្បាប់​ចិន​ដែល​មិន​អនុញ្ញាត​អោយ​ប្រើ​យន្តហោះ​យោធា​ចូល​ទៅ​ដឹក​ជនជាតិ​បរទេស​នៅ​ក្នុង​ទឹកដី​របស់គេ​។​

​រដ្ឋាភិបាល​ថៃ​បាន​ស្ថិត​ក្រោម​ការរិះគន់​ខ្លាំង​ចំពោះ​ភាពយឺតយ៉ាវ​ក្នុង​ការចាត់វិធានការ​ជម្លៀស​ជនជាតិ​ថៃ​ចេញពី​ទីក្រុង​វូ​ហាន ដែល​ជា​ស្នូល​នៃ​ការផ្ទុះ​កូរ៉ូណា​វីរុស​​ដែល​រហូតមកទល់​ពេលនេះ​បាន​សម្លាប់​មនុស្ស​១៧០​នាក់​។​តែ​នាយករដ្ឋមន្ត្រី​ថៃ លោក​ប្រា​យុទ្ធ បាន​និយាយថា​«​យើង​មាន​ផែនការ​នាំ​ជនជាតិ​ថៃ​មក​ស្រុក​វិញ​​និង​យើង​កំពុង​រង់ចាំ​នាំ​ពួកគេ​ចេញ​។​យើង​យកចិត្តទុកដាក់​រឿងនេះ​ណាស់​»​។​

​ឧត្តមសេនីយ៍ប្រា​យុទ្ធ បាន​និយាយថា​រដ្ឋាភិបាល​នឹង​ប្រើ​យន្តហោះ​ពាណិជ្ជកម្ម​មួយ​ដើម្បី​ធ្វើ​ការជម្លៀស​តែ​យន្តហោះ​យោធា​គ្រាន់​តែ​ត្រៀម​ខ្លួន​ក្នុងករណី​គ្រា​អា​​សន្ន​។​

​សូមបញ្ជាក់​ថា ជប៉ុន​និង​អាម៉េរិក​បាន​ជម្លៀស​ពលរដ្ឋ​របស់​គេ​កាលពី​ថ្ងៃ​ពុធ ហើយ​ប្រទេស​មួយចំនួន​ទៀត​នឹង​ធ្វើ​តាម​។​

​ក្នុងពេល​ជាមួយគ្នា ក្រសួង​សុខាភិបាល​ថៃ​បាន​ព្រមាន​អំពី​ការចម្លង​រាលដាល​បន្ថែម ក្រោយពី​មាន​ការឆ្លង​ក្នុងស្រុក​ត្រូវ​បាន​បញ្ជាក់​អះអាង​នៅ​ជប៉ុន​។​អ្នក​​បើករថយន្ត​ក្រុង​ជប៉ុន​ម្នាក់​បាន​ឆ្លង​កូរ៉ូណា​វីរុស ទោះ​ជា​បុរស​នេះ​មិន​បាន​ធ្វើដំណើរ​ទៅ​កាន់​ទីក្រុង​វូ​ហាន​ប្រទេស​ចិន​ ​តែ​គាត់​បាន​ដឹក​ក្រុម​អ្នក​ទេសចេ​ចិន​​មកពី​ទីក្រុង​វូ​ហាន​។​

​មន្ត្រី​ថៃ​បាន​និយាយថា ការចម្លង​ក្នុងប្រទេស​ថៃ​អាច​មាន​តែ​មាន​កំរិត ហើយ​អាជ្ញាធរ​កំពុង​តាមដាន​ដិតដល់​លើ​ក្រុម​ភ្ញៀវ​ចិន​ដូចជា​នៅ​ឈៀង​ម៉ៃ ភូ​កេត​និង​​នៅ​ក្រុង​បាងកក​។​

​គិត​មក​ត្រឹម​ថ្ងៃ​ពុធ អ្នក​ឆ្លង​វីរុស​នេះ​នៅតែ​១៤​នាក់​ដដែល​នៅ​ថៃ និង​៩​នាក់​កំពុង​ទទួល​ការ​ព្យាបាល​នៅ​មន្ទីរពេទ្យ​៕​ប្រែ​សម្រួល​៖​វាសនា​

នាយករដ្ឋមន្ត្រី​ថៃ និយាយ​ទៅកាន់​មន្ត្រី​នៅ​អាកាសយានដ្ឋាន​នៅពេល​លោក​ទៅ​ពិនិត្យ​ឧបករណ៍​ពិនិត្យ​សុខភាព​អ្នកដំណើរ​ចូល​ថៃ​កាលពី​ថ្ងៃ​ពុធ​