សហព័ន្ធ​កីឡា​ទូក​កា​នូ ប្រកាស​បិទ​ការ​ប្រណាំងទូក ជ្រើសរើស​ជើងឯក ភូមិភាគ​វាលរាប​

ដោយ​៖ រ៉ូ​ហ្សា​
​កណ្តាល​៖
លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម និង​ជា​អនុប្រធាន​ទី​១ សហព័ន្ធ​កីឡា​ទូក​កា​នូ និង រ៉ូ​អ៊ីង​កម្ពុជា បាន​អញ្ជើញ​ជា​អធិបតី ក្នុង​ពិធី​បិទ​ការប្រកួត​កីឡា​ទូក ប្រពៃណី​ខ្នាត​អន្តរជាតិ “​ទូក​នាគ​” ជ្រើសរើស​ជើងឯក ភូមិភាគ​វាលរាប “​ពានរង្វាន់​សម្តេច​ក្រឡា​ហោម ស ខេង លើក​ទី​២ ឆ្នាំ​២០២០” កាលពី​រសៀល​ថ្ងៃទី​២៩ ខែមករា ឆ្នាំ​២០២០ នៅ​មាត់ទន្លេ​សួនច្បារ ក្រុង​តាខ្មៅ ខេត្តកណ្តាល​។​

លោក ប៉ាន សូរ​ស័ក្តិ

​លោក ប៉ាន សូរ​ស័ក្តិ បាន​មានប្រសាសន៍ថា ការប្រកួត​កីឡា​ទូក ប្រពៃណី​ខ្នាត​អន្តរជាតិ រយៈពេល ២ ថ្ងៃនេះ គឺជា​ការ​ផ្តល់ឱកាស ដល់​កីឡាករ​-​កីឡាការិនី បញ្ចេញ​នូវ​ទេពកោសល្យ ដើម្បី​វាស់​ស្ទង់​សមត្ថភាព បច្ចេកទេស ដែល​បាន​ហ្វឹកហាត់ នាពេល​កន្លងមក ហើយ​ជ័យជម្នះ ដែល​កីឡាករ​-​កីឡាការិនី ទទួលបាន នាពេលនេះ ពិតជា​មិនអាច​កាត់ផ្តាច់ ពី​ការខិតខំ​ហ្វឹកហាត់ ជាប្រចាំ បូកផ្សំ​ការតស៊ូ​ព្យាយាម គោរព​វិន័យ ក្រមសីលធម៌​ល្អ និង​បទដ្ឋាន​បច្ចេកទេស បាន​ត្រឹមត្រូវ នៅក្នុង​ការប្រកួត​។​

​លោក​បាន​បន្តថា រាជរដ្ឋាភិបាល​កម្ពុជា ក្រោម​មាគ៌ា​ដឹកនាំ​ដ៏​ឈ្លាសវៃ ប្រកបដោយ​គតិបណ្ឌិត របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បានធ្វើ​កម្ពុជា ទទួលបាន​នូវ ការឯកភាព​ជាតិ សុខសន្តិភាព ពេញលេញ និង​ទទួលបាន​ទំនុកចិត្ត ពី​គណៈកម្មាធិការ កីឡា​អូឡាំពិក​អន្តរជាតិ និង​ក្រុមប្រឹក្សា​កីឡា​អូឡាំពិក​អាស៊ី ដើម្បី​ធ្វើជា​ម្ចាស់ផ្ទះ រៀបចំ​ព្រឹត្តិការណ៍ ប្រកួត​កីឡា​អាស៊ីអាគ្នេយ៍ (SEA Games) នៅក្នុង​ឆ្នាំ​២០២៣ ខាងមុខនេះ​។ ជាពិសេស យើង​ត្រូវ «​សូម​អរគុណ សន្តិភាព ដែល​យើង​ស្រលាញ់ និង​ការពារ​សន្តិភាព​នេះ បើទោះបីជា​ក្នុងតម្លៃ​ណា ក៏ដោយ ទើប​យើង​មានឱកាស ទទួលបាន​ព្រឹត្តិការណ៍ ប្រកួត​កីឡា​អាស៊ីអាគ្នេយ៍ (SEA Games) នេះ​»​។​

ទិដ្ឋភាព​បិទ​ការប្រកួត​

​ដើម្បី​ឲ្យ​កីឡា​ទូក​កា​នូ​-​កា​យ៉ាក់ ទូក​រ៉ូ​អ៊ីង និង​ទូក​ប្រពៃណី ឬ​ហៅថា “​ទូក​នាគ​” កាន់​តែមាន​វឌ្ឍនភាព​ទាំង​បរិមាណ និង​គុណភាព អាច​ចូលរួម​ប្រកួត ក្នុង ព្រឹត្តិការណ៍ SEA Games ឆ្នាំ​២០២៣ ទទួលបាន​លទ្ធផល​ល្អ ត្រូវខិតខំ​បើក​វគ្គ​បណ្តុះបណ្តាល និង​បង្កើន​បរិមាណ​កីឡាករ​-​កីឡាការិនី នៅតាម​បណ្តា​សមាគម កីឡា​ទូក​ប្រពៃណី ខ្នាត​អន្តរជាតិ “​ទូក​នាគ​” ទូក​កា​នូ និង​ទូក​រ៉ូ​អ៊ីង ទូទាំងប្រទេស និង​ត្រូវមាន​ធនធាន និង​សម្ភារ​ហ្វឹកហាត់ ឲ្យ​បាន​គ្រប់គ្រាន់ ជាអាទិ៍ សមាគម​កីឡា​ទូក រាជធានី​-​ខេត្ត និង​ក្រសួង​ពាក់ព័ន្ធ ចាំបាច់​ត្រូវមាន​ទូក​ផ្ទាល់ខ្លួន ដើម្បី​ងាយស្រួល ក្នុងការ​ហ្វឹកហាត់ ក៏ដូចជា ចូលរួម​ប្រកួត​ទាំង​ថ្នាក់​ភូមិភាគ និង​ថ្នាក់ជាតិ​។​

ទិដ្ឋភាព​បិទ​ការប្រកួត​

​លោក​អនុប្រធាន​ទី​១ បាន​បន្ថែមទៀតថា ត្រូវ​ពង្រឹង​រចនាសម្ព័ន្ធ​គ្រប់គ្រង​ផ្ទៃក្នុង របស់​សហព័ន្ធ និង​សមាគម​កីឡា​ទូក ទូទាំងប្រទេស ដោយ​ផ្តោតលើ ការបំពេញ​មុខងារ របស់​គណៈកម្មការ​ជំនាញ​នីមួយៗ ប្រកបដោយ​ភាព​ទទួលខុសត្រូវ​ខ្ពស់​។ ត្រូវ​ពង្រឹងសមត្ថភាព អាជ្ញាកណ្តាល និង​ចៅក្រម ឲ្យ​កាន់តែ​ល្អប្រសើរ ទាំង​បរិមាណ និង​គុណភាព ដើម្បី​អាច​គ្រប់គ្រង និង​រៀបចំ​ការប្រកួត បាន​គ្រប់​កម្រិត​។ ត្រូវខិតខំ​ស្វែងរក​ដៃគូ​សហការ និង​ក្រុមហ៊ុន​ឧបត្ថម្ភ បន្ថែមទៀត ដើម្បី​បង្កើត​ព្រឹត្តិការណ៍​ប្រកួត ឲ្យ​បាន​កាន់តែច្រើន​ក្នុង​មួយឆ្នាំៗ តាម​ដែល​អាច​ធ្វើបាន ព្រមទាំង​ជំរុញ​ផ្សព្វផ្សាយ អំពី​ព្រឹត្តិការណ៍​ប្រកួត និង​សកម្មភាព​ការងារ របស់​សហព័ន្ធ ឲ្យ​បាន​ទូលំទូលាយ ដើម្បី​ទាក់ទាញ​ការគាំទ្រ ពី​វិស័យ​ឯកជន និង​សាធារណ​ជនជាតិ និង​អន្តរជាតិ​៕v

ទីតាំងផ្សាយពាណិជ្ជកម្ម

- Advertisment -

Most Popular

កម្ពុជា ​ប្រាប់​សហភាព​អឺរ...

​ដោយៈ មុនី​រ័ត្ន / ភ្នំពេ...

រដ្ឋបាលខេត្ត ជូនដំណឹង​ពី​...

ដោយៈ បាយ័ន / សៀមរាបៈ នៅ​ថ...

សម្តេច​តេ​ជោ ហ៊ុន សែន​៖​រ...

ដោយៈ​តារា​រិ​ទ្ធ​/​ភ្នំពេ...

«​យុទ្ធនាការ​ភ្នំពេញ​ស្អា...

ដោយៈ​សុផល​/​ភ្នំពេញ​៖​យុទ...